「皇馬轉會禁令」睇真啲

兩星期嘅國際賽期又黎到尾聲,而就喺剛結束嘅星期四,一個重磅消息再次被帶到皇馬跟前:國際足協宣佈皇馬嘅上訴失敗,維持觸犯18歲以下球員的轉會及註冊條例嘅判決。

判決的意味
此番宣佈意味著年頭的制裁將正式執行,皇馬於2017年的兩個轉會窗(包括接下來的冬季轉會窗及下年暑假)將被禁止買球員。同時,需繳付$360,000瑞士法郎罰單(大約27萬磅,佩雷斯表示小意思);及於90日限期內處理好涉及嘅違規問題(即係要送走啲涉事小將)。

2018年前都唔可以買球員,意味著球隊將沿用現有陣容踢1.5個球季。喺呢段期間,年齡同傷患係最大隱憂,士氣同穩定性都係重要因素。

以不變 應萬變
雖然球迷聽到無得買人,可能會感到荒亂。而事實上,現時對皇馬最好嘅選擇應該係一動不如一靜。與巴塞喺2015年時相反,當時沙維、佩奧爾等離隊頓時造成換血空缺、踢法亦由控球至上轉為前場三叉,所以當年巴塞喺轉會窗一口氣買入多名球員,包括今日嘅骨幹蘇亞雷斯和拉傑迪,以完成重組。

但今日嘅皇馬,如早前提到,陣容結構完整、人員儲備充足,因此踢法上不需要劇烈變動。以年齡角度分析,後防方面最老的係一對中堅比比(33)及拉莫斯(30),雖然如此但競技狀態依然保持得好好,而且華拉尼(23)、拿祖(25)大熟大勇隨時補上,因此後防的換代不用過份擔心。

中場三角卡斯美路(24)、郤奧斯(26)與及摩迪(31)缺一不可。幸而三人均有力當打。當中最老嘅摩迪,觀乎其近期表現亦未有歲月的痕跡。惟年長球員最忌傷患,強如籃球黑曼巴高比拜仁亦一傷再傷不復返。所以本季及來年,要小心使用摩迪為妙,畢竟要爭取好成績,關鍵時候絕不能缺少摩迪嘅中場魔法。

前線三叉威力依然係世界頂尖。賓施馬(28)、巴利(27)今明兩年仍處於球員的黃金年齡;縱使C朗拿度已屆31,但憑其近乎瘋狂的職業態度,絕對有能力延長高水平的球員狀態。只要沒有大傷患,預期前場三叉依然可帶領皇馬前進。

後備決定一切
深厚而高質素嘅班底保證球隊有足夠實力應付突如其來嘅傷患,及迎合唔同嘅戰術需要。上文提到後防後備中堅已大熟大勇,其中華拉尼其實早有擔任正選實力。丹尼路上季放題,但聽聞今夏已痛定思痛,加上有干查奧回歸,會係球隊喺今明兩年內一個好好嘅補充。

至於皇馬中、前場嘅後備力量實在令人羨慕不已。高華錫(22)、伊斯高(24)、莫拉達(23)、占士(25),雖然年經輕輕,但都有多年擔任正選、征戰大賽嘅經驗。高華鍚當年喺國米復興時就擔起中場發電機的任務;幾年前重係光頭嘅伊斯高則帶領馬拉加喺歐聯過關斬將,表現驚艷;莫拉達於兩年內成為都靈寵兒,並成長為西班牙首席射手;占士更喺世界盃大放異彩。雖然彼此加盟皇馬後,表現有高有低,但實力依然喺度,季初決心留喺皇馬可見其鬥心滿滿。各自特點出眾亦可增加調度戰術嘅靈活性。只要佢地能把握上陣機會,筆者相信,今明兩季佢地對皇馬嘅戰績決定性將更加重要。

青訓準備就緒
一整年被禁止買入球員,相對地亦創造一個更好嘅機會比青訓球員試練。除左一班後備球員,陣容背後重有青訓球員等待機會而上,例如阿辛斯奧(20)、馬利安奴(23)。此外奧迪加特(17)重被放入歐聯小組賽25人名單當中。

唔好忘記重有一班有潛質嘅小將被外借出去吸收經驗。好似前鋒蒙耶路今年借左去禾夫斯堡、中場馬高斯羅蘭迪借左去艾拉維斯、後衛華利祖借左去法蘭克福。如果佢地成長幅度好,喺禁令期間依然可以召回補充。

總結
筆者認為,雖然皇馬需要執行禁令,但正正因為咁造就到一個相對穩定嘅環境,比有潛力嘅球員成長。而且,正值正選、後備球員嘅當打之年,將轉會禁令的影響力減到最少。所以,筆者睇法係樂觀的。唔知大家又點睇呢?

註:遺憾嘅係,無得用回購條款買番謝斯了……

小知識 - 點解會比人罰?
國際足協話佢地致力於保護18歲以下球員嘅權利(to protect the rights of players under the age of 18)。為左避免小球員因為太好波而被大球會早早買入,引致年紀輕輕就要遠離家庭護蔭;因此,禁止球會隨便買入或登記18歲以下球員。

只有以下三種情況例外:
1)如果小球員嘅父母因為非足球原因來到此國家
2)如果小球員年滿16-18歲,並來自歐盟或歐洲經濟區國家(例如挪威)
3)如果小球員住喺相距球會100公里嘅地方

國際足協嘅調查指出,皇馬喺2005-2014年間違反以上情況,所以被罰。


ref: http://www.mirror.co.uk/sport/football/news/real-madrid-atletico-madrid-fail-8795062
標籤: 皇馬  real madrid  

留言


請按此登錄後留言。未成為會員? 立即註冊
    快捷鍵:←
    快捷鍵:→