【除夕隨筆】 2016利物浦最快樂及心痛事各一

利永遠不會毒行 於 31/12/2016 發表 收藏文章
今年,其實橫跨左2015/16季尾同埋2016/17季初到季中。

要嚴選 2016大事回顧,其實係難。因為係小妹心目中,利物浦嘅每一樣野都好重要。贏波、輸波;入到決賽,失落獎盃,呢一年利物浦都試過晒。所以小妹想揀黎講嘅只係兩件事,最快樂及心痛事各一(MUSIC: 你叫我最快樂你也叫我最心痛…)。

講左唔開心先啦,小妹所揀嘅就係五月十八日,歐霸決賽係贏緊一球(史杜列治GOAL)嘅情況下俾對方入返三球,最後輸1:3俾西維爾果場,當時利物浦係有迫和嘅機會-被判咗係越位嘅一球同埋無判到十二碼嘅一球,一切都仲歷歷在目。

下半場被追平之後,球員開始攰,心理質素下降。而現場嘅打氣聲好似mute左咁,球迷突然變得安靜,高普唔鐘意咁。佢相信如果球迷可以繼續嗌出聲、企起身為利物浦打氣,個結果可能會唔同。喇!呢個小妹信!唔知大家仲記唔記得,上年香港旺角主場對中國果場波(好似係世界盃外圍賽),小妹係現場睇住港隊明明實力差幾班都可以和到china,點解呀?主場球迷無間斷為港隊打氣,由未開波嗌到完場後仲嗌緊,賽後,葉鴻輝都話無左球迷嘅打氣,佢地根本踢唔出當時嘅水準。所以,請不要忽視球迷的力量 。

高普都係人,都會唔開心,都會諗當時如果用第二個戰術會更好呢?但佢只係沉溺左一兩星期就震作返,要知道回顧過去係無用,一來浪費時間、二來你無得改變過去,而家唔係拍Dr. Strange或者你的名字,過左去就過左去,佢只能夠係未來唔再犯同一樣嘅錯,令到歷史不斷重演。

講完唔開心,講下開心野啦。
其實開心野就唔係一場比賽黎,而係利物浦終於踢到屬於自己嘅form,終於係球員跟個戰術踢而唔係用戰術去就個球員踢法,係咪有啲難明?同樣道理即係人著衫唔係衫著人咁解。

高壓搶迫,地面快速傳波等戰術都令到利物浦係今季坐左係榜首一段時間。雖然高普仲未有變陣嘅plan B,亦唔係踢緊啲咩華麗足球,但係我地睇到嘅係,佢地著重青訓,去培訓球員邪唔係靠用錢去買星令到球員更加適合習慣去踢利物浦/高普足球。利物浦係組織方面係好左好多,每位球員都知道自己要做咩,文尼、古天奴、費明奴呢三寶更加係高普前場最成功嘅撮合,加上拉蘭拿係中場嘅拉空等協助利物浦有一條強勁嘅進攻線。而後防方面,高普成功令占士米拿轉型為閘,解決左閘空缺嘅問題,再利用佳尼呢隻右閘去做防守外,派佢上前場配合文尼出下波呀咁,隊長軒達臣則留係中場做指揮,做波分波,個位置同責任係清楚嘅。
最緊要係咩?係球員都好愛高普,高普都好愛球員。當球員相信領隊,就會擺個心出黎踢波,一切都會想為球隊利益為先,唔會被個人主義影響。而家嘅利物浦係一隊熱血足球,有感染力嘅球隊,雖然,佢地間唔中都會_(數目字,諗唔到第二個字去代替),但係佢地都可以係短時間內調整心情,再接再厲。即係咁,小妹而家睇利物浦踢波依然要㩒平安鐘,但起碼㩒得少左先呀…

2016年就快過,多謝大家係呢幾個月嘅支持,你地每一個view都係小妹繼續唔要面寫落去嘅原因,同時,小妹都想同大家講聲對唔住,因為小妹大頭蝦,係過去嘅文章入面,都有好多字體上、甚至資料上嘅(嚴重)錯漏,係新嘅一年,小妹應承如果仲會睇呢個專欄嘅你,2017年我一定會更加小心,做多啲資料搜集先再寫文,希望各位繼續支持。


留言


請按此登錄後留言。未成為會員? 立即註冊
  • joesiu 於 31/12/2016 評論 NO. 1

    阿妹繼續努力寫好文和改善錯別字,包括呢篇
    2017繼續支持

  • Ksl 於 31/12/2016 評論 NO. 2

    加油

  • Lawrence Mok 於 31/12/2016 評論 NO. 3

    就係有錯別字先有小妹你既親切感,請繼續做自己!(希望你同車迷更進一步啦)

  • TTYNWA 於 31/12/2016 評論 NO. 4

    繼續支持!新年快樂!

  • Jason Alexander 於 31/12/2016 評論 NO. 5

    add oil

  • Sparta0018 於 31/12/2016 評論 NO. 6

    2016/17英超冠軍:利物浦

快捷鍵:←
快捷鍵:→