【意見一致?】古天奴轉會風波之旁觀者清 文字

25歲嘅巴西球員古天奴,被巴塞隆那鎖定為收購目標,巴塞更向利物浦提出並三次嘅報價,可惜全部都被利物浦拒絕。有傳古天奴更加message巴塞叫佢地唔好放棄自己…而估計巴塞將會係轉會窗完結前第四度報價。
古天奴係八月頭亦曾經以電郵向利物浦提出轉會要求,而之後就一直以背傷理由缺陣。佢而家就隨巴西國家隊去左踢國際賽,亦被記者拍到佢笑住咁操練,一啲都唔似有傷。而巴西軍醫亦講到佢似係心病多過真病。而係岩岩巴西對厄瓜多爾嘅國際賽上,古天奴更後備上陣,接應捷西斯嘅傳球入波,說好了的傷呢?

正所謂旁觀者清,但大多數意見都唔希望見到古天奴離開利物浦。

費格遜都出聲了。
前曼聯領隊費Sir對於近日古天奴轉會風波一事發表下意見呀,費爵爺就話對古天奴好失望喎,佢忘本,忘記係利物浦俾機會佢先有今日嘅成就。

「係呢個時勢,一個強勢嘅管理層係好重要。教練領隊其中一個職責就係要教導啲球員對自己做緊嘅野付責任。」

「 我好肯定係一件好遺憾嘅事。利物浦係培訓上花左好多心機、以及肯俾機會古天奴佢先有今日嘅成就。」

「如果轉會窗係七月就結束,古天奴鬧劇就唔會發生。而我建議就係轉會窗應該係開季前就完結,咁樣各球隊就一早清楚自己有咩球員,而唔係睇完第一場比賽踢成點再決定。」

除咗重感情費格遜出口之外,有西班牙傳媒亦報導古天奴好朋友、前巴塞球員、同屬巴西國家隊嘅尼馬亦都勸古天奴留係利物浦,指出古天奴應該留係利物浦,以及唔會後悔利物浦留佢唔俾佢去巴塞呢個決定。

前利物浦球員,現役巴塞球員蘇亞雷斯亦有就古天奴一事出聲。但佢就好婉轉咁講到,簽下古天奴對巴塞現況唔會有改善,巴塞球員要團結起黎去達成一個目標,而唔係簽唔簽下新球員嘅問題。阿蘇真係對利物浦有情有義…留低嘅都係一份心意呀!
(S7: 唔好黎呀!)

而前阿仙奴球員亨利就話其實要佢評價古天奴呢單轉會新聞係難嘅,因為佢自己係一個想走就走嘅球員,所以佢唔會明白古天奴想走但又走唔到嘅心情。之不過,身為前輩,亨利就認為古天奴應該留係利物浦多一季先走。
「我會建議佢學下蘇亞雷斯,大家都知佢當年想走,但佢最後都選擇係利物浦踢多季,好黎好去,仲被讚佢係一個專業嘅球員,果季仲表現得好好添。」

「或者古天奴係想走嘅,但佢應該回心轉意,利物浦球迷一定會接受返佢,繼續愛戴佢。」
「留係利物浦,踢季好波再睇下點啦,參考蘇亞雷斯條路啦。」

唉,心病還需心藥醫。

希望古仔聽下人勸啦,前曼聯領隊、阿仙奴名宿、前巴塞球員等都講到就繼續係英超証明自己啦。話晒英超有廿隊,西超得三隊,好明顯英超好玩啲啦。而利物浦仲有康樂部部長摩蘭奴,一定開心過開心樂園餐!最緊要係咩?有個鍚你嘅領隊高普呀!高daddy今次真係大細超到呢…鍚古仔錫到出晒面,俾著係第二個?真係皮已收啦~

source:football365expressespn

留言

會員
我要評論
請按此登錄後留言。未成為會員? 立即註冊
  • AAL
    AAL 於 01/09/2017 評論 NO. 1

    仲要年頭先簽左張5年合約, 高普成盤復興大計以你為中心, 你一句追夢就玩嘢, 又C眼痛又盛. 最初都想你留底, 但見你條反骨仔踢國家隊踢到識入波, 你一D都唔配著利記球衣, 搵到人替你即刻賣, 未有人就放响雪櫃雪下先, 咁樣對25仔算係咁啦.

  • 聖卡西
    聖卡西 於 01/09/2017 評論 NO. 2

    好明顯係買多多人都唔賣你啦 古天奴 利記今次做得好好

  • Lawrence Mok
    Lawrence Mok 於 01/09/2017 評論 NO. 3

    雪足5年,出黎三張野,都咪話唔驚!

  • kinfung
    kinfung 於 01/09/2017 評論 NO. 4

    對古仔真系好失望,佢如果再系晏菲路比賽,實比人噓爆。想走吾系吾得,學so7感走咪乜事都冇囉,衣家有邊個利迷吾中意so7?

  • supar08
    supar08 於 01/09/2017 評論 NO. 5

    其實尼馬有板你睇,俾人追續約費定乜俾巴塞告。
    呢d咁小家球會值得去咩?
    收拾心情打好波等尼馬召你去大巴黎好過
    BTW尋日入完波係咪喊????

  • Peter Pen
    Peter Pen 於 01/09/2017 評論 NO. 6

    去到巴塞先知自己唔夠班仲死,到時回頭草拍住郞肥就無謂啦
    利記當你皇帝。去到西超,唔通當你係小白,屎郞呀

  • Dan Lau
    Dan Lau 於 01/09/2017 評論 NO. 7

    沒有你過得更好

  • Shiuhung Ho
    Shiuhung Ho 於 01/09/2017 評論 NO. 8

    好認同費sir的說話

  • 何浩堅
    何浩堅 於 01/09/2017 評論 NO. 9

    其實美斯已經想踢中路,你去到係同美斯爭位。。。

  • Shaco Chau
    Shaco Chau 於 01/09/2017 評論 NO. 10

    篇文好生動

  • @michael@
    @michael@ 於 01/09/2017 評論 NO. 11

    去啦,你死唔俾你死。。。而家走比人屌死,唔走比人噓死,反骨通常無好下場。

  • Lam Che Yan Pc
    Lam Che Yan Pc 於 01/09/2017 評論 NO. 12

    的確多數人都唔想佢去巴塞,包括我,但佢本人好想去呢個都係事實,宜家咁佢仲有冇心去踢呢?

  • Benson Tang
    Benson Tang 於 02/09/2017 評論 NO. 13

    費Sir既轉會市場觀點好讚同,應該係球季開始前就關門!

    留番係利物浦對大家都有利

  • Rion Ip
    Rion Ip 於 02/09/2017 評論 NO. 14

    踢返季好波先啦~

  • Alberto  Sniper
    Alberto Sniper 於 02/09/2017 評論 NO. 15

    當大家都以為巴塞買古仔係補尼馬個位既時候,其實...

  • Sactle Kevin
    Sactle Kevin 於 02/09/2017 評論 NO. 16

    確確實實果時蘇亞雷斯做法幾欣賞,利迷我表示係婉惜但好感激佢好有心有力好積極咁踢。
    而家古天樂,對佢開始無感,情願疊埋心水快快趣走好過。

  • Denny Chau
    Denny Chau 於 02/09/2017 評論 NO. 17

    幫利物浦重奪頂級聯賽冠軍嘅榮譽,一定大過跟巴塞攞冠軍嘅榮譽。好似阿蘇咁,你踢得出好波,巴塞會唔要你?

  • Michael So
    Michael So 於 02/09/2017 評論 NO. 18

    “因為“亨利”自己係一個想走就走嘅球員,所以佢唔會明白古天奴想走但又走唔到嘅心情"。。。呢句野邏輯上好有問題。。。

  • Fan Lau
    Fan Lau 於 02/09/2017 評論 NO. 19

    請病假期間還可生龍活虎落場入波,相信大部份人會表示反感吧

  • Alan Leung
    Alan Leung 於 02/09/2017 評論 NO. 20

    最尾笑左,仲有Dancing Partner費明奴添

  • Martin Wu
    Martin Wu 於 02/09/2017 評論 NO. 21

    係利頂多季啦,下季咪走,好黎好去,行番s7既舊路👍 無謂搞到犯眾憎.....

  • Forest Lee
    Forest Lee 於 02/09/2017 評論 NO. 22

    利物浦唔好阻人發達啦

  • Louie  Lee
    Louie Lee 於 02/09/2017 評論 NO. 23

    遲早都走 :)

  • P Pe PeTa
    P Pe PeTa 於 02/09/2017 評論 NO. 24

    所有comment 都係一面倒!究竟有冇人支持佢去巴塞?🤷🏻‍♂️

  • Lee Wing Chun Gary
    Lee Wing Chun Gary 於 02/09/2017 評論 NO. 25

    完全對古天奴失信心,講一套做一套 之前又話幾愛利記要做下一個謝拉特咁嘅偉人 要係利記踢到老!巴塞一招手就流晒口水話要走人 講真留得住個人都唔住個心。留得住佢都未必會全力以赴繼續為利記去踢好波 賣走佢罷(利申 本人是利記迷)

  • Kim Ngai Andy Lau
    Kim Ngai Andy Lau 於 02/09/2017 評論 NO. 26

    Dennis Lee, Man Hing Lee, Edwood Tai

  • Ryan Lo
    Ryan Lo 於 02/09/2017 評論 NO. 27

    想走就唔好一月果陣貪錢加薪簽五年約啦,簽得就預咗唔係咁易走

  • Niwat
    Niwat 於 03/09/2017 評論 NO. 28

    根本同當年賣阿蘇係同一個版本,阿蘇想走,美國佬今季打死唔賣,下季再等你出再就價先賣,老套路睇得一清二楚啦!美國佬唔係為隊波好,係為左可以賺更多之

快捷鍵:←
快捷鍵:→