【視障球迷】同健視嘅人無隔膜咁傾計,就只有足球先做到!

睇呢篇文之前,利申一下先,小妹有份參與呢集嘅製作(唔係廣告啦,賣咗都無錢收嘅)。真係有意義嘅野咪同大家分享下囉。

視障人士(有啲可能係弱視嘅朋友,咁佢哋仲睇得到野,只係好似大近視咁姐;有啲就真係全失明) 係點樣睇波架呢?係做呢個節目之前,小妹都唔知,或者應該咁講,係無諗過呢樣野。當接觸到呢個題目,要真係去拍隻故仔出黎果陣,有好多疑問會係個腦入面:如果係不幸先天失明嘅人士,佢哋腦海中個足球世界又係點架呢,球場同球員、足球同比賽,佢哋又係點理解架呢?
(nowsports/viutv 截圖)

到真係去同視障人士接觸,先發現原來好多嘢,都只不過係我哋健視嘅人嘅assumption,係咪因為隻眼睇唔到波,就唔可以享受足球帶黎嘅樂趣呢?係呢個節目入面都有所解答。

由當年阿叔年代只係得聲嘅收音機講波,到而家有畫面又有聲嘅評述員講波,無可否認係一種時代進步嘅改變;好似以前無畫面睇,咪要靠講波佬「跟波」跟得貼,先會了解到場波發生緊咩事。相反,而家有晒畫面,好多時真係「睇」仲快過你講,好明顯嘅,觀眾嘅要求唔同咗。但係對於視障人士佢哋真係靠條聲去睇波,呢個評述嘅改變好明顯對佢哋享受/睇場波會有影響。咁有一班社工朋友本身自己都睇開波,發現大家都有共同興趣,所以間唔中會搞下睇波活動,係必要時可以另加解釋俾班視障人士聽,等佢哋可以更清楚場波講咩。
(nowsports/viutv 截圖)

始終,會睇波嘅人多數係健視人士,所以足球評述員都無可能滿足到視障人士嘅需要。而呢個節目最想帶俾大家嘅message都唔係講波佬應該點講波,老老竇竇,小妹都無資格去俾意見。波,小妹係識睇,但你要講到分析呀即時評述呢方面喎,係嘅無咩事我收收皮先。

講咁大篇引言,其實都係想講,無論係先天定後天失明嘅朋友,佢哋對足球嘅熱誠係唔會比起我哋每一個睇到野嘅人低。試諗下,佢哋都會凌晨起身「睇」波;佢哋都會俾錢裝官方收費電視去「睇」波,甚至佢哋仲有一個whatsapp group去傾波經。off camera 後,一大班波友都會同有份參與拍攝嘅評述員陳葦如傾波經,如果只係聽聲聽內容,班視障球迷同一般人基本上係無分別。
(nowsports/viutv 截圖)

同佢哋做訪問果陣,有啲比較資深嘅視障球迷對足球嘅認識同歷史都記得非常清楚,你問佢最有印象/深刻係邊屆世界盃,佢哋真係答到你邊年邊場邊個入波;唔講歷史講而家,佢哋又會同你講,阿仙奴今年呢…真係強差人意啦。佢哋對足球嘅熱誠真係非常非常之大,大到一個點佢哋會為咗感受現場氣氛,入場去睇本地波,雖然呢啲活動真係需要好多義工/社工幫手先可以成事,但係都足以表現到足球對佢哋嘅重要性。

節目其中一個環節係由陳葦如同一班視障朋友一齊睇利物浦對愛華頓直播(唔係小妹偏心呀,係咁岩早場咋),隨住現場球迷嘅聲音加上評述員嘅描述,佢哋都會睇得好入神。

小妹好鐘意節目結尾,由阿賓講出嘅一句說話,意思大概係-「可以同你哋班睇到嘢嘅人無隔膜咁傾計,就只有足球先做到」。到底足球對佢哋有幾重要呢,係鏡頭後,佢同製作組都話,由細細個聽收音機評述員講波開始,足球係佢生命入面係無野取代得到。
(nowsports/viutv 截圖)

因為節目時間所限,有好多野都未必可以係短短5分鐘度呈現係觀眾面前,當然可能係製作上小妹未夠班啦,但好希望可以講到一樣野俾大家聽,一個小妹嘅小小得著…

足球真係一種世界語言。

好,有興趣睇下嘅朋友就㩒入去睇啦。
《你我他的世界盃》


【世界盃 ng sick ball 街訪 — 第二集】

留言

會員
我要評論
請按此登錄後留言。未成為會員? 立即註冊
  • Sparta0018
    Sparta0018 於 26/04/2018 評論 NO. 1

    比個“ 讚 “你

  • D...Agger
    D...Agger 於 26/04/2018 評論 NO. 2

    謝謝你!

  • Fan Lau
    Fan Lau 於 26/04/2018 評論 NO. 3

    分享足球的樂趣給所有人,很有意義

快捷鍵:←
快捷鍵:→