財務報表分析 (1) - 主要收入來源

足球財經 於 12/04/2019 發表 收藏文章
財務報表分析 (1) - 主要收入來源

開欄最初,我想先用曼聯嘅財務報表做例子,同大家分享一下一般球會財務報表常見嘅 item. 第一集先講下收入嘅部分。

一間球會, 最直接嘅收入, 當然係主場進行比賽賣門票所收到嘅錢。 大家亦都知道,今時今日歐洲嘅大球會都有唔少贊助收入。 咁究竟一間球會會有啲咩唔同類型嘅收入呢?

曼聯嘅財務報表就將收入分類為以下三大項:


1. 商業收入 - 主要即係贊助商收入, 大家最耳熟能詳嘅, 應該係心口 Chevrolet (2014-2021 年, 每年約 £60m) 同 Adidas (2015-2024, 每年約 £75m), 當然仲有各類嘅合作夥伴,比如官方咖啡品牌, 官方葡萄酒品牌, 官方威士忌品牌等等。 另外, 大家如果去朝聖, 去到 Megastore 進貢返一千幾百的話, 都係歸納入呢一項。

2. 電視播映收入 - 大家都知英超同歐聯轉播權收費係非常之高, 而頗大部分嘅收益自然係分俾各參賽球隊。 大家可以留意一下, 唔少球會(包括曼聯)都會將係各項賽事基於排名/成績而得嘅獎金都歸納入呢一項。

3. 比賽日收入 - 呢度當然就係球迷真金白銀所付出嘅門票, 亦都包含比賽日子大家喺場內嘅消費,比如係飲食同場刊等等。


翻查曼聯 17/18 球季年報, 可以睇到曼聯呢幾年總收入每年都有唔錯嘅增長, 不過每年各項所佔比重都有啲唔同。 商務收入雖然每年上升, 但係升得最快嘅反而係電視收入, 而比賽日收入就一直係佔比最低, 而且所佔比重仲每年下跌。 咁樣算唔算正常, 同其他球會比較又如何呢? 下次再講。

下一篇: 財務報表分析(2) - 英超Big6 收入比較 (比賽日收入)

參考資料: 曼聯 2017-18 年度年報 https://ir.manutd.com/~/media/Files/M/Manutd-IR/documents/2018-mu-plc-form-20-f.pdf

留言


請按此登錄後留言。未成為會員? 立即註冊
    快捷鍵:←
    快捷鍵:→