【完季掛靴】回顧沙比阿朗素在利物浦的日子 文字

沙比阿朗素宣佈係德甲完季後掛靴,拜仁慕尼黑成為佢最後以球員身份效力嘅球隊。
呢個絕對係一個令人震驚嘅消息,可能誇張左啲,畢竟佢都35歲。但係小妹睇波生涯入面,佢擔當左一個好重要嘅角色。首先,佢有一樣野係其他球員無嘅,除左佢靚仔佢有型之外,佢好有魅力。實不相瞞,小妹當年對佢一見鐘情;但阿媽教落做人唔可以咁膚淺,小妹之後俾佢嘅腳法,特別係長傳、轉邊、遠射等慢慢溶化,成為佢嘅忠實fans。

2004/2005
佢2004年賓尼迪斯時代以一千七十萬鎊英鎊從皇家蘇斯達加盟利物浦,小妹先岩岩升讀中學,呀唔係,佢第一場就係當年八月英超作客對保頓,學都未開呀!果場記得利物浦係輸0:1嘅,雖然輸,但係佢果陣準確度高嘅傳波而受到球迷嘅認同。而沙比係利物浦嘅第一球入波就係作客富咸後備上陣嘅一個自由球。
講到2005年,點可以唔提歐聯?雖然當時佢因為傷患或者停賽(被車路士嘅林伯特踢傷,休息三個月!),唔係場場有份出,不過係歐聯決賽對AC米蘭,利物浦係下半場輸緊2:3果陣,因為謝拉特禁區被侵犯,而十二碼就係由沙比操刀。咁其實第一下就俾Dida撲出,但係佢補射內柱頂入網!(32")
因為呢球,利物浦以3:3完場並進入互射12碼階段。而最後12碼結果係-AC米蘭3:4利物浦,利物浦成為2005年歐聯冠軍!

2005/2006
係呢一季,沙比成為左必然正選,而佢嘅重用亦無俾新加盟嘅施素高威脅到,咁當然部份原因係謝拉特傷左加上賓尼迪斯鐘意打4-5-1。呢年,利物浦贏左足總盃,不過更多焦點就落第三回合對盧頓嘅時候沙比70碼起腳入波呀。真係有今生無來世,真係睇多幾次都會厭。

2006/2007
其實沙比唔只一次係後半場入波,留意返,係2006年英超對紐卡素,沙比又係喺70碼位置起腳,入左球被稱為“"an outrageous strike〞,即係最唔似樣嘅射門,更有傳媒形容呢球波為 "one of the most audacious goals in Anfield's rich 115-year history",即係晏菲路115歷史中最「大膽」嘅入波。當然,謙虛嘅沙比就話係靠運姐,但當時賓尼迪斯就係訪問中話,其實沙比平時都有練習遠距離射門呢一個技架!

2007/2008
沙比阿朗素一直都受到球隊重視,當年佢出色嘅表現點會唔得到其他球會嘅欣賞想羅致到其球會呀!之不過忠心嘅沙比就對記者講,佢認為利物浦係一隊對佢有特別意義嘅球會,對球隊上上下下包括球迷,都建立左一段感情,所以就算有其他球隊對佢有興趣,佢都只係想留係利物浦。呢句野其實好幾感動,試諗下如果你男/女朋友同你講,就算外間就幾五光十色、有幾多誘惑都好,佢都只會留係你身邊…不要再說了!
因為有傷患影響,加上當年利物浦又有盧卡斯同埋馬斯查蘭奴嘅出現,令到佢嘅正選位置有動搖。 當年亦都無賣到佢走,但不斷有消息指利物浦巴利想取代沙比,俾著你係沙比,你都唔開心啦,係咪先?

2008/2009
但好在,一眾fans都好支持沙比,無論係沙比食lunch果陣呀、或者落街買杯咖啡chill下果陣,都會有球迷主動走過去同佢講-我地想你留低呀。無錯,想人留低要講出口架!而沙比都好開心得到球迷嘅認同,認為呢個舉動令佢挽回不少自信心。2008年開季,沙比都表現得好好,超水準嘅表現亦都被評為當年開季開得好嘅主要原因。加上佢係作客對車仔果場射入全球唯一一個入波,成為當時四年黎第一個作客贏到車仔嘅球隊,終止車路士自2004年來86場主場不敗紀錄。
而數據上,沙比阿朗素更成為第一個係一個球季入面成功傳球1000次嘅英超球員。不過好可惜,最後,佢都係以三千萬英鎊,係2009年8月轉會皇家馬德里。一直以黎佢都係唔想走架,佢想留到2012年合約完果日,但因為同賓尼迪斯嘅分歧(或者衰啲講-迫佢走)... 唉!謝拉特對沙比要走呢個決定更表示痛苦不堪,亦指佢嘅離開係利物溝2009/2010開季踢得差無form嘅主因。 但無計架,就算呀領隊對外講你有幾重要都好,真係講就天下無敵,之不過背後又放消息想放你走囉;球員付出左得唔到回報,心淡嘅下一步咪照你意思離隊囉。係2008/2009季尾對侯城嘅入波,就成為左沙比最後一球係利物浦入嘅波。

係利物浦5年,沙比為利物浦上陣210場,入過19球波。小妹唔係要講到佢神咁樣,佢唔係一個完美嘅球員,都會有燥有攞牌嘅時候。但身為球迷嘅小妹,只記得佢無得輸嘅短傳,準確度高嘅長傳,有角度嘅射門,佢亦有吸走個波嘅能力,波追人呀!
一個有能力嘅球員,去到邊都會受到重視,見到佢係皇馬同拜仁都展現到佢嘅招牌長傳,睇住一粒星繼續閃,係最大嘅安慰。拜仁領隊當然想佢踢多季,更講到明佢仲係拜仁陣中一個重要球員,雖然無可否應,佢係慢左,但慢左未必係一件壞事…講到咁,但沙比仍然作出完季就掛靴。而家佢選擇退落黎,唔去美職玩幾年,應該係想球迷記得佢係仲閃緊果陣退下火線。

沙比係利物浦果段時期,就係小妹中學成長階段(所以小妹中學時期心臟未被訓練得強壯)-柴娃娃入學到會考、我們的紀念冊、明愛暗戀補習社等等,唔知點解,無論係邊一方面,都總會提到足球;提到足球,總會提到利物浦;提到利物浦,總會提到沙比阿朗素。唔好咁感性都係,希望佢繼續update下facebook ig twitter,等小妹閒時都有得丁下佢個靚仔樣呀!
#thanksxabialonso #welovexabialonso





留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→