拿祖不為人知的秘密

現年26歲的拿祖費南迪斯,係近年皇馬青訓出產的其中一位最佳後防球員。最近馬卡報刊出一篇文章,透露出一個鮮為人知的秘密,令人不禁對拿祖投以更多敬意:原來自12歲起,拿祖就一直與糖尿病對抗,從不間斷。

糖尿病係一種代謝性疾病,特徵係患者的血糖長期高於標準值。血糖高會令患者容易吃多、飲多、尿多、體重減輕。糖尿病患者需要嚴格遵守均衡飲食、維持體重、控制血壓和腳部護理,否則嚴重的會引起許多併發症。

「好多人唔知道我有糖尿病」拿祖講到。
「我唔係有意去保守呢個秘密,但我多數只會喺探望醫院的病童時先會分享」
「自12歲起我就患上糖尿病,但咁樣無問題,因為我對此非常小心」
「如果作為足球員,你需要照顧好自己;咁作為一位糖尿病患者,意味住你要用多三倍的心力去照顧好自己」
「我只係一個普通人」
「佢係一個真實存在的病,但我會做正確的事去應付病況,而我無時無刻都會嘗試去照顧好自己」

生於1990年1月18日的拿祖,於11歲時加盟皇馬青年軍。縱使一年後被診斷出患有糖尿病,但正因為拿祖付出額外心機去調理自己的飲食習慣和做好準備,因此自加盟青年軍而來,拿祖從未因重大傷病而缺陣過。

自2011年4月23日首次替皇馬一隊披甲以來,拿祖一直努力為出場機會拚盡全力。長久以來,球迷習慣了一對世界級中堅搭檔拉莫斯和比比,亦期待住華拉尼的無限潛能;相對而言,拿祖始終擔任住通天老倌、後備守將的角色。對於自己的上陣時間,原來自己內心都有掙扎過:

「就算我無法上陣,我都係一個能夠保持冷靜的人」
「當你去到一個年紀,而你無法經常上陣,自然地就會有千幾樣野喺你腦海中出現;」
「咁係好困難嘅局面,但我會保持安靜,並且努力工作」

過去上陣雖然多數後備入替,但每分每秒,拿祖都全情投入於當中。今季適逢正選中堅搭檔拉莫斯和比比相繼受傷,拿祖臨危受命正選上陣,不負眾望交出可靠表現。對於隊內長期的競爭,拿祖於另一個訪問中就有好正面嘅回應:

「我好多年前就已經講過同佢地(拉莫斯、比比、華拉尼)競爭唔係一件容易嘅事,由其係你來自青年軍」
「但身處佢地隔離令我變成一個更好的球員」
「我從佢地身上學到好多,心理上我變得更強,因為我知道我正在與最佳的球員競爭」
「呢種經驗係殘酷的,競爭係如此的激烈,我為此作出了好大的付出」

努力不懈的鍛鍊為拿祖換來更多的皇馬上陣機會,亦帶來西班牙國家隊的召喚,於本週末代表西班牙征戰世界盃外圍賽對陣馬其頓和友賽英格蘭。憑藉出色的表現,拿祖於夏季時曾受意甲羅馬邀請加盟,但拿祖最終決定留守。因為對拿祖而言:

「無人可以質疑我對皇馬的付出,我為皇馬而生存」

無論於球會當中,還是人生的旅途上,拿祖都有如披荊斬棘一樣克服住重重難關。佢未必係能力最強的一位,但絕對係其中一位努力嘅天才。皇馬精神,不就是這樣嗎?


REF: Nacho opens up on struggles with diabetics
http://www.marca.com/en/football/real-madrid/2016/11/10/582478e4e2704ec67d8b45fe.html

REF: Nacho: No one can doubt my dedication to Real Madrid
http://www.marca.com/en/football/real-madrid/2016/11/10/58246757e2704e2a678b460f.html

REF: Wikipedia: Diabetics Mellitus
https://en.wikipedia.org/wiki/Diabetes_mellitus


標籤: 皇馬  拿祖  nacho  real madrid  

留言


請按此登錄後留言。未成為會員? 立即註冊
    快捷鍵:←
    快捷鍵:→