2018/19: 第24週陣容總結 & 第25週陣容預告

FPL Guy 於 02/02/2019 發表 收藏文章
今週嘅賽果都幾出人意表,Big 6球隊當中只係得阿仙奴(Arsenal)同熱刺(Spurs)冇失分,其餘4隊全部失分。以為曼城(Man City)輸波已經好意外,係利物浦(Liverpool)擴大領先優勢嘅好機會?點知利物浦就被迫和。以為蘇斯克查上任後嘅曼聯(Man Utd)係長勝之師,真正嘅考驗仲未到?點知對住般尼(Burnley)幾經辛苦先迫和到。以為車路士(Chelsea)借走咗莫拉達(Morata),嚟咗希古恩(Higuain)會有好轉?結果俾般尼茅夫(Bournemouth)完勝,對手每每反擊都得手,最終被大炒4比0。今週又一次揀錯隊長,球員表現又麻麻,不過都係要睇睇今週筆者嘅陣容踢成點。
本週陣容

守門員
艾法列治(Etheridge)—1分
由於白禮頓(Brighton)嘅正選門將賴恩(Ryan)已歸隊,所以畢頓(Button)亦退居後備。所以原本畢頓嘅位置就由卡迪夫城(Cardiff)嘅艾法列治頂替。今場卡迪夫城作客以2比1輸咗俾阿仙奴。因為失咗2球而被扣1分,所以艾法列治今週只係拎到1分。

後衛
賓納特(Bennett)—5分
今場狼隊(Wolves)主場以3比0擊敗韋斯咸(West Ham),狼隊贏得相當有說服力。韋斯咸全場錄得4射0中,所以今場狼隊係過咗6輪比賽之後再一次保持清白之身。由於賓納特今場拎咗張黃牌,所以被扣1分,今週拎到5分。
雲比沙卡(Wan-Bissaka)—1分
今場水晶宮(Crystal Palace)作客以1比1俾修咸頓(Southampton)迫和,因為雲比沙卡今場拎咗張黃牌,所以被扣1分,今個星期得1分。
迪治尼(Digne)—-2分
對住迪治尼真係冇咩好講,今場佢只係後備入替拜恩斯(Baines),只係踢咗11分鐘就直接因為破壞單刀而領紅,佢已經係連續2場負分,下場仲要停賽。
羅拔臣(Robertson)—2分
今場利物浦以1比1賽和李斯特城(Leicester),李斯特城全場只係得5次攻門,2次中龍,就已經入咗1球喇。今場羅拔臣表現麻麻,全場只係錄得1次射門。

中場
普巴(Pogba)—7分
今場曼聯力盡艱辛,去到87分鐘先由普巴操刀連加特(Lingard)搏返嚟嘅十二碼,然後喺補時階段再由連迪路夫(Lindelof)追平。普巴今場錄得7射3中,係隊中最表現最好。另外,佢亦交出咗2次關鍵次數。
李察利臣(Richarlison)—8分
今場愛華頓(Everton)作客以0比1小勝哈特斯菲爾德(Huddersfield),李察利臣今場嘅表現唔錯,全場錄得3射2中,最終亦收穫1個入球。
沙拿(Salah)—4分(Captain)
今場沙拿表現普通,全場只係錄得2射0中同交出1次關鍵傳送,冇咗前幾場嘅銳利感。
簡迪(Kante)—2分
今場車路士作客以4比0慘敗俾般尼茅夫,兩隊嘅射門次數都差唔多,車路士有11次,而般尼茅夫就稍高少少,有12次。不過,中目標射門就大家一樣,各有7次。簡迪真係激死我,佢有1個黃金機會,突破越位,接應柏度(Pedro)嘅傳送,單刀直接面對龍門,可惜控得差,個波直接俾守門員沒收。
夏薩特(Hazard)—2分
今場車路士全隊嘅表現都繼續係好差,但夏薩特嘅表現已經係全隊最好。佢全場錄得3次射門,係全隊最多。另外,佢亦交出咗5次關鍵傳送,亦都係全隊最高。

前鋒
占美利斯(Jimenez)—12分
占美利斯今場表現非常好,全場錄得6射2中兼交出1次關鍵傳送,最終亦收穫2個入球。憑住出色嘅表現,佢亦拎到3分bonus,今週總共拎到12分。

今週成績
本週分數:42
本週平均分:42
總成績:1,434
總排名:72,948

因為週中有聯賽,出文時間短咗,所以就第24週陣容總結同第25週陣容預告夾埋一齊出,而預告就唔太夠時間寫,不過最緊要都係出到陣容。再一次提提大家,第25週係一週雙賽,曼城同愛華頓都會踢2場,而喺第27週就雙雙都冇比賽。咁事不宜遲,即刻睇睇第25週嘅排陣。

由於距離截止時間都仲有一段時間,陣容都有機會因球員受傷情況或有關出場嘅消息而改變。預計陣容:3-5-2
本週陣容

球隊價值(Squad value): 102.0M剩餘資金(In the bank): 1.5M

轉會
賣出:卡尼(Kane)
買入:阿古路(Aguero)
原因:
卡尼要賣就係一個不爭嘅事實,隔咗咁多日終於決定到買邊個。長遠嚟講,人選應該係奧巴美揚(Aubameyang)或者拉舒福特(Rashford),但由於啱啱確認第25週曼城會有一週雙賽,於是目光就立刻投向阿古路。買曼城嘅球員,其實最擔心都係輪換。但睇返阿古路近6場聯賽,6場都有出,而當中有5場係正選,可見佢嘅出場率都幾穩定。而當中5場正選上陣嘅聯賽,佢5場都能夠帶嚟進攻上嘅回報,喺呢5場比賽總共收穫咗3入球2助攻。曼城今週會先主場對阿仙奴(Arsenal)之後再作客對愛華頓,3隊嘅近況都差唔多,其中曼城同阿仙奴都係近4場錄得3勝1負,而愛華頓近4場就錄得2勝2負。無獨有偶,曼城嘅2位對手近4場都係僅失3球,表現唔太差,但因為曼城有2場比賽,所以會揀阿古路做隊長。

守門員
艾法列治(Etheridge)
卡迪夫城今場會主場對般尼茅夫,般尼茅夫上場以4球大炒車路士,絕對係不容忽視。般尼茅夫近4場錄得2勝1和1負,狀態唔錯。相反,主隊卡迪夫城近4場錄得1和3負,表現慘不忍睹。希望今場艾法列治會有好表現啦,畢竟佢都係暫時第二高分嘅守門員。

後衛
雲比沙卡(Wan-Bissaka)
賓納特(Bennett)
羅拔臣(Robertson)

中場
沙拿(Salah)
普巴(Pogba)
簡迪(Kante)
李察利臣(Richarlison)
夏薩特(Hazard)

前鋒
阿古路(Aguero)- Captain
上面嘅轉會原因都交代得好詳細,所以都唔再重複多講喇。
占美利斯(Jimenez)

如果你鐘意呢個專欄,請不忘訂閱呢個專欄同讚好我個專頁:https://www.facebook.com/fplguy1905/
標籤: Fantasy Premier League  FPL  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→