提升德甲競爭力 效法英超可行嗎?

足球財經 於 27/05/2019 發表 收藏文章
商業雜誌《福布斯》(Forbes) 早前撰文指德甲應該參考英超嘅電視播映權收入嘅分配制度, 縮窄各隊之間金錢上嘅差距, 提高其他規模較少球會嘅競爭力與及成個聯賽嘅可觀性。 筆者就同大家比較下目前德甲同英超嘅播映權收入分配制度,睇下有關建議嘅可行性。

首先睇睇幾個聯賽各自嘅電視播映權價值。 根據國際四大會計師行畢馬威 (KPMG)統計, 英超 2016-19 三個球季嘅本土播映權合同總額達到 £5.14b, 平均每季 £1.71b (約相等€2b)。 德國方面,甲乙組綑綁一齊銷售,目前嘅本土播映權覆蓋 2017-21 四個球季,總值 €4.6b, 平均一季 €1.15b, 屬於歐洲第二貴,比西甲同意甲各自每季不足一億歐羅都高。至於海外播映權,英超同期金額為 £3.3b, 平均每季 £1.1b (約 €1.25b). 打後順序為西甲 (每季 €690m)、意甲(每季 €371m) 同德甲 (每季€240m),可見德甲喺本國以外嘅受歡迎程度遠遠落後另外幾大聯賽。

跟住睇下英超嘅分配制度。 本欄前文財務報表分析(3) - 英超Big6 收入比較 (電視播映收入) 同大家分享過,英超制度比較著重平衡各隊嘅利益,以 17/18 球季為例, 二十隊英超球每隊會先獲分配約£80m,餘下就按照球隊最終排名與及獲選作本土直播嘅比賽場數分配,獲分配最多錢嘅曼聯,全季埋單實收 £149.8m, 而包尾嘅西布朗就獲得 £94.7m, 最高同最低嘅比例, 大概係1.58:1.

至於德甲,可以話係貫徹德國人性格,比起英超複雜得多,首先要分開海外同本土播映權兩部分嚟睇:

海外部分
由 2017/18 球季開始, 首先會抽出五百萬歐羅平分俾德乙18隊 (往後每年遞增一百萬歐羅),餘額會按以下原則分配:
- 50% 視乎各隊過去五季於歐洲賽事表現分配 (即係拜仁會分到最大份);
- 25% 視乎每隊當季喺歐聯或者歐霸踢過幾多場比賽(包括外圍賽), 每踢一場得一分,按各隊得分分配;
- 餘下 25% 平均分配予 18 隊德甲球會。

本土部分
- 整個部分德甲同德乙一齊分配;
- 70% 視乎球隊過去五季聯賽排名,德甲首名為 36 分,每低一名少一分,直至德乙包尾(第十八名)1 分。喺德乙以下作賽 0 分。五季成績中,由最近一季至最遠一季, 順序按 5:4:3:2:1 比例加權,當季德甲最高排名(當然即係已連贏 N 季冠軍嘅拜仁)將會分到呢部分總額嘅 5.8%, 而德甲最低一名就分到 2.9%, 即剛好係拜仁嘅一半, 而德乙十八隊將會按排名獲分 0.75% - 1.69%;
- 23% 都係按照上述嘅五年加權平均排名分配, 甲乙組 36 隊會一齊排, 即係呢部分乙組球會有機會因為往績較佳而比部分甲組球會分得較多, 而加權排名頭六位嘅球會將會獲分配同等金額;
- 5% 都係睇歷史,不過今次睇夠 20 季, 而且不設加權, 每季成績佔相同比重(咁咪又係拜仁分最多...);
- 餘下 2%,係按各隊球季內喺德國球會受訓嘅 U23 球員上陣時間分配,用作鼓勵球會俾機會年青球員上陣。

喺呢個制度下,拜仁喺 2017/18球季獲得分配 €97.7m (約 £86.6m),比英超包尾仲要低,但比第二多嘅多蒙特 (€88.3m) 同第三多嘅史浩克04 (€79.7m) 多15% 同 23%。而獲得最少嘅,心水清嘅應該會估到係喺甲乙組日子尚淺嘅RB萊比錫,只得 €29.6m,拜仁多成超過三倍。

由另一間四大國際會計師行德勤(Deloitte)統計全球各大球會每年收入嘅 Football Money League 排行榜,上述三隊整體收入亦係唯一能夠排到頭二十位嘅德甲球會,分別排第四,第12同第16,但單單計電視播映收入(包括本土及歐洲賽事) 嘅排名,拜仁只係排第十,多蒙特同史浩克04排17同20, 反映德甲球會電視播映收入落後於其他競爭對手。
要參考英超縮窄球會之間獎金嘅差距,就即係要減少前列份子嘅分成,喺德甲向來最大最惡最正確嘅拜仁就一定會同你死過,兼且會話咁樣會影響德甲球會喺歐洲賽事嘅競爭力。而即使真係加重其他球會獎金嘅比例,以拜仁嘅財力同江湖地位,其他球會要競爭都唔係一件容易嘅事。要提升德甲整體收入,聯賽會或者可以效法近年西甲喺商業推廣範疇所下嘅功夫,喺有發展潛力嘅市場開設辦公室,開拓亞太同大中華地區嘅商業伙伴,做大個餅先係中長線發展嘅方向。呢方面,個別德甲球會已經做緊,但聯賽會方面似乎要再加把勁。

各位想追蹤更多足球界嘅財經新聞,可以like 足球財經嘅 Facebook page!

參考資料:
Forbes, “TV Distribution: Bundesliga Needs To Learn From English Premier League”
Bundesliga.com, “Unanimous decision passed by the DFL Board on media income distribution for the seasons from 2017/18 to 2020/21”
KPMG, “Chinese football: Revolution into evolution”
Deloitte Football Money League 2019

留言


請按此登錄後留言。未成為會員? 立即註冊
    快捷鍵:←
    快捷鍵:→