【英格蘭U17英雄】利物浦小將布斯達 文字

利物浦嘅布斯達(Rhian Brewster)係英格蘭U17國家隊表現非常特出,係U17世界盃對巴西嘅四強賽事入面上演帽子戲法,成為英雄之餘,更以7球入波,暫為射手榜中第一名!

呢名17歲嘅前鋒係咪真係咁神呢?我哋即刻睇睇片:
對住利物浦嘅球員,真係唔好過份吹奏。佢又未算世界級,睇返對手雖然係巴西,但係賽力並唔係太強。好多時布斯達係1 on 1 時好易甩波,但係位置感優越,把握力唔錯,係可造之才。

英格蘭教練Dan Seymour指出年輕時(14/15歲)嘅布斯達已經好優秀。佢出色嘅球技令到無人可以係佢腳下搶到個波,佢一心只係想要波,好集中。見到一個咁突出嘅球員,佢當然要搵佢家長傾下計啦,但係同一般家長心態一樣,佢老豆心諗,今次個仔應該有麻煩/做錯事先會見家長啦。所以布斯達爸爸第一句就問教練:「我個仔做錯咗啲咩?」
「布斯達係一個好謙虛嘅球員,唔會吹奏自己。或者呢個亦係咁多年黎點解佢屋企人一直都唔知布斯達球技有幾好嘅原因。」

布斯達係14歲前都係車路士青訓,但之後佢決定離開倫敦,搬去默西賽德都市郡,加盟利物浦青訓。嘩!棄車投利呀! 

「呢個係布斯達自己嘅決定。」

「佢係車路士開始踢得唔開心,見到麥伊治蘭係車路士有好好嘅表現,但最後都被賣走,成為唔到車路士一隊球員,佢開始意識到一啲野。」

「佢唔想浪費時間,當時嘅佢認為留係車路士青訓條路唔岩佢走。」
「布斯達屋企人係忠實利物浦球迷,我相信呢個因素同佢決定去利物浦嘅決定有好大關係,加上利物浦青訓大佬Michael Beale 係前車路士青訓嘅教練,係倫敦果陣一直好支持以及睇好布達斯,種種外圍原因加上利物浦青訓俾到布斯達希望。布斯達由車路士青訓轉到利物浦青訓成件事就成立咗啦。」
(今次呢個故事我哋學到: 假如有兒女,要從少教導佢哋鐘意利物浦。)

呢個細路好成熟,正所謂「條路自己揀,仆街唔好喊」,對於一個14歲細路,要離開自己成長地,離開自己熟悉嘅朋友,真係唔易架。

高普係四月曾經講過唔想借走布達斯,係今場國家賽後,佢表示留意咗布達斯一年有多,佢成長咗好多。

「佢體能上有進步,球技出眾,係一個真前鋒。佢finishing做得好,有球品。」

「如果所有一隊球員都有態,佢就唔會上到黎。好明顯啦,點解佢要上先?佢只係17歲但已經踢緊U23,係下年佢都會繼續踢U23,呢個係一個非常好嘅踏腳石去一隊,或者另一個職業階段。」
「上場佢係後備名單因為佢嘅表現值得我係適當嘅時候用佢。」

「我都知而家唔係一個正確嘅時機擺佢去一隊,但唔代表呢樣野未來唔會再發生。」

係利物浦入面,布斯達踢緊U23青年軍,今年一月為U23青年軍首次上陣並取得勝仗,佢亦同高美斯,古積等為隊友,更取得不少入球。而佢都曾為一隊後備,雖然未上過場,但證明利物浦對佢嘅重視。講到教練最擔心嘅野-傳媒曝光率,吹奏等等令到球員唔可以集中比賽,Dan Seymour認為布斯達性格謙虛,並不存在呢個問題,更會令到佢更專注星期六對西班牙嘅決賽,大家一齊支持呢位利物浦小將啦!

Source: the sun, this is anfield

留言

會員
我要評論
請按此登錄後留言。未成為會員? 立即註冊
  • Liew Wen Feiy
    Liew Wen Feiy 於 27/10/2017 評論 NO. 1

    你们不觉得他想rasford吗?

  • Patrickewell
    Patrickewell 於 28/10/2017 評論 NO. 2

    的確很像拉師傅,但是體格更強

快捷鍵:←
快捷鍵:→