【新年要買野啦】 利物浦之Shopping Wish List

利永遠不會毒行 於 29/12/2016 發表 收藏文章
贏咗波,可以輕鬆啲啦。

今日放工行下街買下衫,凍啦,換季啦!好多商店都做緊Christmas sale,小妹諗左陣,究竟christmas sale抵啲定係new year sale會平啲呢?(唔好答我早買早享受,遲買跌幾舊呀)行行下,見到有波衫賣,令到小妹又諗起一月轉會市場又開啦,高普會買咩人呢?

相信球迷10個有9個都會想高普買返隻正宗左閘,唔係話占士米拿唔好,只係想係陣容上面俾多個選擇,加插啲變化。老寶講,高普係唔識變陣,對係901球隊或者係主攻隊,贏緊定輸緊,都係同一個4-3-3陣,同一個進攻防守模式。如果踢得好嘅話,呢個唔會係一個問題,但衰在利物浦係變陣上面嘅選擇唔大,雖然話就話班U20仔都好有潛質,但咁快要佢地擔大旗又真係勉強咗啲。留意返,入到波又有創造性嘅球而又係最熱血球員之嘅文尼一月會去踢非洲國家盃,而呢樣野亦都成為咗利物浦爭標嘅隱憂。不過啦,都係果句,足球係團體運動,無話無左邊個係唔得嘅。

跟據英國鏡報報導,高普對荷蘭藉翼鋒球員Quincy Promes有興趣。Promes就被讚係一位有速度又有腳法嘅一個球員,佢勤力,基本上成條中場線都會見到佢踪影,而外媒更形容佢係 入波嘅關鍵人物。而佢係荷蘭國家隊就係拍住韋拿度姆,如果佢加盟利物浦,相信係培養默契上都可以減少時間,係季中先買嘅球員就有呢樣唔好,無時間磨合呀!
呢名24歲仔2014年加盟Spartak Moscow,踢左71場入左36球波,今季更加九次射門有五球係入嘅,協助Spartak上到俄超榜首。講到佢咁重要,人地肯唔肯放先?其實promes同spartak就係8月果陣簽左約,仲要簽到2021年。而Spartak 2013年就用 €15m係Twente買佢返去俄羅斯,係2016年,即係而家外界對呢名荷蘭球員嘅估值係£25m。貴架,但最緊要岩用姐。
https://www.youtube.com/watch?v=olqaXz8NXTQ
不過好野當然多人爭,聽講熱刺對Promes都好有興趣…

咁有傳聞利物浦仲有興趣嘅同樣係踢緊俄超嘅FC Rostov 21歲伊朗藉前鋒球員Sardar Azmoun同埋多蒙特嘅美藉18歲後生仔中場Christian Pulisic。

Sardar Azmoun 係今屆歐聯同埋球會嘅表現令人欣賞,唔講咁多,去片!
https://www.youtube.com/watch?v=ExAgM2MRe0U
Pulisic呢個靚仔都幾叻架,話說係2016年國際球會盃嘅季前友誼賽,為多蒙特係補時階段入波,追平曼城。而Pulisic亦係多蒙特最年輕球員去踢歐冠盃,面對大賽,佢一啲都唔怯,係分組賽對皇馬果陣嘅仲有助攻添!但小妹都係唔花咁多文字去介紹佢啦,因為跟據報導,多蒙特唔肯賣呀!

等等好似未有閘喎…我地再留意下轉會消息啦!

有時諗,有個都鐘意踢波嘅男朋友都幾好呀,除夕倒數完做咩好?唔洗諗即刻答,緊係睇0130利物浦對曼城啦!香港男仔最怕就係諗食咩同諗做咩,而家幫你諗掂咗其中一樣,所以話,識揀一定揀會睇波嘅女仔。


留言


請按此登錄後留言。未成為會員? 立即註冊
  • kahong 於 29/12/2016 評論 NO. 1

    有個識睇波既女朋友係唔錯既

  • saywin 於 30/12/2016 評論 NO. 2

    边度揾?

  • Fan Lau 於 30/12/2016 評論 NO. 3

    生活上有共同的興趣,總好過男人愛高達,女人唔明白。

快捷鍵:←
快捷鍵:→