2018/19: 第31週陣容總結 – 災難級表現

FPL Guy 於 18/03/2019 發表 收藏文章
今週嘅第一個比賽日真係災難級嘅表現,筆者陣中嘅每一位有上陣嘅球員都只係得2分,諗住第二日有利物浦(Liverpool)同車路士(Chelsea)比賽會好啲啦。點知都係一樣,今週只係得李察利臣(Richarlison)一個拎到上陣基本以外嘅分,都真係好意外。今週嘅平均分係今季新低,30分都唔過。筆者都鬆一口氣,8人應戰都只係低平均分2分,都叫做捱過咗。希望靠下週嘅一週雙賽出奇制勝,追返晒跌咗嘅排名。咁依家就睇睇今週筆者嘅陣容踢成點先啦。
本週陣容

守門員
保路錫(Boruc)—2分
今場般尼茅夫(Bournemouth)主場以2比2賽和紐卡素(Newcastle),紐卡素全場錄得12射4中。其實,保路錫失嘅2球都好難怪佢,第一球係紐卡素前鋒朗頓(Rondon)罰球直射入網,角度刁鑽,令到保路錫都冇晒乎;而第二球就係臨完場前列治(Ritchie)接應傳中,窩利勁射入波,就算保路錫撲到都照入。雖然般尼茅夫失咗2球,保路錫要扣1分,但因為佢全場作出咗3次撲救,拎到1分撲救分,所以今週拎到2分。

後衛
彭利拿(Pereira)—2分
今場李斯特城(Leicester)作客以1比2險勝般尼(Burnley)。雖然李斯特城早早就有麥佳亞(Maguire)被逐,全場大部份時間僅得10人應戰兼控球率輸晒,但都能夠贏波。雖然係咁,但李斯特城嘅中目標射門都係比般尼多,般尼全場錄得13射2中,而李斯特城就錄得9射4中。不過唔好彩,般尼得2次中目標嘅射門都入到1球,令到彭利拿只係得2分。
阿歷山大阿諾(Alexander-Arnold)—2分
今場利物浦作客以1比2險勝排尾二嘅富咸(Fulham),今場利物浦控球佔優,控球率達到62.8%。利物浦全場錄得16次射門,不過只係得6球中龍;而富咸全場錄得7射2中,就已經入到1球。利物浦嘅失波係源於雲迪克(van Dijk)同門將艾利臣比加(Alisson)有誤會,雲迪積克用頭頂個波俾守門員嗰陣,就俾富咸前鋒巴布(Babel)偷到雞。今場阿歷山大阿諾全場錄得2次關鍵傳送,表現中規中距。
羅拔臣(Robertson)—2分
羅拔臣嘅表現都係不過不失,全場錄得1射1中並交出2次關鍵傳送。

中場
沙拿(Salah)—4分(Captain)
沙拿今場雖然錄得5射3中,射門次數同中目標射門次數係全隊最高,但係佢嘅把握力就差咗啲。喺下半場,利物浦有一個反擊機會,由文尼(Mane)策動,最尾文尼傳俾沙拿單刀,但可惜沙拿嘅射門俾對方嘅龍門接實。另外,沙拿全場只係作出咗18次傳球,係兩軍正選22人當中嘅最低,可見心急打破入球荒嘅沙拿變得越嚟越獨食,踢得越嚟越沉。
辛迪加斯(Snodgrass)—0分
今場韋斯咸(West Ham)主場以4比3險勝哈特斯菲爾德(Huddersfield),可惜之前兩場都正選嘅辛迪加斯竟然連1分鐘嘅上陣時間都冇。
李察利臣(Richarlison)—8分
今場愛華頓(Everton)主場以2比0淨勝車路士,愛華頓今場雖然控球率輸晒,但進攻就比車路士更有威脅。愛華頓嘅控球率只係得32.6%,但全場就錄得15射8中,中目標射門比車路士仲要多。今場李察利臣錄得3射1中,入1球。佢嘅入球係嚟自角球攻勢,施古臣(Sigurdsson)開出角球後,卡華特利雲(Calvert-Lewin)頂中,但俾車路士門將撲出不遠後,由李察利臣後上加一頭補中。
夏薩特(Hazard)—2分
今場車路士雖然控球率達到67.4%兼有16次射門,但中目標射門只係得5次。從數據上睇,夏薩特嘅表現係唔錯,全場錄得3射1中並交出2次關鍵傳送,但就未能製造到真正嘅威脅。

前鋒
威爾遜(Wilson)—2分
今場般尼茅夫同紐卡素嘅表現都差唔多,控球比率都相約,只係2%之差。不過般尼茅夫嘅射門次數就較少,錄得10射3中。今場威爾遜嘅表現其實唔算差,全場錄得2射1中。值得一提嘅係,佢有個攻門差少少就入,只係個波未過晒白界線,俾對方後衛護空門,欠咗少少運。

今週成績
本週分數:24
本週平均分:26
總成績:1,818
總排名:56,535

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→