2018/19: 第37週陣容預告 – 雙曼防守

FPL Guy 於 03/05/2019 發表 收藏文章
嚟到今季英超嘅最尾2輪喇,唔鬥到最後都唔知係利物浦(Liverpool)定曼城(Man City)拎聯賽冠軍。其實,筆者個陣嘅問題又唔係好大,但當然仲可以喺唔同位置上作出優化,首當其衝嘅一定係阿仙奴(Arsenal),佢哋近排真係踢得好差,攻不銳守不穩,想就想賣走佢哋嫁喇,但只不過賣完佢哋就冇錢入返啲有質素嘅球員,所以要留住佢哋。調返轉頭諗,不如諗下應該要入啲咩球員,筆者認為應該要買入曼城同曼聯(Man Utd)嘅球員,除非你缺少咗利物浦嘅球員。利物浦、曼城同曼聯嘅球員係筆者眼中季尾必備。揀利物浦同曼城嘅原因都好簡單,就係因為佢哋仲爭緊英超,必定會拼盡全力打埋最後兩場賽事。至於曼聯,就係因為佢哋要爭前四同埋剩返嘅對手都係處於降班區,佢哋嘅對手分別係護緊級嘅卡迪夫城(Cardiff)同篤定降班嘅哈特斯菲爾德(Huddersfield)。咁依家就睇下筆者今週會點排陣啦。

由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:4-4-2
本週陣容
球隊價值(Squad value): 102.8M剩餘資金(In the bank): 0.4M

轉會
賣出:科士打(Foster)
買入:艾達臣(Ederson)
原因:
最主要作出呢個轉會嘅原因係睇中曼城嘅不失球,除咗係因為聯賽只係剩返兩場,曼城一定會搏盡之外,就係曼城近6場只係失咗1球,防守有一定保證。因為科士打嘅價錢較貴,所以選擇賣佢走,買入艾達臣。不過,都唔可以睇小李斯特城(Leicester)嘅攻力,佢哋近4場入咗9球,隨時能夠成為曼城爭標嘅攔路虎。

賣出:查比亞(Trippier)
買入:梳爾(Shaw)
原因:
至於後衛方面,其實係想賣高拿仙歷(Kolasinac),而唔係查比亞。不過無奈唔夠資金去做今週嘅兩個轉會,所以要賣走高價但唔係成日出嘅查比亞。阿仙奴嘅近況真係好唔掂,連輸3場,所以如果可以,一定係賣走高拿仙歷。而睇中梳爾嘅原因係曼聯嘅賽程,佢哋今週會先對哈特斯菲爾德,之後再對卡迪夫城。賽程應該已經係咁多隊當中嘅最好,曼聯基本上呢兩場都實食冇黐牙,否則就要提早宣佈保前四失敗。先講今週,曼聯嘅對手哈特斯菲爾德已經連輸8場,近4場只係攻入2球,冇乜攻力。至於曼聯,雖然佢哋嘅近況都唔係好,近4場只係錄得1勝1和2負,仲要失咗8球。雖然係咁,但曼聯始終都高哈特斯菲爾德幾班波,所以要保住清白之身應該都唔難。

守門員
艾達臣(Ederson)
上面嘅轉會原因都交代得好詳細,所以都唔再重複多講喇。

後衛
華利尼(Valery)
今場修咸頓(Southampton)會作客對韋斯咸(West Ham)。兩支球隊嘅近況都差唔多,韋斯咸近4場錄得1勝1和1負,而修咸頓就近4場錄得1勝2和1負。韋斯咸近4場入咗4球,攻力一般。不過,修咸頓近4場失咗8球,防守不濟。雖然係咁,但華利尼上場交出1個助攻,希望佢今場都依舊會有好表現。更重要嘅係,因為筆者唔想出白禮頓(Brighton)嘅杜菲(Duffy),所以寧願搏一搏修咸頓。
羅拔臣(Robertson)
今場利物浦會作客對紐卡素(Newcastle),紐卡素近4場錄得2勝1和1負,而利物浦就近4場全勝。紐卡素近4場攻入5球,攻力普通。利物浦嘅防守就相當好,近4場僅失1球。再加上羅拔臣助攻力極強,今季聯賽累積交出11次助攻,成為英超史上僅第三位單季交出10次或以上助攻嘅後衛。佢上場都交出咗2個助攻,狀態非常好。
高拿仙歷(Kolasinac)
今場阿仙奴會主場對仍然要護級嘅白禮頓,白禮頓近4場錄得2和2負,表現認真麻麻。而阿仙奴近4場就錄得1勝3負,表現都同白禮頓差唔多咁差。白禮頓近4場只係攻入1球,攻力絕對唔掂。雖然阿仙奴近4場勁失9球,但對住攻力咁唔掂嘅白禮頓,應該都唔會失波掛。
梳爾(Shaw)
上面嘅轉會原因都交代得好詳細,所以都唔再重複多講喇。

中場
沙拿(Salah)- Captain
沙拿依家真係全面復甦,佢不但成為今季英超入球最快達到20球嘅球員,仲係連續5場都有入波或者助攻,一共交出4入球3助攻。希望佢可以繼續保持狀態,為利物浦帶嚟進攻上嘅貢獻。
禾特包斯(Ward-Prowse)
禾特包斯上場攻入咗1球,結束咗5場嘅入球荒,希望佢今場繼續入波。值得一提嘅係有一項關於禾特包斯嘅有趣數據,佢係今季英超作出咗最多關鍵傳送而未交出過助攻嘅球員。佢全季錄得56次關鍵傳送,但1個助攻都冇,希望佢今場可以交到助攻啦。
史達寧(Sterling)
今場曼城將會主場對李斯特城。李斯特城近4場錄得2勝1和1負,表現唔錯。而曼城近4場就錄得全勝,表現極好。李斯特城近4場失咗4球,防守一般。史達寧近4場交出2入球1助攻,表現都算唔錯,希望佢今場都會繼續入波啦。
孫興民(Son)
今場熱刺(Spurs)會作客對般尼茅夫(Bournemouth)。兩支球隊嘅近況都差唔多,般尼茅夫近4場錄得1勝1和2負,而熱刺就近4場錄得2勝2負。般尼茅夫近4場失咗7球,防守都唔係幾穩陣。不過,孫興民近排嘅狀態都有所回落,近4場只係交出1次助攻,希望佢今場因為週中歐聯停賽而冇上陣而重拾勇態啦。

前鋒
占美利斯(Jimenez)
今場狼隊(Wolves)會主場迎戰富咸(Fulham)。兩支球隊嘅近況都唔錯,已經篤定降班嘅富咸近4場錄得3勝1負,而狼隊就近4場錄得2勝1和1負。富咸近4場失咗4球,但已經連續3場保持不失球,都真係唔可以睇小。不過,占美利斯嘅狀態有少少回落,近4場只係入咗1球,希望佢今場都可以入到波或者交到助攻啦。
拿卡錫迪(Lacazette)
拿卡錫迪近4場只係交出1次助攻,表現一般。白禮頓近4場失咗4球,希望拿卡錫迪今場會帶嚟進攻上嘅貢獻啦。

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/
標籤: Fantasy Premier League  FPL  英超  Football  Soccer  足球  

留言


請按此登錄後留言。未成為會員? 立即註冊
    快捷鍵:←
    快捷鍵:→