【終於出手啦】有傳利物浦5300萬鎊報價艾利臣

轉會窗開左都已經一段時間,而世界盃亦會係星期四開始,利物浦今個夏天呢就淨係暫時買左法賓奴一個人,雖然之前希望買里昂隊長費基亞,但係呢宗交易係最後好不幸地咁告吹左,不過點都好啦紅軍仍然有其他既目標想去收購,例如有傳話有意買岩岩跟左史篤城降班既沙基利,呢一個瑞士國腳作為文尼同沙拿既替補亦都係一個唔錯既選擇,因為佢份合約入面有降班條款,買佢只係要1200萬英鎊,所以應該都有可能會成真既。
講返正題啦咁就,利物浦有意買艾利臣已經傳左好多日,有消息就指出利物浦終於向羅馬方面提出一份報價,而呢份報價就高達5700萬英鎊。但係原來巴西一號門將本身就唔係高普既第一選擇,高普本來係希望買馬體會既門將奧比歷,但係由於身價實在太高既關係,高普被迫放棄將目標改為羅馬既呢位守門員。艾利臣宜家只係25歲,而宜家高普已經確定左呢位巴西國腳將會係利物浦既一號正選門將。係岩岩過去既球季,卡利奧斯同米勞列一直競爭緊正選門將既位置,雖然最終卡利奧斯成為左高普既選擇,但係佢係歐聯決賽既失誤實在令所有人大跌眼鏡,所以高普亦都下定左買一個正選守門員既決心。值得一提既係艾利臣亦都同時間吸引左唔少球會既注意。
艾利臣係今年既世界杯跟隨巴西隊出戰,呢位效力羅馬既守門員以自己出色既表現成功將效力曼城既艾達臣推到後備席上,而呢位巴西一號門將就希望可以係世界杯之前確定自己下季既未來。佢係訪問中表示:「就睇下今個星期會唔會有事發生,我希望一切可以順利進行,希望可以係世界杯之前解決轉會既事情,呢樣係我想要準備解決既野。」既然最新既消息指利物浦已經報左價,換言之巴西人亦好有機會可以係星期四之前確定到自己既下家,各位利物浦既球迷想要好消息就要等多幾日啦。
另一方面,岩岩上文講過既沙基利亦有望成為紅軍既球員,因為球員自己本身都好希望可以去晏菲路踢波,而利物浦方面只係需要繼續再同史篤城去商談就應該好快會得出進一步既結論。雖然沙基利應該就無費基亞既級數,但係呢位瑞士球員擁有英超既經驗,唔洗擔心需要再次適應英超既問題。呢個價錢可以買到一個現役既國家,可以話係平靚正之選。當然我地最希望既緊係盡快完成左艾利臣既交易先啦。
標籤: 利物浦  艾利臣  巴西  羅馬  
【Budweiser發光打氣杯 陪你嗌足六十四場!】

留言

會員
我要評論
請按此登錄後留言。未成為會員? 立即註冊
  • OhMyGirl_Arin
    OhMyGirl_Arin 於 12/06/2018 評論 NO. 1

    5300萬 羅馬開價9000萬 羅馬個monchi點睇都唔似會降價賣

  • kinfung
    kinfung 於 12/06/2018 評論 NO. 2

    9000萬歐羅呀,啫系8000萬鎊左右

  • wombat
    wombat 於 14/06/2018 評論 NO. 3

    沙基利就真係唔係好想要,早幾年唔肯黎利記,轉個頭畀人賣咗去史篤城,跟住又嫌隊友唔夠級數支援佢。 免費轉會坐後備都驚佢會搞亂更衣室秩序

快捷鍵:←
快捷鍵:→