【繼續挨夜】歐聯利物浦作客西維爾

利永遠不會毒行 於 21/11/2017 發表 收藏文章
今晚將會有利物浦作客西維爾嘅歐聯賽事,提到會唔會係對西維爾嘅賽事上有咩特別安排,話晒接住嘅星期日凌晨0130(星期六晚)英超就要對車路士嘛。

由拉蘭拿今季都因傷未上過陣,係上個月開始跟返操,而最近有傳佢可以復出啦,但我哋見到佢係上場利物浦對修咸頓場波後備都無。呢名29歲嘅英格蘭球員有隨隊去西班牙,有報導指出,係星期三凌晨(即係今晚),係利物浦作客西維爾嘅賽事上作後備。
高普表示,拉蘭拿準備好復出係一件好事,但係佢唔需要急住上陣,因為仲有大把比賽係後面。

「佢越黎越接近回復狀態,但係利物浦需要佢踢本季剩低嘅所有賽事,而唔係剩係黎緊呢幾場。」

「拉蘭拿有可能上陣。」

「跟據我哋現有陣容,其實排陣都係節奏同新鮮感嘅混合。」

「上一場(對修咸頓)嘅比賽並唔算消耗太多,所以用返上場嘅陣容基本上無咩問題。之不過,我哋100%唔會咁樣做,因為卡里奧斯會出場嘛!」
睇返佳尼都要等到出年先會復出,馬迪普又未出得嘅情況下(但有望係對車路士果場上陣),咁即係話,對西維爾果場應該係路夫蘭加卡拉雲兩位中堅拍住上,而右閘估計會由祖高美斯擔任,而左閘如無意外都係由再次成為老豆嘅摩蘭奴啦~前場都係果幾個啦,古天奴,文尼,沙拿同費明奴-古埃及文明嘛。而小妹就希望今場會見到蘇蘭基後備上陣啦。
而家利物浦係歐聯E組入面暫時排第一,睇返贏波當然最好啦,但係和波拎到一分都唔差嘅。但對於西維爾黎講,呢場波都幾重要。佢哋而家係小組排第二,比利物浦少一分,但只係高過排第三嘅莫斯科斯巴達兩分,今場仲要有主場之利,真係唔講得笑。雖然話係作客,但為咗下個月對莫斯科斯巴達可以輕鬆啲,都絕對唔可以輕敵。

係賽前記者會,高普就話唔驚出晒名非常「熱情」嘅主場球迷影響比賽氣氛,因為球員都係專業。
「我哋利物浦嘅職責就係令到主場球迷不太享受場波,就好似其他隊伍嘗試係晏菲路球場上做到同樣嘅野。」

「我哋唔係去享受比賽氣氛,我哋係去做出成績俾人睇,所以作客並唔係一個借口去鬆懈。」

留意返,今晚利物浦作客西維爾將會係凌晨0345開波,各位較定鬧鐘啦~

source:
thisisanfield, liverpoolfc

留言


請按此登錄後留言。未成為會員? 立即註冊
  • wombat 於 22/11/2017 評論 NO. 1

    第三球幾乎全軍退守禁區,唉~

快捷鍵:←
快捷鍵:→