2018/19: 第26週陣容總結 – 雙曼發威

FPL Guy 於 12/02/2019 發表 收藏文章
阿古路(Aguero)連續兩個比賽週都大演帽子戲法,真係弗到漏油。即使下一週曼城(Man City)冇比賽,阿古路都暫時依然係最多人買入嘅球員,暫時就有超過15萬名玩家買咗佢嚟預備第27週。順便又再溫馨提示一下大家,第27週,即係下一週,有4支球隊係冇比賽,包括:白禮頓(Brighton)、車路士(Chelsea)、愛華頓(Everton)同曼城。筆者個陣嘅排名自第20週就連續跌足5個星期,好彩自上週起先谷底反彈,到今個星期又再升少少,上返頭3萬名。隨住個賽季已經過咗3分2,筆者就希望今季能夠以頭1萬名完成賽季。大家一齊努力,我都希望大家都喺各自嘅迷你聯賽有好表現。咁依家就睇睇今週筆者嘅陣容踢成點先啦。
本週陣容

守門員
艾法列治(Etheridge)—5分
今場卡迪夫城(Cardiff)作客以1比2險勝修咸頓(Southampton)。雖然卡迪夫城控球率只係得33.4%,兼對手分別射門次數同中目標射門次數都比主隊高一倍,但卡迪夫城都能夠守足90分鐘,表現令人驚歎。不過,好可惜,佢哋去到補時都要失波。修咸頓全場錄得14射7中,當中艾法列治就救出咗6球,令佢拎到2分撲救分。艾法列治表現神勇,所以拎到1分bonus,今週拎到5分。

後衛
雲比沙卡(Wan-Bissaka)—1分
今場水晶宮(Crystal Palace)主場以1比1迫和韋斯咸(West Ham)。雖然韋斯咸全場只係錄得6次射門,比水晶宮嘅25次射門少得多,但已經能夠攻入1球。因為雲比沙卡拎咗張黃牌,所以被扣1分,今個星期只係拎到1分。
賓納特(Bennett)—2分
今場狼隊(Wolves)主場以1比1驚險迫和紐卡素(Newcastle)。控球同射門方面都係主隊佔優,狼隊嘅控球率達到59.5%,而射門次數就達到22次;相反,紐卡素全場只係錄得9次射門。不過,紐卡素就係先入波嘅一隊。狼隊要去到下半場補時最後一刻先由中堅保利(Boly)門前頂入迫和對手。因為狼隊失咗1球,所以賓納特今週只係拎到2分。
羅拔臣(Robertson)—9分
今場利物浦(Liverpool)主場以3比0淨勝般尼茅夫(Bournemouth)。羅拔臣今場踢得唔錯,除咗助利物浦保持清白之身外,仲交出咗1個助攻。佢嘅傳球吊入禁區,搵到入楔緊嘅韋拿杜姆(Wijnaldum),韋拿杜姆控定後再笠射入波。羅拔臣憑住出色嘅表現,拎到1分bonus,所以今週有9分。

中場
沙拿(Salah)—8分
今場沙拿就活躍咗好多,作出咗全隊最多嘅7次射門,當中有3個中目標射門,收穫1個入球。另外,佢亦有個唔中目標但中楣嘅射門,好可惜未能增添紀錄。因為利物浦冇失波,同埋沙拿入1球,所以今週係拎到8分。
普巴(Pogba)—32分(Captain)
今場曼聯(Man Utd)作客以0比3大勝富咸(Fulham),普巴今場腳風好順,喺全場錄得3射2中嘅情況下梅開二度。第一個入球係佢接應馬斯亞(Martial)嘅傳送後,第一時間窄角度起左腳抽射,個波直飛龍門近柱入網。而佢今場嘅第二個入球射入由隊友馬達(Mata)搏般嚟嘅十二碼。雖然守門員捉到路,個因為個波射得夠邊夠快,所以冇俾龍門撲出。由於普巴今場表現出色,所以拎到3分bonus,令到佢今週拎到16分。
摩天奴(Moutinho)—2分
今場狼隊都獲得唔少角球,達到13次,但摩天奴今場嘅角球質素就麻麻,冇乜威脅。佢全場錄得4次關鍵傳送,係全隊最高。
李察利臣(Richarlison)—2分
今場愛華頓作客以1比0傷咗俾屈福特(Watford)。屈福特全場錄得7射2中,就入1球;相反,愛華頓全場錄得9射4中,但都冇入波。李察利臣延續佢低迷嘅狀態,踢咗65分鐘竟然錄得0射門同0次關鍵傳送,所以就喺65分鐘被換走喇。
夏薩特(Hazard)—2分
今場車路士作客以6比0大敗俾曼城。車路士完全係俾曼城技術性擊倒,車路士全場錄得12射4中;相反,曼城全場15射9中入6球,效率相當高。夏薩特今場表現一般,毫無亮點,全場錄得2射0中同交出咗3次關鍵傳送。

前鋒
阿古路(Aguero)—17分
曼城主場以6比0血洗車路士,其中阿古路繼上輪聯賽對阿仙奴(Arsenal)大演帽子戲法後,今場再一次戴帽。今次係佢第11次喺英超大演帽子戲法,成功追平咗名宿舒利亞喺英超戴帽嘅紀錄。其實喺阿古路未入波之前,就出現咗一個絕佳嘅入球機會俾佢。貝拿度施華左路底線傳中,傳到去尾柱嘅阿古路,但佢竟然喺無人看管嘅情況下面對空門射斜。相隔5分鐘,阿古路竟然面對佐真奴(Jorginho)嘅力迫同魯迪加(Rudiger)嘅攔截下喺禁區外射入世界波,呢球嘅難度絕對比頭先空門難好多。6分鐘後,車路士後防犯錯,巴克利(Barkley)喺禁區頂將隊友嘅頭槌解圍頂返去龍門口,伏兵門前嘅阿古路轉身輕鬆射入個人今場嘅第二球。下半場開波冇耐,阿古路接應迪布尼(De Bruyne)嘅傳中頂中楣彈出。至於阿古路入嘅第三球就係源於隊友史達寧(Sterling)高速殺入禁區。唔夠快嘅艾斯派古達(Azpilicueta)仍然選擇出腳攔截,結果踢跌史達寧,球證直指十二碼。今季主射十二碼冇甩拖嘅阿古路結果亦毫無懸念地射入,大演帽子戲法。阿古路戰至64分鐘已經被調離場,留力歐聯,但已經錄得6射3中,當中唔中目標嘅射門仲包括空門不入同頭槌中楣,今場如果把握力好少少就分分鐘入到5球。由於阿古路今場表現實在太好,所以都拎到3分bonus,今週拎到17分。
占美利斯(Jimenez)—2分
占美利斯錄得全隊最高嘅6次射門,但就只係得1球中目標,今場射門非常唔準。另外,佢亦交出3次關鍵傳送,係全隊第二高。

今週成績
本週分數:82
本週平均分:57
總成績:1,614
總排名:27,479

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/
標籤: Fantasy Premier League  FPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→