【請不要消失希望】簡單分析利物浦十一月份賽事 文字

「愛之深,責之切」,相信都幾適合用嚟形容紅軍忠實球迷現時嘅態度,球隊今季喺攻守方面有咩問題,相信大家都聽唔少、睇唔少,D_ _唔少,暫時唔再多作討論,我哋見到嘅嘢,高普高Daddy都一定見到,之後就睇佢嘅應變做成點嘞。

雖然球隊喺今季經歷咗好多挫敗(包括大敗俾曼城同熱刺),亦都出現過好多負面消息(古仔蘊釀離隊以至最近路夫蘭事件),球迷們(包括利迷與非利迷)對利物浦普遍都係彈多過讚,利迷們亦係畀人笑多過自己笑,不過睇番個聯賽榜,其實又唔係真係咁差者,經過10輪賽事之後,紅軍仍然排喺第6位,同歐聯席位只係相差3分。
當然呢個成績算唔算合格,都要視乎每位球迷心目中,對紅軍嘅期望到底set得有幾高,對小編嚟講,上季嘅目標係前四,今季亦都係一樣,要知道球隊今季喺常規正選陣容上,幾乎係無增強過任何兵力,大部份新兵都只能夠坐後備席,唯獨是一個沙拿可以搶到個正選席位,單係呢一點就已經被曼市雙雄比下去,唔少領隊都曾經講過,依家英超嘅競爭環境,要保住前四,只會係一年比一年艱難,假如紅軍今季最終仍然能夠保住前四,其實並非停滯不前、並非不思進取,考慮到球隊今季需要肩負埋歐聯嘅賽事,若然能夠力保前四,經已係一種進步。
紅軍今季英超頭10周戰果

對手 (*現時排名) 主/客 比數
屈福特 (8) 客 和 3-3
水晶宮 (20) 主 勝 1-0
阿仙奴 (5) 主 勝 4-0
曼城 (1) 客 負 0-5
般尼 (7) 主 和 1-1
李斯特城 (11) 客 勝 3-2
紐卡素 (9) 客 和 1-1
曼聯 (2) 主 和 0-0
熱刺 (3) 客 負 1-4
哈特斯菲 (13) 主 勝 3-0

紅軍11月份英超賽程

日期 主/客 對手 (*現時排名)
04/11 (六) 客 韋斯咸 (16)
18/11 (六) 主 修咸頓 (10)
25/11 (六) 主 車路士 (4)
29/11 (三) 客 史篤城 (14)
*球隊排名截至第10周比賽後

其實如果再仔細睇番紅軍頭10周對手目前嘅排名,或者都會對球隊今季嘅前景有番啲希望都未定,頭10場比賽,利物浦取得4勝4和2負,2場輸波,分別輸俾目前排第1位(曼城)同第3位(熱刺)嘅球隊,而且兩場都係作客,撇開大敗唔講,其實亦唔係啲咩不能接受嘅結果,4場和波,分別喺主場和曼聯(第2位)同般尼(第7位)、作客和屈福特(第8位)同紐卡素(第9位),加上利物浦亦都已經喺主場贏過依家排第5位嘅阿仙奴,亦即係話,紅軍喺淨低嘅9場首循環賽事入面,只係得番第4位嘅車路士,同埋第10位嘅修咸頓呢兩支處於上半版嘅球隊未曾對壘,其餘7場都係牌面上相對輕鬆嘅賽事。
目前紅軍對下半版球隊嘅成績係3戰全勝(李斯特城、哈特斯菲、水晶宮),相信只要喺呢7場賽事入面,紅軍能夠有正常發揮,搣甩「海鮮波」、「羅賓漢」呢啲名銜 (平心而論,今季又唔係真係咁海鮮者,失分都係失畀上半版季初有狀態嘅球隊),加上嚟緊11月份對車路士同修咸頓嘅比賽都係喺主場進行 (目前紅軍主場3勝2和,加埋只失過1球波),小編對於球隊喺聖誕節完成首循環賽事果陣,紅軍嘅排名可以比現時嘅第6位有明顯嘅提升,依然係抱有相當嘅信心,希望大家都一樣,唔好咁易放棄呀!

留言

會員
我要評論
請按此登錄後留言。未成為會員? 立即註冊
  • wombat
    wombat 於 01/11/2017 評論 NO. 1

    樂觀係好嘅....
    我就冇咁樂觀,唔係因為輸贏得分問題,係成隊波都冇隊形、冇組織。 好似踢街波咁一味向前衝。
    上季盲拳打死老師傅(強隊),今季就露底啦。
    最弊嘅都仲係高普反應遲緩,每次賽中賽後都做唔到反應或修正,呢樣先驚。

  • Paco Chan
    Paco Chan 於 03/11/2017 評論 NO. 2

    請不要灰心,你也會有人妒忌。

  • Kelvin Lam
    Kelvin Lam 於 04/11/2017 評論 NO. 3

    其餘7場都係牌面上相對輕鬆嘅賽事
    利記出名遇廢愈廢 海鮮波

快捷鍵:←
快捷鍵:→