【進擊の中前場】曼聯對利物浦

利永遠不會毒行 於 15/01/2017 發表 收藏文章
又係「雙紅會」,大戰當前,小妹既興奮又緊張。點解?無得解喎。
睇返曼聯近況,最近5場英超都係贏波, 而係聯賽盃同足總盃都零封對手,雖然對嘅都係中下游球隊,但一定令到佢地士氣大增。而作客奧脫福嘅利物浦就四勝一和,贏過曼城,但和左新特蘭,加上最近聯賽盃首回合落後修咸頓一球,個勢又真係差左啲嘅。

不過唔緊要,過去就係過去,無得改變。
小妹會期待中前場利物浦同曼聯嘅較量,大家都有有創造力同埋用腦嘅球員。先講馬達,佢嘅把握能力出名高,係對阿仙奴同韋斯咸嘅埋門都睇得出佢腳法幾好。不過,馬達係聯賽多數踢後備,點都好,要小心呢個男人。利物浦成隊普遍黎講都算快,所以阻到佢入禁區範圍就應該無咩事,好似係。

除左馬達之外,普巴都係另一個要防犯嘅男人。睇返數據,佢27次射門有8次中龍,但留意返,佢有好多球中柱中眉,而且佢有身體質素,亦會識得返後幫手,減輕卡域克嘅防守工作。估計今場多數佢加卡域克再加靴里拉係中場線啦。講時講,有身位又衝得嘅普巴,利物浦除左卡拉雲之外,小妹真係諗唔到仲有邊個可以同佢撞。
而我利中場都有韋拿度姆係度頂住,雖然佢有時會發下癲企定定唔迎波,但係佢醒醒定定嘅話,對住曼聯嘅後防應該問題不大(人地都會有卡域克派下膠呀)。

利物浦中場線當然唔少得拉蘭拿,佢就會係進攻重要人物,要知道佢17次射門8次中龍,留意返,佢嘅食糊位亦都係偏左近12碼位。而佢亦都好識睇時間攝入去禁區拉走幾件出返個波去禁區頂之類,機會主義者呀!講開拉蘭拿,點可以唔講埋古天奴復出英超,古天奴、拉蘭拿同費明奴嘅配合將會係入唔入到波嘅大重點。
lalala係成個組合中嘅催化劑、引到對方失位,而古天奴係引導對方包夾同埋遠程炮,費明奴係佢地幫助下成為迫搶核心。留意返,其實仲有個需要你在的時候卻不在嘅文尼,不過由於佢為國家服務緊,小妹暫且唔講佢啦(利物浦隊中未有一個可以頂替到文尼工作嘅球員),但小妹最想睇係中前場無波在腳嘅球員點樣走位同拉空同隊友配合製造機會,應該兩隊都會重視呢一點卦...

跟據上次雙紅會經驗,摩佬好大機會都會玩泊大巴(或者偏守),雖然近期曼聯好似都aggressive左,唔知係咪因為要搶分呢? 不過講真嘅,曼聯個人腳點玩都得,而且個個都有態,摩佬可以出嘅陣變化好大。睇返打4-3-3嘅曼聯正前嘅高佬伊巴(上場因病缺陣對候城)今場應該出得返,而左邊可以揀馬馬迪爾/羅斯福/連加特,右邊仲有米恩同馬達,中間有月巴同揀... 喂,點估先? 個組合機會率可以拎去做maths probability試題呀!曼聯更可以唔同你玩戰術,只係搵堆跑得撞得破壞中場,利物浦都頭痕...

相反,我利就…軒達臣同馬迪普仲係“doubtful”,而文尼就去左非洲國家盃,古天奴岩岩傷癒,係輸蝕左啲架啦,如無意外摩佬估到晒高普可以點玩,底牌俾人知左囉。雖然有咁多不利因素存在(又作客又傷又非國),都係果句啦,咁又點喎,新特蘭都和到利物浦啦!

留言


請按此登錄後留言。未成為會員? 立即註冊
快捷鍵:←
快捷鍵:→