車迷賽和曼聯後短評︰從希古恩到賽前部署、雙方戰術;最後都係要講返希古恩

拾苟說足球 於 29/04/2019 發表 收藏文章
應該係第一次睇完場波隔一日之後先出球評。冇計,臨完場嗰刻心理處於高度不平衡嘅狀態,冇把握寫得出言之有物嘅球評(只會淪為怒罵球証艾堅遜同希古恩嘅發泄文),冷靜下過個冷河是有必要的。

1. 賽前預測:最鈍的矛對最脆的盾

另類嘅「矛盾大對決」,呢個係筆者同朋友賽前對呢場大戰嘅預測。車仔除夏薩特外進攻靈感欠奉已是積患,而曼聯賽前近8小時46分鐘嘅冇喺open play入過波,呈現兩隊冇牙老虎之勢。防守方面,曼聯作客葛迪遜公園吞4蛋歷歷在目,防線人腳天殘地缺亦都眾所周知;車仔稍好,防線近況冇咁慘不忍睹,但歐霸主場失三球,雷斯神經刀嘅軟肋,魯迪加傷癒狀態未明,同「穩固」二字相去甚遠。

2. 上半場:曼聯自編自導自演

N年冇open play入波嘅曼聯,上半場打出蘇B接手初期fast and attacking football嘅風采,同靴里拉復出入替費特不無關係。身後有個你信得過嘅中場做掃蕩,自然更敢上前,傳控走位嘅選擇亦自然多左。盧卡古吊入禁區嗰腳估你唔到咁靚,而疏爾喺爆到入禁區之後總有足夠體力作出對個波最恰當嘅處理,更係居功至偉。

另一邊廂,失波居然敗喺理應是近五年黎防線最固若金湯嘅迪基亞手上,入波嗰刻我係困惑到連歡呼都唔記得。老實講,車仔上半場冇記錯係零射門中龍(直至扳平),攻勢清一色隔靴搔癢,若非迪基亞派膠,我實在諗唔到可以點入波。

攻守兩端,曼聯都係當自無愧嘅「主角」。

3. 下半場:進攻嚴重左傾嘅車路士

先講排陣。夏薩特居左,起用翼衛嘅馬高斯艾朗素代替攻守平衡嘅艾馬臣,應該係針對曼聯右閘楊格軟肋嘅部署。左路側擊力強盛加針對對方弱點嘅情況下,攻勢集中並顯得凌厲係情理之中。問題在於,當中路同右路冇辦法製造足夠威脅,形成拉扯同呼應嘅時候,僅靠左路攻勢好容易被mark死至啞火。

右路勢弱,韋利安不得不負上好大責任。誠然,艾斯派古達被盧卡古壓制,簡迪陷入中場球權爭奪,的確係未能為韋利安帶黎太多進攻助力。但係每當韋利安攞到波嘅時候,我都總覺得佢「慢」,好慢。從接應到帶波到搵人傳波到決定出波路線,成個人嘅決策都顯得好猶豫不決。當中有幾多係戰術上嘅要求,有幾多係隊友冇出現喺有威脅嘅位置、有幾多係佢本人過三字頭之後失速而唔習慣轉型……不得而知。

順帶一提,柏度入替之後,右路先正式開始打番生。門前救險之餘,造就空位俾斯派古達後上出波,傳波亦都甚具想像力。體力上嘅優勢固然有影響,但佢本人亦應記一功。

4. 希古恩

承上韋利安個point,前線球員走位嘅配合,以Sarriball呢種戰術,應該係要極度細緻嘅要求。所以琴晚以至近半季,隊波走位走到咁散,公正地講,唔完全要球員負全責嘅。

但係。

以一個同沙利合作過,曾經喺Sarriball下入球如麻,以走位見稱嘅前鋒黎講,希古恩嘅表現絕對係災難級。走位懶散,鮮少主動尋求配合,全場見得最多嘅就係佢「fing」向隊友抱怨,一唔係行行企企就係越位。以事論事,今場佢真係好垃圾。

表現差我可以容忍同原諒,但係連去試嘅心都冇就真係罪無可恕。冇波到可以拉空,冇位走可以做波,而希古恩係didn't even bother trying。莫拉達離隊前表現都唔好,但係你睇得出佢有心。希古恩?全場唯一亮點係臨尾「終於」反越位成功,但係我借你番黎唔係要你cosplay恩沙基呀大佬。再講,恩沙基當年係不停咁衝擊防線,對後衞帶黎嘅精神壓力係幾何級,而希古恩係隱形到唔見左。

5. Martin Atkinson

唔想去揣測佢係咪有偏頗,只係想講,佢今場所選取嘅執法標準好有問題。保證比賽嘅流暢性係一回事,但嗰個從一開始就唔應該係球證嘅本職。執行球例,確保球賽唔會因為尺度太大而失控,先係球證嘅本份。而今場,我覺得佢對球賽失去控制。盧卡古撞飛艾斯派古達,馬迪肘擊唔好話牌連犯規都冇吹,洛荷鞋釘直踩韋利安腳踝,係印象最深刻嘅幾個場面。

小總結:
讓四大賽依然持續。從結果上黎講,車仔依然前四,一分係個可以接受嘅結果,而我都唔覺得車仔值得全取三分。雖然話車仔仲有第四係歸功於阿記同熱刺連續派膠,但係讓四嘅野,只要有兩隊渣過我就可以了。

P.S. 週四歐霸,艾馬臣、洛夫斯捷克、基奧特三個都冇正選,好有可能係為歐霸輪換。不過我對於對法蘭克福嘅四強戰係一啲把握都冇。

標籤: 車迷Z  

留言


請按此登錄後留言。未成為會員? 立即註冊
  • dickens 於 30/04/2019 評論 NO. 1

    車仔跟本實力不足,內部不和,老闆冇心搞,一盤散沙。有第四已經執到,吾好以為重係已前的球隊。頭三冇份,第四因為對手自爆。中游隊專心歐霸啦。充大頭鬼。

快捷鍵:←
快捷鍵:→