2018/19: 第28週陣容預告 – 重新上路

FPL Guy 於 25/02/2019 發表 收藏文章
第27週先啱啱完,話咁快過多唔夠37個鐘又到第28週嘅截止時間。今個星期唔會轉會,因為一嚟本身個陣都足以應付,二嚟想留多一個比賽週,等有2個免費轉會(Free Transfer)先至換人。依家都仲未諗掂第31週嘅Blank Gameweek點算,因為棘手嘅問題係第31週係Blank Gameweek,第32週係一週雙賽(Double Gameweek),而第33週又變返做Blank Gameweek。筆者諗到有2個方案,第一個就最直接,第31週用Free Hit,湊夠15個會出場嘅球員。呢個方案就比較簡單,依家可以放眼喺第32週或之後嚟轉會。唯一唔好係,除咗要第32週要盡量入返一週雙賽嘅球員外,都要考慮埋第33週有咩球員有比賽。而第二個方案就係第32週用Free Hit,依家接住落嚟嘅轉會就係預備只得5場比賽嘅第31週。呢個方案嘅好處係,當你有足夠人數應付第31週,就唔洗怕第33週嘅Blank Gameweek,因為第31週有比賽嘅球隊,第33週都會有比賽,而且仲會有比起第31週更多嘅球隊有比賽。同埋,第32週就可以毫無顧忌咁盡量買入有得踢2場比賽嘅球員。呢個方案嘅弊處係比較難預計,當你所有轉會都係準備緊第31週,但中間如果不幸有球員受傷,就必然會打亂個部署。以筆者現時個陣為例,就算依家開始準備,去到第31週都只係會得10名球員作賽。有鑑於第27週筆者只係得8名球員出場,都死唔去,所以如果真係有10個球員有分,筆者都已經心滿意足。但若然喺第28週至第30週有第31週有比賽嘅球員受傷嘅話,咁就大穫喇。筆者個人認為,如果唔用Free Hit,第31週有9個或以上嘅球員出場,咁已經足夠。唔知大家嘅策略又係點呢?筆者暫未有定案,但暫時比較傾向方案二,所以想保留住珍貴嘅免費轉會,諗清楚先買人。咁依家就睇下筆者今週會點排陣啦。

由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:3-5-2
本週陣容

球隊價值(Squad value): 103.1M剩餘資金(In the bank): 1.2M


守門員
艾法列治(Etheridge)
卡迪夫城(Cardiff)今場會主場對愛華頓(Everton)。論近況,卡迪夫城仲稍稍佔優添,雖然卡迪夫城上場俾屈福特(Watford)大炒1比5,但佢哋近4場錄得2勝2負,而愛華頓就近4場只係錄得1勝3負。愛華頓喺呢4場入面只係攻入2球,攻力認真麻麻,呢個對卡迪夫城嚟講絕對係好消息,但不過上次對屈福特嘅賽前分析都係咁,而個結果大家都有目共睹。直到上場聯賽輸俾屈福特,卡迪夫城都係回勇緊,希望艾法列治今場做返齣好戲啦。

後衛
彭利拿(Pereira)
今場李斯特城(Leicester)會主場出擊對白禮頓(Brighton),兩支球隊近排都係頹到爆炸,大家都同樣係6場不勝,兼近4場錄得1和3負。白禮頓近4場僅入4球,攻力一般,但李斯特城嘅防守都真係不敢恭維,近4場失咗9球。所以領隊都俾人炒咗喇,李斯特城上場俾水晶宮(Crystal Palace)大炒1比4後,領隊佩爾就落穫。通常領隊被炒初頭,球隊嘅成績都會反彈嘅,希望李斯特城都係啦。
賓納特(Bennett)
今場狼隊(Wolves)會作客對榜尾嘅哈特斯菲爾德(Huddersfield),哈特斯菲爾德已經係連續16輪聯賽都未贏過波,近4場全部敗北。而狼隊就近5場不敗,近4場錄得2勝2和,狀態唔錯。哈特斯菲爾德近4場只係入得1球,預計今場狼隊能夠保持不失球嘅機會都好大。
羅拔臣(Robertson)
今場利物浦(Liverpool)將會主場迎戰屈福特(Watford)。屈福特近4場錄得2勝1和1負,近況唔錯,而利物浦近4場就錄得1勝3和,係就係不敗,但失分太多喇。屈福特近4場攻入7球,上場對住卡迪夫城仲入咗5球添。利物浦只係失咗15球,暫時係英超失球最少嘅球隊,而佢哋亦已經連續2場能夠保持不失球,希望今場利物浦喺防守上都繼續交出上乘嘅表現啦。

中場
沙拿(Salah)
沙拿近排嘅狀態真係有所回落,近4場只係入得1球。屈福特近4場只係失咗4球,防守唔算太差,但唔好忘記上季利物浦主場就大炒屈福特5比0,而當中沙拿就上演大四喜兼交出1個助攻。希望佢今場都可以有好表現啦。
普巴(Pogba)
今場曼聯(Man Utd)會作客對水晶宮,兩隊嘅近況都差唔多,兩支球隊近4場都係錄得2勝2和。水晶宮近4場只係失咗3球,防守都算唔錯。而曼聯就近4場入咗6球,而當中普巴就交出咗3入球1助攻,即係普巴直接或間接參與咗曼聯超過六成嘅入球。
摩天奴(Moutinho)
摩天奴近4場交出3個助攻,雖然近呢兩場都冇交出助攻,狀態沉咗少少,但佢係負責處理狼隊大部份嘅死球,應該都不乏助攻嘅機會。
李察利臣(Richarlison)
雖然李察利臣近排表現麻麻,近4場只係入得1球,已經連續3場冇入波冇助攻,兼且佢嘅出場時間亦越嚟越少。不過,選擇出佢嘅原因有二,一嚟唔想冒險同時出阿歷山大阿諾同羅拔臣,因為近排利物浦嘅表現都有所回落,失咗唔少分,唔想咁高風險搏佢哋唔失波,兼且阿歷山大阿諾都未必有正選踢得足60分鐘。第二個原因係都擔心卡迪夫城未必真係能夠唔失波,如果有失波,都有唔細嘅機會係李察利臣入或者助攻,始終佢都係一名進攻球員,所以都係出佢好過搏利物浦唔失波。
夏薩特(Hazard)
今場車路士(Chelsea)會主場迎戰熱刺(Spurs),上半季車路士技術性俾熱刺擊倒,希望今場夏薩特可以挺身而出拯救球隊。熱刺嘅近況絕對比車路士好,熱刺近4場錄得3勝1負,而車路士就近4場錄得1勝3負。熱刺近4場只係失咗4球,要入佢哋波絕對有難度。夏薩特近4場只係入咗2球,表現一般,希望佢今場都會入到波或者交到助攻。

前鋒
阿古路(Aguero)- Captain
今場曼城(Man City)將會主場迎戰韋斯咸(West Ham),韋斯咸近況一般,近4場錄得1勝2和3負。而曼城就近4場錄得3勝1負,表現對辦。韋斯咸近4場場場都有失波,總共失咗6球。而曼城就近4場入狂轟12球,場均入3球,火力驚人。而阿古路就包辦咗當中超過一半嘅入球,個人豪取7球,當中上演2次帽子戲法。今季阿古路喺主場正選上陣咗10次,就有9場係有入波或者助攻,真係不愧為主場王。試問今場曼城有主場之利,對手對上4場都有失波,加埋阿古路嘅狀態同數據支持,真係搵唔到咩理由係唔揀佢做隊長。
占美利斯(Jimenez)
占美利斯近4場交出4個入球,表現好穩定。今場仲要撞正今季失球第三多嘅哈特斯菲爾德,暫時失咗50球。佢哋近4場失咗10球,同富咸(Fulham)一樣都係近4場失最多波嘅球隊。面對住防線穿晒窿嘅哈特斯菲爾德,相信占美利斯會獲得唔少破門嘅機會。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→