2018/19: 第5週陣容預告 – 繼續相信主場王阿古路

FPL Guy 於 15/09/2018 發表 收藏文章
完咗國際賽期後,又回復返每星期睇英超同玩FPL嘅日子喇!今週重點賽事就係熱刺(Spurs)對利物浦(Liverpool),利物浦開季全勝兼僅失一球,而熱刺就上輪不敵屈福特(Watford)。以狀態嚟計,應該都係利物浦秤先,我哋就睇下有好多人擁有嘅沙拿(Salah)同羅拔臣(Robertson)會唔會有好表現。今篇會同大家講下我嚟緊第5週嘅比賽會排咩陣。由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:3-5-2
本週陣容
球隊價值(Squad value): 99.8M剩餘資金(In the bank): 1.3M

轉會
賣出:韋費特沙夏(Zaha)
買入:哥林威爾遜(Wilson)
原因:韋費特沙夏上場因傷冇出,亦唔確定佢今場出唔出得,所以穩陣起見,都係買返個平價前鋒頂替佢。點解揀般尼茅夫(Bournemouth)嘅哥林威爾遜?最主要原因都係佢既有狀態,般尼茅夫嘅賽程又好。(詳情請見2018/19: 第5週球員轉會清單 – 揀賽程好定狀態好?

守門員
艾達臣(Ederson)
曼城(Man City)已經連續三場賽事都有失波,不幸嘅係三場都係失一球。曼城今場雖然只係對住升班馬富咸(Fulham),但富咸近兩場入6球,火力都有返咁上下。曼城今場贏波應該唔成問題,但係唔知佢哋又保唔保持到不失球呢。

後衛
雲比沙卡(Wan-Bissaka)
雖然水晶宮(Crystal Palace)近3場聯賽全部輸晒,狀態麻麻,但係佢哋今場嘅對手係比佢哋更差嘅哈特斯菲爾德(Huddersfield)。哈特斯菲爾德今季聯賽仍未打開勝利之門,4場僅入2球。雖然兩隊狀態都唔係好,但因為哈特斯菲爾德係更差嘅一隊,所以我會出雲比沙卡搏一鋪。
馬高斯阿朗素(Marcos Alonso)
馬高斯阿朗素今季已經6次有份參與車路士(Chelsea)嘅入球,比任何一位後衛都要多。阿朗素開季頭4場總共有12次射門,而當中就仲有一半係喺禁區內添。喺呢度就見到阿朗素喺沙利嘅體系下都獲得唔少直接攻門嘅機會。今場車路士主場面對嘅對手只係今季仲未試過作客入波嘅卡迪夫城(Cardiff),相信車路士不失球嘅機會都好大。
羅拔臣(Robertson)
今場利物浦需要作客對熱刺,應該會係開季5場當中最難打嘅一場。羅拔臣今季總共有10次關鍵傳送,係所有後衛之最。熱刺開季同利物浦一樣攻入9球,但利物浦只係失咗1球。如果唔係上場艾利臣比加(Alisson Becker)玩嘢,利物浦根本唔會失波添。出奇嘅係,羅拔臣10次嘗試助攻,但只係交出2個助攻,希望今場佢嘅隊友會把握到佢嘅助攻啦。

中場
沙拿(Salah)
沙拿雖然上場係開季第一場冇入到波或者交出助攻,但係佢開季表現都唔錯,除咗開季入咗2球同交出2個助攻之外,佢亦都有17次射門機會,當中更加係有12球嚟自禁區內。再加上,沙拿對住熱刺都係特別醒神嘅,上季兩對熱刺入3球,希望佢今場都會延續對熱刺有好表現啦。
米希達恩(Mkhitaryan)
米希達恩由上場開始被貶做後備,希望今場佢可以為阿仙奴(Arsenal)正選上陣,爭取返啲分數啦。
尼維斯(Neves)
狼隊(Wolves)今場對住聯賽尾二嘅般尼(Burnley),應該係佢哋嘅搶分良機。般尼開季總共失9球,係聯賽第三多。雖然尼維斯只係平地一聲雷,只係得開季第一場表現標青,希望佢今場都為狼隊作出進攻上嘅貢獻啦。
艾歷臣(Eriksen)
艾歷臣喺國際賽期代表丹麥都有好出色嘅表現,對威爾斯梅開二度,助丹麥取勝。雖然今場對住氣勢如虹嘅利物浦,但佢係熱刺射門次數最高嘅球員,達到13次。希望艾歷臣喺英超賽場上都可以盡快開齋啦,畢竟佢射門次數都唔少。
貝拿度施華(Bernardo Silva)
貝拿度施華繼之前對狼隊被貶為後備後,上場對紐卡素(New Castle)繼續成為後備,只係落場踢得32分鐘,希望佢今場可以因為國際賽期代表葡萄牙有唔錯嘅表現而重拾正選。如果唔係,應該好快就要賣走佢。

前鋒
哥林威爾遜(Wilson)
雖然上場對車路士(Chelsea),哥林威爾遜入唔到波,但佢嘅表現都唔錯,有一球差少少就幫到般尼茅夫開紀錄。暫時威爾遜喺英超獲得7個黃金機會,多過任何一位英超嘅球員。威爾遜暫時係英超錄得最多禁區內起腳嘅球員,希望今場佢延續開季嘅射手本色,喺李斯特城(Leicester)身上取得入球。
阿古路(Aguero)- Captain
曼城今場主場對富咸,都係預計阿古路應該都能夠搶到分。雖然上場對紐卡素就估唔中,佢冇波入,但都有交出助攻。不過,阿古路不嬲都主場超勁,所以會決定揀阿古路做隊長。更何況今場對手係場場有失波嘅富咸。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier Leaugue  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→