2018/19: 第18週英超精華 – 愛華頓2-6熱刺

FPL Guy 於 24/12/2018 發表 收藏文章
首先,同大家講講我點解依家連精華片都撈埋。本身我都有睇開球迷世界嘅一個叫球迷分享站嘅專欄上載嘅精華片段,但係有啲位係我覺得有少少不足,所以我先至試下上載埋精華片段,暫時仲未有一個定位,因為始終我嘅主業始終係FPL。不過,上載英超精華片段又唔係話同FPL冇關係。第一個不足嘅地方其實唔關球迷分享站事,只不過有睇開佢哋嘅精華片嘅讀者都知道佢哋嘅影片來源係Streamable個網嘅,而我就平時用開平版電腦(Tablet)嚟方便我食飯嘅時候睇片。而我平時係會開平版電腦個stand嚟睇片,所以會係打橫顯示,睇片嚟講,都係好合理。而當平版電腦係橫屏嗰陣時,開佢哋嘅精華片係唔知點解㩒唔到全螢幕,要我打返直部機,先會喺右下角個位見到全螢幕個icon,唔知大家有冇類似嘅經歷?對於食緊飯嗰陣,其實係好唔方便,好唔user-friendly,但我知道呢個係唔關球迷分享站事。我平時都有睇佢哋嘅歐聯精華片,亦好多謝佢哋咁多年嚟帶俾我哋咁多唔同比賽嘅精華片。而第二個原因係由玩FPL開始後,我會關心多咗英超中下游嘅球隊,因為自己都有買佢哋嘅球員,但係通常見到都只係英超Big 6球隊嘅精華,所以變咗我要另覓渠道去搵精華睇,我估應該唔止得我一個係咁,我諗到嘅嘢,點會冇其他人諗過,所以當發現咗呢個渠道,就想同大家分享。第三個原因就係我比較鍾意睇長啲嘅精華,我覺得要大概8至15分鐘先至足夠。有時好慘,淨係得入球同中柱同中目標嘅射門睇,甚至乎只係得入球片段。我玩FPL,除咗會睇數據同賽程之外,都會睇直播同睇精華,睇下啲球員真實係踢成點。買咗嘅球員入波又好唔入波都好,我都會想知佢踢成點,而長啲嘅精華就話到俾我知佢究竟多唔多機會;就算射失,係差幾遠呢,禁區內定禁區外射,邊個助攻俾佢,佢同隊友走位配合係點,從而睇到佢弗唔弗,而決定買唔買好,又或者賣唔賣好。同埋亦可能有其他球迷同我一樣都想睇長啲嘅精華。

綜觀以上咁多原因,我覺得呢個來源係最好,當然淨係講英超啦。呢個係Youtube NBC Sports嘅頻道。佢每場英超都有加長版同普通版精華,而我喺呢度就只會轉載加長版精華。同埋我都未諗好我嘅目標係乜,冇理由每個星期轉載晒10場波,開埋聖誕快車仲得了嘅。所以我要諗下究竟係轉載Big 6球隊嘅精華呀,定係我嘅主力11人有份踢嘅比賽。不過,依家我就轉載住愛華頓(Everton)同熱刺(Spurs)場波先。由於呢個唔係我嘅主業,所以我都唔會用文字形容場波咁多,有咩大家就睇片啦。

入球球員
愛華頓:禾確特 21’、施古臣 51’
熱刺:孫興民 27’ & 61’、阿里 35’、卡尼 42’ & 74’、艾歷臣 48’


如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/

如果喜歡我們的文章,請即分享到︰

標籤: Premier League  英超  愛華頓  熱刺  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→