2018/19: 第19週陣容總結 – 拆禮物日開心拆禮物

FPL Guy 於 29/12/2018 發表 收藏文章
喺拆禮物日,相信大部份人都可以開心拆禮物喇,因為今週嘅賽果都比較正路,同埋大部份熱門嘅球員都有入波或者助攻,除咗曼城(Man City)之外。例如有好多玩家都有買嘅沙拿(Salah)、奧巴美揚(Aubameyang)、夏薩特(Hazard)、卡尼(Kane)、李察利臣(Richarlison)全部都有波入,而近排比較多玩家買入嘅熱門人選都有唔少交出咗好表現,例如:孫興民(Son)、迪治尼(Digne)、普巴(Pogba)等等。咁仲唔係人人都開心拆禮物?咁依家就睇睇今週筆者嘅陣容踢成點先啦。

另外,都要同大家講聲唔好意思,我轉載嘅加長版英超精華好似因為地區限制嘅問題而喺香港睇唔到,真係十分抱歉!搵到個咁正嘅Youtube頻道,但竟然冇得與眾同樂。
本週陣容

守門員
法比安斯基(Fabianski)—3分
先落後嘅韋斯咸(West Ham)今週作客反勝修咸頓(Southampton),贏1比2。韋斯咸失嗰一球有啲唔抵,事緣修咸頓中場勒美拿喺右路傳中,個波輾轉落到岩士唐(Armstrong)腳下,佢嘅射門雖然被閂出,但接住就有羅美烏(Romeu)射門,但就省中冇越位嘅列特文(Redmond)。於是列特文即刻快腳施射,俾法比安斯基撲出不遠,然後羅美烏趨前再射,法比安斯基施展二連救,個波雖然係救到,但就向後彈,然後列特文同奧邦拿(Ogbonna)炒埋一碟,一個想補中,一個就想解圍。睇返慢鏡,最尾觸球的確係列特文,但係佢隻手掂到個波,所以應該算係手球,入球無效,但可惜英超仲未有VAR。今場法比安斯基作出咗4個撲救,所以有1分撲救分。

後衛
雲比沙卡(Wan-Bissaka)—8分
今場水晶宮(Crystal Palace)主場同卡迪夫城(Cardiff)互交白卷,雲比沙卡憑住出色嘅表現幫助球隊取得不失球,最後亦拎到2分bonus,總共得到8分。
賓納特(Bennett)—2分
由於以為利物浦(Liverpool)右閘阿歷山大阿諾(Alexander-Arnold)仲有傷,所以收咗佢喺後備席,冇出佢,出賓納特,結果證明呢個係一個錯嘅決定。今場狼隊(Wolves)作客富咸(Fulham),雙方以1比1握手言和。其實,賓納特都算好彩,有一球佢喺禁區內犯手球,但走甩咗,冇輸十二碼。今場到下半場74分鐘先失1球,都算係咁。
羅拔臣(Robertson)—6分
今場利物浦主場以4比0大炒紐卡素(Newcastle),過咗半季,利物浦只係失咗7球,不失球場數仲比失球數字多,今季佢哋有12場聯賽成功保持不失,兼且未嘗一敗,表現真係冇得彈。今場羅拔臣嘅進攻數據同上場對狼隊一樣,只係交出咗1次關鍵傳送,睇嚟羅拔臣一係就都攰喇,一係就表現真係開始回落。
馬高斯阿朗素(Marcos Alonso)—2分
今場車路士(Chelsea)作客以1比2贏咗屈福特(Watford)。屈福特全場錄得10射2中就已經收穫1個入球。阿朗素今場同近排嘅表現一樣,都係麻麻地,全場只係錄得1次關鍵傳送。車路士喺第16週贏完曼城之後,個賽程理應算係易打,但車路士不但未能夠贏出全部賽事,仲要每場都失1球,即係話佢哋已經連續3場冇不失球。而阿朗素更加係連續8場冇作出進攻上嘅貢獻,而當中亦只有3場係能夠幫助球隊保持清白之身。阿朗素咁貴,價值6.9M,但交啲咁嘅表現,睇嚟佢都唔係好值咁嘅價錢。

中場
李察利臣(Richarlison)—5分
愛華頓(Everton)上場先俾熱刺(Spurs)大屠殺完,估唔到今場輪到佢哋屠殺返對手,愛華頓作客以1比5大勝般尼(Burnley)。今場李察利臣先任後備,去到67分鐘先後備登場,結果佢亦於補時階段接應施古臣(Sigurdsson)嘅美妙直線,入返球埋齋。不過,可惜嘅係,好地地入波就入波啦,除乜嘢衫慶祝,搞到要領黃扣1分。
夏薩特(Hazard)—15分
今場梅開二度嘅夏薩特,數據非常亮麗,全場錄得3射3中入2球,當中有1球係佢親自搏返嚟嘅十二碼。另外,佢亦交出咗2次關鍵傳送。包辦晒車路士2個入球嘅夏薩特,成功幫助球隊贏屈福特2比1,而佢亦獲得3分bonus,今週拎到15分。
安達臣(Anderson)—15分
今場安達臣嘅表現非常出色,佢梅開二度,助韋斯咸反勝修咸頓。佢為韋斯咸扳平嘅一球係修咸頓後衛解圍,但個波就落咗喺安達臣嘅腳下。佢喺峨嵋月頂稍左嘅位置施射,個波直飛龍門左下角入網。而第二球就係嚟自修咸頓嘅角球攻門不果,俾韋斯咸快速反擊得手。安達臣接應安東尼奧(Antonio)嘅傳送,控定後單刀射入。表現出色嘅安達臣亦拎到3分bonus,今週總共拎到15分。
辛尼(Sane)—2分
曼城竟然聯賽2連敗,仲要對手唔係Big 6球隊,今場佢哋作客以2比1輸咗俾李斯特城(Leicester)。今場李斯特城錄得10射5中,而曼城就11射4中,中目標嘅射門仲比李斯特城少。今場辛尼嘅表現一般,全場錄得2射1中,同交出1個關鍵傳送。
孫興民(Son)—26分(Captain)
熱刺(Spurs)今場繼上場大炒愛華頓(Everton)之後,今個星期亦迎嚟一場大比數嘅勝仗,佢哋主場以5比0大勝般尼茅夫(Bournemouth)。熱刺近2場比賽入咗11球,而孫興民就連續2場梅開二度。佢今場錄得2次射門就已經入咗2球,效率極為驚人。佢因為拎咗張黃牌,所以扣咗1分,而佢亦拎到1分bonus,所以今個星期佢總共拎到13分。

前鋒
卡尼(Kane)—6分
卡尼已經連續8場正選上陣都能夠收穫入球或者助攻,表現穩定。今場佢錄得2射2中,就收穫到1個入球。另外,佢亦交出咗3次關鍵傳送,係全隊最高。

今週成績
本週分數:90
本週平均分:59
總成績:1,214
總排名:8,524

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Fantasy Premier League  FPL  英超  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→