【音樂台】長相廝守-伊巴與曼聯緣盡了?

勁好波 於 12/06/2017 發表 收藏文章
噚日洛迪高正式知道伊巴不獲曼聯續約,成晚個fb就畀呢個消息洗晒版,唔少本地同外國專頁都紛紛討論,唔少曼聯球迷都覺得好惋惜,都覺得伊巴為球隊貢獻良多。咁啱筆者當時聽緊一首廣東歌:Tonick嘅《長相廝守》,發現呢首歌都幾適合用嚟形容曼聯同球迷,與伊巴呢段短短緣份由開始到結束嘅心路歷程。

「回望最初 漆黑裡緊張的碰撞 雷電重擊 在一刻交錯 不安神情驚慌 還覺驚嘆徬徨」
話說由摩佬入魔一刻,大家都好期望佢會帶嚟咩新球員,而伊巴咁啱亦成為自由身,而喺呢個時間英媒紛傳摩佬會拉愛將伊巴入魔,而伊巴唔少場合都作曖昧嘅表態更令曼迷好期望,而唔曖昧嘅,相信係伊巴對摩佬嘅仰慕(伊巴都多次表示同摩佬關係好好,仲可以為佢赴湯蹈火)。不過唔少球迷都會懷疑伊巴年紀唔細,而且噸位十足,適唔適應到節奏極快嘅英超呢﹖同時間佢哋都好期待戰神伊巴來投,仲講到係新簡東拿,可以為球隊帶嚟極強個性添!

官宣伊巴加盟一刻,曼迷嘅期待相信高於懷疑。

「然後某刻 靜默時簡單的對望 然後發展 逐漸的交往 凶險齊來抵擋 還會給我護航 縱路途滿是困阻 問題或變化 不再可怕 去吧」
到正式簽入伊巴,伊巴馬上就喺社區盾入埋波,雖然都未到英超正式比賽,但曼聯球迷似乎都預見到,伊巴踢英超﹖無問題!至於隊友「月巴」朗尼大退化都無問題,因為有伊巴,落到場唔講以為伊巴同朗尼調轉咗年紀…

伊巴極速用表現取代朗尼喺球場上嘅領袖地位。
「無懼擱淺 在異流與衝擊鍛鍊 無懼壓迫 逆轉中改變 只想停留身邊 和你走每一天繼續上演 角力憑你在並肩 共同地奮戰 不再膽怯」
今季曼聯做咗和波專家,把握力為人詬病,伊巴都試過畀人彈,但佢為曼聯入唔少波都係事實,而且有啲仲係救命波!另外伊巴喺場上有股極強氣場,令對方後衛唔敢掉以輕心,以佢亦不時硬爆對方令曼迷拍爛手掌。正正係因為佢嘅作用同埋震攝力,曼聯球迷都好驚伊巴會好攰,因為差唔多場場都見到伊巴正選踢足90分鐘!因為伊巴出色表現,外界不時傳出曼聯願意同伊巴續約,仲可能續夠兩年,曼迷們舉埋腳贊成!

「不怕跌入 恐怖漩渦 不懼不累就憑團火 那怕這是禍 滴血都不會痛 未怕跌盪」
曼聯今季喺英超跌跌撞撞,但歐霸關關難過關關過,伊巴喺其中一位扛起成隊曼聯前進嘅人。結果伊巴可能真係累了…喺英超激烈比賽同極瀕密嘅賽程下,伊巴遇上隨時令佢球員生涯提早完結嘅傷患。遇膝傷嘅佢要長抖,不過伊巴又點會意志消沉?佢唔知識喺社交媒體話為歐霸盃決賽準備好嚇一嚇大家外,喺歐霸決賽時更大部份時間唔用拐杖走嚟走去。之後又post極速踢波相,令人驚嘆佢嘅復原能力及強大意志,佢就係佢自己口中所講嘅「獅子」!

伊巴段踢波片令唔少人O晒嘴…

難道我可以擺脫宿命 重遇你多次 還沒跟你相約他世再會 夢已化煙 (即使傷過無數次 仍會願意)無論要經過轉世千次百萬次 跟你的虛線 不變 緣盡了又有下次 再下次下次
可惜現實好殘酷。曼迷最後決定唔同伊巴續約,伊巴正式投入自由身市場。唔少曼迷表示可惜之餘,都會諗球會會唔會只係想慳伊巴養傷時嘅人工,之後等伊巴好番就會再簽番,而曼聯畀伊巴喺球會繼續養傷及做康復治療都帶畀曼迷暇想,不過呢一刻,邊個知?有嘅只係「希望」,只有時間可以證明。

「即使傷過無數次 仍會願意 離散聚天意有含意 情也是真摰」
伊巴帶畀曼迷嘅美好回憶,令筆者諗起另一位令曼迷極速愛上嘅瑞典鋒將-伊巴前輩拿臣。拿臣喺2007年短暫借到曼聯,雖然入波唔多,但喺球場作用明顯,令曼迷同曼聯會方好想佢再留耐啲。可惜僅僅兩個多月後,拿臣喺3月就租用期滿離開。由於呢兩位球員喺短暫時間為曼聯作出貢獻,相信如果之後有類似處境,曼聯都會再用類似方式操作令球會有所得益,而曼聯球迷雖然嘗過甜蜜嘅邂逅,又嘗苦澀嘅離別,不過如果再有球員以類似方式來投,相信佢哋都唔會吝嗇佢哋嘅喜愛,甚至因為珍惜,為佢哋打氣打得更落力!

對上一位令曼迷極速愛上嘅瑞典鋒將,係佢。

https://www.youtube.com/watch?v=sENLQMsYpHE
標籤: 曼聯  曼迷  伊巴  英超  歐聯  歐霸  戰神  轉會  自由身  

留言


請按此登錄後留言。未成為會員? 立即註冊
  • T-rex Cheung 於 12/06/2017 評論 NO. 1

    尼篇野真係柒到唔甘睇

  • @michael@ 於 21/06/2017 評論 NO. 2

    我希望伊巴嘅性格係唔想淨攞曼聯人工,等好返後才繼續從新簽約

快捷鍵:←
快捷鍵:→