【後踭專家】阿仙奴金球再現,藍斯後腳可否取代韋舒亞彈彈波?

自從雲加上任以嚟,球迷一直期望阿仙奴踢出華麗足球,不過喺「N年無冠」時代,能夠拎出嚟值得「一J再J」嘅美妙組織金球,其實唔多,近年令人印象最深刻嘅一定要數「韋舒亞彈彈波」,但啱啱阿仙奴作客富咸一役,藍斯嘅後腳又有冇資格取代韋舒亞嗰球,成為阿仙奴近年招牌金球呢?


2013年10月19日,阿仙奴主場對諾域治,大約18分鐘,卡蘇拿中場引球推進,傳俾韋舒亞,韋舒亞俾返卡蘇拿之後一路向前插,卡蘇拿第一時間彈俾基奧特,基奧特同韋舒亞完成兩個one-two配合,結果韋舒亞近距離面對門將時,全部人得個「睇」字,韋舒亞亦第一時間射入,整個攻勢由三人完成,連串高難度動作一氣呵成。

https://i.imgur.com/IGr7cfH.gif

最近一場聯賽,艾朗藍斯喺下半場後備上陣,66分鐘,佢首先喺己方後場右閘線發動反擊攻勢,交俾背身接應嘅拿卡錫迪,拿卡錫迪第一時間回傳,藍斯將球挑起避過對手,拿卡錫迪同比爾連先後繼續球不著地向前傳球,藍斯長途奔襲掩至前場,頭槌點俾米希達恩,再分俾奧巴美揚左路傳中,藍斯此時已身在門前,後腳射入。

https://i.imgur.com/75BR03Y.gif
https://i.imgur.com/7MxMOm3.gif

兩球比較起嚟,韋舒亞嗰球喺緊密空間內完成連串配合,技術更為細膩,不過藍斯呢一球由後場策動反擊,中途涉及五個球員嘅合作,喺組織層面嚟講係更勝一籌。另一方面,呢一個入波,見證咗艾馬利時代嘅轉變。以往,雲加甚少喺細節上作安排,但新一代教練如艾馬利等,往往設計好球員跑動線路、時機,咁樣先可以成就一個靚嘅反擊攻勢。

其實藍斯使出後腳入波絕非偶然,佢過往曾經多次如法炮製:
https://i.imgur.com/xcluIOz.gif
https://i.imgur.com/Tw8LUZX.gif


完整影片

韋舒亞vs諾域治
https://www.youtube.com/watch?v=odxh_ZEUPlQ
藍斯vs富咸
https://www.youtube.com/watch?v=VjSjkXyIobg

留言


請按此登錄後留言。未成為會員? 立即註冊
    快捷鍵:←
    快捷鍵:→