《Sky Sports》:阿仙奴與阿迪達展開談判

阿仙奴新任領隊人選備受關注,傳聞中曾經有機會嘅人選包括安歷基、安察洛堤、羅渣士、杜曹、艾歷尼、拿高斯文、路維等,不過有消息指阿仙奴管理層不願支付安歷基嘅高昂薪金,其餘羅渣士、杜曹、艾歷尼、拿高斯文、路維等人已陸續宣布留隊或完成續約又或已加盟新東家,餘下人選已經唔多。


呢個情況之下,一啲賭博網站已經將前阿仙奴隊長阿迪達列為頭號大熱,接任阿仙奴領隊賠率已不足兩倍,最近已封盤停止接受投注。《Sky Sports》消息來源證實,阿仙奴管理層將會喺英國時間周四與阿迪達展開談判,阿仙奴行政總裁加齊迪斯(Ivan Gazidis )、球探主管米斯連達(Sven Mislintat)及足球關係主管桑利耶(Raul Sanllehi)將會與阿迪達會面。


《Sky Sports》認為,阿迪達現時係阿仙奴頭號人選,一旦佢接受任命,喺今夏穸會窗可以動用 5,000萬轉會費引援,另外亦可以自行組織教練團隊。據較早前報導,阿仙奴行政總裁加齊迪斯期望新任領隊可以適應球會全新管理架構,即由球探主管負責引援、足球關係主管負責合約談判、主教練負責執教球隊,雲加時期領隊獨攬大權嘅時代終結。另外阿仙奴希望於世界盃決賽周揭幕前公布新帥人選。


現年36歲嘅阿迪達,2011-16年效力阿仙奴直至退役後加入曼城領隊哥迪奧拿教練團任助教。阿迪達年紀符合阿仙奴班主兒子要求選擇少帥嘅條件,曾任阿仙奴隊長,喺球隊內備受尊重、熟悉球會運作情況、了解球隊風格,報導認為佢係哥迪奧拿身邊重要助手,深受信任,今季曼城以100分贏得聯賽冠軍,佢亦功不可沒。相信阿迪達嘅風格絕對係阿仙奴所希望,但佢從未擔任主帥一職,第一次就要坐上阿仙奴帥位,可否處理內外部壓力將會係一大關鍵。至於佢能否適應球會全新權力關係,相信問題不大,因為呢方面佢喺曾執教拜仁慕尼黑嘅哥帥身邊應該學到不少。


Source: Sky Sports

留言


請按此登錄後留言。未成為會員? 立即註冊
  • Peelala 於 17/05/2018 評論 NO. 1

    以現時的阿記來說,五千萬唔夠執過條性感的後防線

快捷鍵:←
快捷鍵:→