【輸波心理學術討論】當你心儀既男仔係車迷…(2)

利永遠不會毒行 於 25/09/2016 發表 收藏文章
利申:呢篇文係講阿記車仔場波而唔係講利物浦


有追開post都知道小妹心儀既男仔係車迷,睇到車仔輸波,本身想whatsapp安慰下佢,點知小妹用詞不恰當(定小妹唔知男仔點諗) …

成個故事是咁的…
小妹:「車仔輸左喎,唔好唔開心啦…」

男:「垃圾!」

小妹:「咁阿仙奴真係踢得好嘛,你睇下人地跑得又快,啲欄截。而今日阿記條後防又特別醒神,返位返得好快,條防線出奇地集中,你睇車仔猜極都入唔到禁區。而你地條後防就相反,又慢又唔去迫人…山齊士之後兩分鐘再由禾確特入波,係士氣上面一定會有好大既打擊啦。」

男:「真係睇到燥,就好似睇住早場曼聯四分鐘贏李斯特城三球咁。」

小妹:「 其實車仔又唔係真係咁差,係醫院波多啲姐,成日都傳左俾人,後衛解圍又拖泥帶水,Cahill真係好多好多失誤導致失波,上場對完利物浦都無進步。其實干地係咪唔應該再俾機會佢呢?」

男:「_!直頭應該唔好出啦。」

小妹:「總括而言車仔真係太慢啦。 而且制空能力又無阿仙奴咁勁,雖然車仔有柏度都叫快,但比利連實係超快,比比鳥慢佢2-3個身位都從後追到截到個攻勢,咁屈機真係無計架喎。」
小妹:「下半場車仔都多左好多攻勢呀,但無奈finishing比較差,又或者係施治太有經驗守到姐。Costa又俾人封死哂…」

男:「 干地一開始仲識指手劃腳,場邊嗌住指揮調動,踢到一半,佢無再郁,只係繞埋雙手,靜靜地係度睇。同我既心情一樣,我等緊大反轉出現架嘛,點知而家想破阿記蛋就要等下一循環。」

小妹:「不過都好呀,呢場當俾你地試陣,打三中堅,都叫有得著呀!仲有呀,你知道波係圓架嘛,有時機會呢家野係講運,你睇Ozil撻Q都入波就知啦。所以輸波好小事姐。」

男:「其實季初輸波唔係問題,問題係而家既車仔踢得好散,無戰術,輸左第一球之後就怯,基本功都打唔好,仲講咩贏波?但係泰利同埋蘇馬都傷左,而家仲可以出邊個呀?」

小妹:「其實會唔會係干地問題呢?佢要教埋意大利國家隊(打埋歐國盃,七月後)先去做車仔領隊,英超八月中就開波,得果一個月,邊度夠時間去了解球員同埋球隊運作、試陣。」

男:「做好自己,輸人地勁唔緊要;而家係輸自己呀!再慘啲既係,輸兩場自己呀!而呢個亦都係一個雪球效應(Snowball Effect),唔只係呢一場,上場對利物浦,cahill誤傳導致失球;今場都一樣,一個簡單回傳都俾山齊士偷左個波。睇落好似係一個人既錯,但係足球係團體運動,一個人既錯就會影響到成隊波既信心。簡單啲講即係-犯錯之後無信心,無信心之後又有犯錯,個雪球越碌越大…」
男:「係心理學黎講,一個球員無左信心果陣,個腦會自然諗起過往既失誤既片段,從增加壓力。係呢個時候,放大同縮細自己既錯處都係由個腦分泌決定。當一個球員受到外界不斷既評擊,佢就會質疑自己既實力同失去集中,而我認知世界上能夠有永遠罪不在己心理「素質」既超然物種並唔多。你估個個好似某人咩決定都唔關佢事咁厚面皮咩?舉個例子,足球係一個要講求速度,無論係行動上定係個腦,有猶疑就等同失去左一個機會。一個專業既球員,接到球波,就會立刻有判斷-大約係8-10個英文字,話俾自己聽,「呢球我要大力、掃把腳、目標左上方」。然後大腦就會俾指示肌肉如何去郁,一個過份複雜或者過份詳細既指示都會confuse球員既肌肉指令。」

小妹:「我都聽講過如何去令到頹左既球員球隊重拾信心呢?有啲球員會咁諗-你既失誤唔會令到你失敗(呢句小妹諗左3次先明白)。信心就好似肌肉,你操得越多佢就越fit,而你唔操佢,佢就會無左。有一個正能量既心態,就唔會俾情感制造左一道牆去阻住自己改正錯誤同進步,而呢個心態就係要靠身邊既人鼓勵同自己唔好鑽牛角尖做到,所以我岩岩都安慰你叫你唔好氣餒~ 」

男:「你潤我定真係對我咁好呀?不過唔知干地係咪都明白佢既言論對球員既支持好重要,所以係記者訪問度都話唔想特別講/評價cahill,佢咁樣對球員唔公平,因為佢地係一隊波,重視團隊精神。by the way,你係咪睇過果本叫The Secret Footballer’s Guide乜乜乜 既書?點解講啲野同本書咁似?」(男既言論係跟據本書入面心理學家既分析講既)

小妹:「唔係啦,我只係識得用google,咁岩又係搵到呢本書講既野咋。邊有你咁pro刨哂呀?定係你介紹本書俾干地睇?」

其實小妹睇到一個男仔會咁細心去睇同研究一場波,真係好charm。認真做野既男仔真係好吸引!

男:「知你利物浦贏5:1上左第四位好威啦,你最好係我發嬲之前消失!」

小妹:「而家先踢左果6場…」


最後,小妹係被藍剔左,已讀不回。


* 參考: The Secret Footballer’s Guide to the Modern Game: Tips and Tactics from the Ultimate Insider, findings by David Dunning, Professor of Psychology at Cornell University

留言


請按此登錄後留言。未成為會員? 立即註冊
  • theox 於 26/09/2016 評論 NO. 1

    樓上做咩望我女朋友

快捷鍵:←
快捷鍵:→