[多奇出品] - 重回足球場上

Royce Sports 足球中心 一站式為您提供所有關於足球嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceSportsFootball/

琴晚喺球場踢完一場波後,返屋企途中回望翻自己成個足球歷程,發覺足球帶俾自己好多樂趣、生存嘅動力同埋自我價值嘅肯定。今個球季仲做多咗一樣嘢就係寫有關足球嘅文章,能夠將自己一啲意見同足球理念同讀者分享係一件非常刺激嘅事,自己亦享受依種感覺。今次我唔係講曼聯,而係講自己過往足球經歷。
我由細細個好記得係5歲就睇足球小將,當中睇到大空翼講足球就係我嘅好朋友時,我就真係夜晚攬住個波瞓,唔知你哋有冇好似我咁做過呢?另外,我睇足球小將時有樣嘢諗極都唔明,就係點解南葛同明和第一次交手大空翼輸咗,但最後點解會攞到全國冠軍嘅?直到我大個咗睇重播先知到原來係有分組賽,頭嗰兩名可以晉級淘汰賽。而喺咁多個角色入面我最鍾意就係三杉,原因係佢係唯一一個喺技術層面係贏過大空翼嘅球員。我之後著嘅24號波衫都係因為佢。
自己鍾意踢波除咗受動畫影響外,就係因為足球嗰種千變萬化深深吸引到我。球員係前一秒或後一秒所做嘅決定就算係一樣,個效果可以相差好大。例如:我控完個波交出去同我再級一腳交出去個結果可以好唔同。另外,球員所做嘅決定個結果係未必完全可以100%估得到,個結果可以係正面、負面同中性,不過就可以修正或者係轉化。仲有就係足球唔係一個人踢,而係5人、7人或11人踢,當中所要求嘅合作性、技術同身體質素各有分別。


我本身係身體質素唔錯嘅球員,但因為左、右腳斷過十字韌帶及右腳半月板傷過,前前後後做過4次手術。最近嗰次係10月中做,做晒兩隻腳內窺鏡手術,希望做完可以踢返波,抖咗4個半月終於喺兩星期前踢翻波,點知依家又要面對疫情禁令。唔知你哋有冇人同我一樣受過傷呢?仲記得第一次做手術前驚會做做吓瞓醒咗,嗰時咪痛死!好彩最尾係做完先醒,做完之後,等消腫,然後做物理治療、健身,再次踢翻波。可惜嘅係,由於雙腳用力唔平衡,所以三年後再傷,今次係第二隻腳,係斷十字韌帶同半月板。今次就分兩次做,做完十字韌帶隔三個月就再做半月板,做完又係等消腫、物理治療同健身。做完嗰次手術就真係錫住個身去踢,眨吓眼就過咗10年。今次係10年嚟積積埋埋嘅傷做一次內窺鏡大修補,兩隻腳都做,好彩我有買意外保險,如果唔係多多錢都唔夠醫。

有時,我會問自己點解踢到傷晒都要踢,其實我都唔清楚,可能我係一個多病嘅人,好似我個名咁叫「多奇」。或者就係足球令我曾經或現在識得好多波友,亦都因為足球令我可以喺壓力底下釋放自己,令到自己長命啲,仲有足球令我學識到肯定自己存在價值。嚟緊依段冇波踢嘅時間就好似畫圖畫只係得黑白兩色,感覺非常枯燥。就係因為要再踢番波,見番啲波友,大家要努力捱過依段日字,踢完波之後就繼續飲嘢、食飯、吹水。其實依段時間大家多數都會喺屋企,足球教練可唔可以拍片教大家練體能,控、傳、接應等基本技巧,等到將來疫情過咗,大家出嚟踢翻波後見到我哋技術都明顯嘅進步。
我依家仲有一個夢,唔知可唔可以實現到呢?就係踢Dream World Cup,我好想可以代表香港出賽。嚟緊會入院做一啲檢查(唔係新型肺炎)。你哋都要保重身體,等到大家重回足球場上,再次享受足球樂趣。


Royce Sports 足球中心 一站式為您提供所有關於足球嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceSportsFootball/


留言


請按此登錄後留言。未成為會員? 立即註冊
    快捷鍵:←
    快捷鍵:→