【堅定流呀】隨著艾利臣加盟，利物浦有望重啟費基亞既談判

仲記得係世界盃開始之前，費基亞同利物浦嘅轉會傳得鬧哄哄，但係最終因為係轉會費上面有出入，而令到呢一單轉會失敗收場，而里昂方面仲係官方發表聲明話費基亞唔會離隊，仲會繼續留效。但係最新嘅消息係隨著巴西門將艾利臣嘅加盟，紅軍有機會重啟同費基亞嘅談判，而費基亞亦跟隨咗法國隊奪得世界盃冠軍，因此宜家都係一個合適嘅時機俾佢自己考慮一下自己嘅未來。利物浦領隊高普就好希望可以將呢位法國球員帶到晏菲路，以接替古天奴留下嘅空缺，而同時間亦傳出張伯倫提早收咧嘅消息，利物浦再一次出手求購費基亞亦有可能成真。
講返張伯倫先啦，高普本人亦都證實咗呢個消息，就係張伯倫將會缺席下季整季嘅賽事，呢位球員係四月份對陣羅馬嘅歐聯比賽中受傷，而此之後佢一直都未有再代表紅軍上陣過。小編覺得比較可惜係個期張伯倫嘅狀態其實唔錯，宜家養傷之後又需要一大段時間先可以搵得返比賽狀態。消息就話，當時張伯倫唔想講自己受重傷嘅消息係因為唔想影響到利物浦踢歐聯決賽，高普就覺得宜家係一個合適公佈嘅時候，所以先會選擇公開呢個消息。講返轉會，艾利臣已經乘坐一架私人飛機去馬英格蘭，佢亦都會係未來幾日完成體測，消息就話佢嘅轉會費高達6700萬英鎊，佢將會同利物浦簽一份5年合約。呢一單轉會係利物浦嘅第四筆收購，之前已經有基達﹑法賓奴同沙基利嘅加盟，而有無可能仲有第五筆簽約呢？ 根據消息人士透露利物浦已經重新探討收購費基亞嘅可能性，先前利物浦為呢位法國進攻球員報咗上5300萬英鎊嘅報價，但係係體檢之後紅軍發現費基亞有一些膝傷舊患，所以佢地係最後一刻叫停咗呢單轉會。但係高普並無完全對費基亞失去興趣，所以呢一個星期利物浦會嘗試再次同里昂坐低傾傾。小編就覺得費基亞轉會嘅成數唔大，因為里昂個邊都發出咗官方聲明，而沙基利亦都嚟咗成為左前場嘅一個補充，係艾利臣嘅收購上面，紅軍亦都用咗極多嘅轉會費，換言之利物浦可能無足夠嘅財力去完成呢一筆簽約，但係呢個亦都取決於球員本身嘅意願，相信未來幾日好快就知道最後會出現咩結果。你地又想唔想見到費基亞加盟呢？小編就斷估，買佢返嚟唔會係用嚟掃蕩同搞下氣氛嘅，係真係有用咖﹗