【迫都無用架】馬迪普心繫利物浦 精選

首先要恭喜JW首《矛盾一生》拎咗十大中文金曲嘅其中一首，正所謂矛盾只因深愛著你知嗎？誰期望這刻擁抱完 然後吵架…小妹表示深感明白，話說，利物浦係和左新特蘭之後，比打少一場嘅車路士少5分，俾人lead住一定係比較被動，小妹只係同車迷講咗句，車路士如果今晚輸俾熱刺就好啦…點知佢真係嬲咗小妹！

顧完車迷，仲要顧埋一月，又係非洲國家盃嘅開始。

之前都講過，利物浦兩位主將文尼同馬迪普分別所屬嘅塞內加爾及喀麥隆國家隊都係要踢非洲國家盃，而文尼就表示願意去為國爭光，反而岩岩腳眼傷癒嘅馬迪普就唔多想喎。 根據FIFA條例，如果球員要為國家隊上陣，球會一定要放人（有啲似陪審團個制度）。好啦其實都唔關利物浦事嘅，馬迪普因為唔想妥協，已經無踢國家隊成年有多，即係話係史路克04果陣已經無為喀麥隆上陣，直至岩岩九月果陣佢都對外界表示佢唔希望同被考慮入選國家隊名單。儘管如此，喀麥隆依然希望馬迪普可以係非洲國家盃上陣，可惜神女有心襄王無夢，馬迪普依然係無意欲為返非洲踢波。你軟嘅唔受咪唯有硬囉，Hugo Broos就話如果佢再唔歸隊跟操呢就會同FIFA投訴，如果證明到利物浦有俾壓力去影響球員，就會向球隊同球員作出懲罰，重則會要馬迪普係英超停賽。利物浦方面就話佢地好尊重馬迪普嘅意願，唔會左右佢踢定唔踢國家隊嘅決擇。小妹都相信唔關事嘅，家陣馬迪普都成年人啦識諗架啦，你估而家利物浦派下餅仔俾佢就可以改變到佢諗法咩？小妹想問FIFA點樣判斷馬迪普係咪真心唔想踢國家隊先，係咪要宣誓呀？（小妹個比喻好似有啲錯，而家唔係講緊選舉…but whatever）
要睇返其實馬迪普由細都係德國長大生活，雖然之前都有代表過喀麥隆國家隊，但有時候唔夾就係唔夾，呀Broos你又何必強迫佢呢？係佢轉會去利物浦果陣，亦都同利物浦講咗佢唔會再踢國家隊（retired from internation)。當然，佢唔去踢非洲國家盃對利物浦後防黎講係一個喜訊，相信呢樣野都唔洗多解釋，一、二月利物浦仲要對史雲斯、侯城等「硬仗」（其實仲有曼聯、車仔，熱刺）架。
都係度講下點解球會一向都唔鐘意球員去踢國際賽呢？因為球隊擔心球員體能上嘅問題啦，踢多咗比賽即係少咗時間休息，（唔只係踢波果種攰，仲有時差、坐飛機等生理上嘅攰呢！）一個唔小心，兩邊都踢得差就真係…另外，踢國家隊果陣受傷，球會就係承擔後果果個。最緊要係咩呀？球會係出糧果個呀！即係小妹老細keep住出糧俾小妹，小妹就走去幫香港做義工，你估我老細會唔會咁戇居呀？

係球員嘅心態上，踢球會會更易得到球迷嘅注意，而習慣咗踢開嘅隊友同打法就唔想再適應另一隊，會好亂架嘛。而往往踢國家隊果陣，教練都有機會將球員用係一個佢地係球會好少會踢嘅位置，呢個舉動都會令球員踢唔踢國家隊時卻步。

當然，你踢國家隊就可以為國爭光、同唔同國家嘅球員較量下，從而增廣見聞，話唔定仲會一踢成名，成為各大球會嘅羅致目標！打到呢度，小妹覺得都係唔好再講，因為面試緊去exchange咁…題外話，西布朗嘅喀麥隆藉阿倫尼安都拒絕去踢國家隊架…咁啦都公平啲講，馬迪普唔返去踢國家隊都會變左一個壞榜樣，領隊嘅威嚴又會被受挑戰，對隊波嘅士氣有一定影響。但呀broos你明知佢地無心踢，一早講明唔好搵佢地，你仲要咁厚面皮將佢地列入大軍當中…有啲野，雙向嘅。