駁回?緩刑?車仔到底有冇得簽人?

車迷Z 於 13/05/2019 發表 收藏文章
2019年5月8號,車路士官方網站撰文,對於FIFA上訴委員會 (FIFA Appeal Committee) 冇撤銷兩個轉會窗嘅轉會禁令表示失望,並且表示會將該決定持續上訴至國際體育仲裁院 (Court of Arbitration for Sport,簡稱CAS) 。


既然轉會禁令看似塵埃落定,點解車仔仲要繼續上訴呢?一個來自FIFA嘅判決,又點解會上訴到CAS呢?標題所講嘅緩刑,又到底係點回事呢?

一切,都要從2014年嘅巴塞隆拿開始講起……


2014年4月2號,由於巴塞隆拿涉嫌違章操作未成年球員嘅轉會,被FIFA判處長達14個月嘅轉會禁令。巴塞隨即表示會對判決進行上訴,並且會上訴至CAS為止。

2014年4月23號,FIFA上訴委員會表示,有鑑於案件嘅複雜性,並考慮到巴塞已表示最高會上訴至CAS,要於7月1號轉會窗正式開啟前完成整個上訴流程,可能性相當低。於是,對巴塞嘅14個月轉會禁令施以緩刑,直到案件上訴流程完全結束為止。


緩刑嘅判決,令巴塞能夠順利於2014年嘅夏季轉會窗正常地進行轉會操作。可能係為未來兩個轉會窗未雨綢繆,兼之碰上世界盃年,巴塞於該轉會窗嘅活動顯得非常頻繁。蘇亞雷斯,迪史達根,拉傑迪,呢三位至今仍然屬於巴塞主力嘅球員,都係2014年夏天加盟巴塞。呢次緩刑,令巴塞嘅重組得以踏出順利嘅第一步。

當然,到最後,巴塞嘅上訴並沒有被CAS取納。2014年12月30號,CAS表示否決巴塞嘅上訴,巴塞亦隨即服刑,於2015年嘅冬季及夏季轉會窗,都冇註冊任何新球員。因此,於2015年夏天同巴塞進行簽約嘅維杜爾同艾達杜蘭,只能隨隊訓練半季。到2016年年初,先正式註冊為巴塞隆拿球員,並獲得為巴塞正式上陣嘅資格。


隨後,於2016年1月,皇家馬德里亦都因為相同嘅罪狀,被FIFA判處兩個轉會窗嘅轉會禁令,原定於2016年夏天開始執行。皇馬故技重施之後,上訴期間同樣獲得轉會禁令嘅緩刑執行,皇馬得以如常於2016年夏天買人。而到最後,皇馬上訴得直,獲得減刑,從兩個轉會窗減至一個,並於2017年冬季轉會窗執行。當然,對於冬季轉會並不頻繁嘅歐洲球壇黎講,一個冬季服刑嘅轉會禁令,基本上等同無罪釋放了。

但係,係唔係每次對FIFA判刑嘅上訴,都能夠獲得轉會禁令嘅緩刑呢?唔係


馬德里體育會,同同城死敵皇馬一樣,都於2016年年初,被判以兩個轉會窗嘅轉會禁令。但係,同皇馬命途迴異嘅係,馬體會嘅轉會禁令,並冇獲得FIFA嘅緩刑。因此,2016年夏季,馬體會無法進行任何球員嘅簽署。

因禍得福嘅係,馬體會嘅當家射手基士文,亦於2016年夏季,表示續約馬體會。基士文表示,球會經歷患難之際,佢冇辦法袖手旁觀地離去,選擇留隊一齊共度難關。當然,亦有指基士文留隊嘅最大原因,係會方開出嘅70萬週薪太過吸引,球員同樣冇辦法放住呢張肥約袖手旁觀地離去。


所以,講完一大輪,到底車仔夏天有冇得簽人呢?答案係,按照目前嘅走勢,不能

因為,如果我地觀察番上述案例的話,就會發現要上訴FIFA頒發嘅轉會禁令,有兩關要過。第一關,係FIFA上訴委員會;第二關,係CAS。而不論係2014年嘅巴塞,定係2016年嘅皇馬,都係上訴未被FIFA上訴委員會駁回之前,亦即係連第一關都未過完,FIFA就已經宣布會進行緩刑。而冇被緩刑處理嘅馬體會,自然係從頭到尾都冇任何消息。按此推斷,如果FIFA係有意緩刑嘅,應該會第一關過完之前,就已經宣布緩刑。到第一關過完都仲了無聲氣嘅,緩刑應該就凍過水了。

翻睇5月8號嘅官方通訊,就會發現FIFA上訴委員會已經完成審理來自車路士嘅上訴申請。除左局部放寬對車路士青年隊嘅註冊限制之外,冇對一線隊嘅轉會禁令有任何改動。所以,除非CAS調翻轉頭要求FIFA予以寬限,黎緊夏天嘅轉會大戰,車仔大概只能作壁上觀。


有消息指出,目前陣中屬於借將嘅高華基治同希古恩,都會因為無法被車路士正式簽下,所以必須於租借期屆滿後回歸母隊。而冬季轉會窗已經加盟嘅普利錫,會因為只係完成簽約後被外借至多蒙特,夏天屬於外借歸隊,所以無損呢位美國國腳來季為車仔上陣。
當然,亦都代表車路士高達43人嘅外借大軍,來季多少有咁幾個都有獲得上陣機會。撇除確定離隊嘅K.夏薩特,同歸隊可能性極低嘅莫拉達,都仲有41個理論上嘅可用之兵。係唔知當中會有幾多個能入沙利法眼……


請支持Facebook專頁「車迷Z」!
資料來源:
https://www.chelseafc.com/en/news/2019/05/08/chelsea-statement?cardIndex=2-5
https://twitter.com/CFCDaily/status/1126412827076509697?s=19
https://www.bbc.com/sport/football/48202945
https://www.90min.com/posts/6303088-7-football-teams-who-received-transfer-bans-how-they-fared-afterwards
https://www.tas-cas.org/en/general-information/news-detail/article/cas-dismisses-fc-barcelonas-transfer-ban-appeal.html
https://www.bbc.com/sport/football/27126522
https://www.independent.co.uk/sport/football/european/barcelona-transfer-ban-la-liga-giants-cannot-sign-players-until-2016-after-cas-reject-appeal-9949791.html
https://en.wikipedia.org/wiki/Chelsea_F.C.#Out_on_loan

留言


請按此登錄後留言。未成為會員? 立即註冊
    快捷鍵:←
    快捷鍵:→