財務報表分析(4) - 英超Big6 收入比較 (商業收入)

足球財經 於 22/04/2019 發表 收藏文章
之前兩篇分別講到比賽日收入同埋電視播映收入,今次同大家講埋商業收入。

一如所料,曼聯17/18 球季喺呢一方面嘅收入高過晒所有其他英超球會。雖然曼聯自從費格遜爵士退休之後,一路都處於調整期,但係似乎都冇影響到曼聯嘅商業價值。曼聯執行副主席活華特甚至曾經講過,曼聯嘅商業收益同場上表現並無太大關連。


曼聯嘅年報進一步將商業收入細分為贊助收入與及商品銷售及相關授權收入,但其他球會冇進一步披露呢方面嘅資料,所以我哋只能夠以各隊整體商業收入去分析。

直至 17/18 球季之前,英超球會主要嘅贊助收入來源,不外乎都係心口主要贊助與及球衣製造商贊助,同埋部份球會可能會出售球場冠名權。自從17/18球季起,英超准許球會係波衫衫袖印上贊助商logo,令到球會又多一條財路。不過有部份球會,包括曼聯、阿仙奴同熱刺,喺17/18球季都冇搵到衫袖贊助,其中熱刺今季都仲未有。


不過就算曼聯冇搵到衫袖贊助,淨係心口主要贊助同埋球衣製造商贊助都贏其他球隊成條街。而且大家都知道,曼聯仲有一大堆各式各樣嘅官方合作夥伴,譬如連training衫都有唔同嘅贊助商,仲有指定咖啡品牌,指定威士忌品牌,指定床上用品品牌,指定油漆品牌等等等等,簡直足以涵括購買生活上嘅每一個細節。當然,呢一類嘅贊助金額相對會細好多。

至於第二位嘅曼城,大家都知道 Etihad 同曼城同屬阿布扎比聯合集團,兩者嘅關係極其密切。Etihad 目前同曼城嘅贊助合約組喺2013年簽訂,當時已經有評論指曼城透過利用作為關連方嘅 Etihad做大筆贊助金額,實質係容許股東繞過歐洲足協嘅財務公平條例 (Financial Fair Play Regulations) 注入更多資金。有報導指歐洲足協已經進行調查。但無論如何,近年曼城嘅成績,亦都已經令球會嘅商業價值提升唔少。大家可以留意,曼城喺今年二月已經宣布由2019/20 球季起,Puma 將會取代 Nike 成為球衣製造贊助商,雙方簽定長達十年嘅合約,每年贊助金額達到£65m, 比起現時Nike 每年£12m 升咗超過五倍,勢必令曼城縮窄商業收入上同曼聯嘅距離,甚至超前。

至於六隊之中明顯落後嘅北倫敦雙雄,兩隊17/18球季不約而同都未有衫袖贊助商。阿仙奴同曼城一樣,會喺19/20 球季轉球衣製造商,由Puma 轉投adidas, 贊助金額升一倍到達每年£60m. 至於熱刺,球會主席利維喺 18年10月同熱刺球迷代表見面時,提到管理層打算先處理認為新球場冠名權合約,大家即管可以睇下來季熱刺呢方面嘅發展。

另外,近期亦有傳聞指利物浦接近同 Nike 達成協議,由 2020/21 球季起贊助利物浦球衣,金額更有可能比曼聯現時同adidas 嘅台約更高。曼聯近年戰績下滑,雖然暫時仍然未對佢哋喺商場上嘅吸金能力有太大影響,但係可以見到另外幾隊 Big 6 已經急起直追,對曼聯喺呢方面嘅領導地位,造成一定程度嘅威脅。

標籤: 曼聯  曼城  熱刺  利物浦  車路士  阿仙奴  

留言


請按此登錄後留言。未成為會員? 立即註冊
    快捷鍵:←
    快捷鍵:→