【劫富濟貧系列】利物浦2:3史雲斯 精選

對住榜尾，小妹應該用咩心態去期待呢場波？睇開利物浦嘅朋友應該知道，希望越大、失望越大呢個道理。
睇返史雲斯可能因輸左俾阿仙奴同足總侯城嘅教訓，佢地將條防守縮到好後，而無左文尼嘅利物浦上半場更僅得6次射門仲要0 中。

先講下呢5個入波，
48分鐘，角球開出，第一下爭頂失敗，路夫蘭同軒達臣撞埋一齊，魯迪治頂返入去禁區再撞費蘭度羅蘭迪，費蘭度羅蘭迪加多腳射入。 0：1
52分鐘，湯馬士卡路爾係左路一個靚出波俾費蘭度羅蘭迪頂入。 0：2
55分鐘，隔左3個鐘之後，占士米拿係左邊右腳球遠處波，費明奴頂入，老實少少，佢又有推開人再頂嘅嫌疑嘅… 1：2
68分鐘，韋拿度姆避過兩個防守球員出到個波俾費明奴，費明奴心口一控，前面有2個後衛迫住都搵到空位起腳，左腳射左邊入波。 2：2
74分鐘，湯馬士卡路爾橫傳，佳尼失位，走漏左施達臣，施達臣係無人壓迫嘅情況下入波。呢個係邊個嘅責任相信大家都好清楚。2：3
片請去隔離post睇：here

主場對住史雲斯，上半場被守和。控球指數係高呀，但無乜埋門囉。下半場，進更機會多左，但係你攻得都要守得，即係咁，大家都知後防問題架啦，但今場將所有問題一次過完美地100％咁曝露出黎， 高空波、制空能力低，走漏位，後衛間嘅誤會等等。卡拉雲不必要嘅犯規、無補位；路夫蘭醫院波；佳尼走漏位…親愛嘅高普，買個閘啦，占士米拿真係part time 黎架咋…

奧歷治今場踢得真係唔好， 走位唔能夠幫隊友拉空後防，有高度又頂唔到波，腳下功夫未夠好，一急就亂咁黎。而鑑於古天奴個態麻麻，所以高普都換左佢出場，換入嘅史杜列治就無波到腳，前場真係踢一個費明奴加拉蘭拿。拉蘭拿係可以踢返生個波，但都要有人配合架！輸中路制空力不足， 今場利物浦頂失真係好多球。到補時階段，高普換左馬迪普出黎，個勢就似想出有高度嘅球員上前頂，可惜已經太遲了。 反映無左文尼下，對住901球隊完全做唔到突破，利物浦破鐵桶陣要夠快、有突破能力，但無左佢，無人做到拉空同帶領快速反擊。其實都講過好多次，利物浦變陣能力底，或者只能變得差左。睇返今場路夫蘭都上都幾前去射波或者出波，但問題係佢做呢樣工作都麻麻， 39分鐘路夫蘭25碼起腳亂射， 都算係令到沉悶嘅上半場加添一個笑話嘅。
史雲斯6射3中，3球都入晒。相反利物浦呢？真係不要再說了。 右邊球員係 上半場好多球出波都無睇到球場上有咩人，有幾球明明占士米拿呀、古天奴都空晒無人睇，但係都出左去俾幾個人迫住嘅球員度。今日個個都踢到個人足球咁，完全無form，特別係輸左之後，好亂。
慣架啦，劫富濟貧呀嘛。對曼聯就1:1和到人地，對榜尾就俾人入到3球，即係唔係你做唔到，而係你唔盡力去做啦？定係真係宿命？定係點？有無人話到俾小妹聽，小妹都已經灰到語無倫次，或者唔知邊個講得岩，有啲野，習慣就好。再睇下鏡頭pan落球迷度，個樣就好似你要靜候，再靜候就算失收始終要守。