【罷黜朗尼-摩佬的黑暗兵法】

勁好波 於 21/08/2016 發表 收藏文章
朗尼狀態以及身體質素一沉不起已經唔係一朝一夕嘅事,就連唔少曼聯球迷都大彈佢,不過彈還彈,朗尼都仲係拎緊30萬英鎊週薪加場場正選踢足全場,不過自從摩佬入主後,雖然表面上話以前未教曼聯前已經好想買佢,但係近幾場比賽朗尼縱有入球助攻,但場上表現絕不能稱得上出色並且連續三場被換出,唔同摩佬用黑暗兵法慢慢將朗尼踢下神壇?等世界波洛迪高同大家落一個時間錦囊!

黑暗兵法有一招公子獻頭,摩佬雖然無照抄,但都有少少異曲同工。公子獻頭要對象親身上陣,摩佬當然唔可以貿貿然踢朗尼做後備。本來上季朗尼回後踢6號位算係對球隊傷害最細,傳波少壓迫較易成功,控甩波都唔多怕,偏偏摩佬就話朗尼唔係6號位8號位,叫佢做10號位,結果開季控甩波傳失波經常出現,明明10號位有馬達有米希達恩都唔放住,莫非等大家睇多啲朗尼出醜等之後出師有名?

要罷黜朗尼,當然要畀人睇到有適合嘅頂替者!
9號位:伊巴謙莫域雖然暫時只簽一年合約,但係唔同場合訪問中,伊巴同摩佬都明示暗示唔只呢一年。伊巴君臨曼聯令曼迷相當興奮,而且戰術上令曼聯喺對方禁區更有震攝力,而且埋門更有保證,唔再係上年雲戈爾哲學咁得個猜字。伊巴仲試過遠射入波,呢樣係呢兩年曼聯少見。講做領袖,雖然朗尼做隊長都幾稱職,更衣室近幾年都未造反仲幾團結,但唔少曼聯球員都同時開始睇伊巴做頭了,仲傳話伊巴做埋其中一位副隊長添!至於朗尼,而家9號位相信到上季彈起嘅拉舒福特都未到佢了…
10號位:今夏曼聯第3位收購就係多蒙特嘅米希達恩。雖然阿美利亞美斯可以踢右翼,不過曼聯而家可以用嘅右翼球員有青訓連格同馬達時,上年喺多蒙特於德甲有11個入球及15個助攻嘅米希達恩,打進中最啱佢發揮創造力及後上入球能力。至於朗尼,後生時嘅勁射已經賣少見少,多數射波都係掃巴腳而唔係中腳背勁射,雖然準咗但經常唔夠力或太正中畀門將沒收或救出,喺禁區前沿嘅配合同組織亦隨住佢意識及技術退化而怠慢戰機,就連要自己「搞」嘅衝擊力都無埋,更多係控甩波畀人搶或者回後、傳失或者最有名嘅轉邊畀右閘華倫西亞。預期當摩佬覺得米希達恩慢慢融入後,朗尼被換出機會讓位畀米希達恩將更常出現。或者,最後常規10號正選或者會係米希達恩﹖
6及8號位:普巴以破世界紀錄來投,摩佬亦講明佢可以有戰術自由,某程度上都係核心身份。睇到對修咸頓一場,普巴各項數據都證明佢係核心,而曼聯唔少進攻都爽快咗,更肯用突破同傳球攻入對手腹地,進攻更多配合及變化,而普巴仲同伊巴眉來眼去,有唔少配合有「連攜」添,似乎呢對組合導今季曼聯先係更重要更值得倚重!


從呢啲跡象,都睇得出朗尼喺摩佬戰術下可能被會慢慢邊緣化,最近更傳出曼聯未想同朗尼續約住(雖然朗尼想傾新約) 。當然大家都難以想像朗尼會離開曼聯,佢又想喺曼聯退休做傳奇。相信曼聯球迷都唔想佢走,而係想佢有起色幫到球隊(至少對修咸頓球斬波幾靚。),所以如果摩佬叫朗尼做後備,都係想朗尼反省下醒番,但之後做咩角色﹖可能都係摩佬開季記者會話朗尼唔會喺嘅6號或8號位卦…

===========================================================================

歡迎大家上黎世界波一齊講下波,風花雪月一番

你嘅LIKE係我地嘅原動力
https://www.facebook.com/hereisworldball

最新Instagram :WORLD_FOOTBALLHK

留言


請按此登錄後留言。未成為會員? 立即註冊
  • 輝輝輝 於 21/08/2016 評論 NO. 1

    呢條友重跑得少過球証!

快捷鍵:←
快捷鍵:→