【嚴選五大IG用家】 高普:我唔明點解你哋要玩社交媒體囉 文字

越黎越多球員會用社交媒體去抒發自己感受,而球員嘅followers/likes下下都幾百萬上落,真係唔講得笑。而佢哋亦都好鐘意同球迷分享自己平日除咗係足球上嘅趣事-包括屋企人、寵物、去party等等,而佢哋亦善用ig story去紀錄生活上嘅大小二事。

利物浦黎講,小妹就想介紹幾位極活躍嘅IG球員:

1. 史杜列治
大師兄史杜列治除咗踢波之外,佢亦係一名音樂人/製作人,hip hop同rap都無難度,yo~ 鐘意呢類型音樂嘅朋友不彷留意下。係佢ig入面,關於音樂嘅野唔會少得過足球。但由於之前係球場上表現未能達到預期咁,有球迷就質疑佢花得太多時間係音樂上面。

2. 費明奴
巴西人就最鐘意開party。費明奴亦唔例外,一有假期就會搵埋一大班朋友仔去玩。加上佢岩岩係六月結咗婚,愛妻嘅佢頻頻曬恩愛,而佢亦成日都會更新ig,最鐘意post同隊友古天奴同摩蘭奴嘅相。由於平日衣著同香港嘅旺角人有啲相似,固此佢亦有利物浦mk仔之稱。

3. 摩蘭奴
講到社交媒體,又點少得康樂部部長摩蘭奴。話說佢ig更新嘅頻密度極高,除咗會擺下足球野外,佢亦會同大家分享下佢家座生活,佢最鐘意擺佢個囡囡上網,不過無可否認,佢個囡又係得意嘅。而佢亦好識呢個PR,話說係夏季轉會市場完結時,古天奴歸隊後被指訓練時唔開心,摩蘭奴就一次過post幾張古天奴同佢一齊訓練時笑嘅相,令到大眾球迷安心啲。

4. 路夫蘭
呢排俾人鬧到傻嘅路夫蘭其實平時都好鐘意玩ig,睇返佢ig story都差唔多日日有,而story內容除咗足球野外,其他多數係叫春post。但由於佢份人比較要面,所以一俾人鬧果陣就會關閉留言功能以及唔再出新post。但玩開嘅佢又點會忍到手,尋日就出咗個ig story,同大家報下平安咁啦。

5. 米奴列
外貌成熟穩種嘅米奴列除咗係一名守門員之外,亦係一名比利士咖啡店老闆。所以除咗足球相之外,佢間唔中都會影下自己間coffee shop,賣下廣告嘛。而米奴列亦好鐘意係隊友ig留言,係好多利物浦球員嘅ig comment都可以搵到佢踪影。

球員們用社交媒體去同球迷互動其實有正面好處,除咗增加支持度之外,傷患時無場出都可以keep住曝光率,得到大家支持更可以有正能量。而由於門檻低,好多球員都會當成一個marketing嘅工具去promote自己。

但係當球員太沈迷於網上like嘅數量以及太在意網民嘅意見,就會變成負累。好似利物浦咁,出咗名心理質素差,特別係逆景時候,簡直負能量爆燈。睇埋球迷嘅留言,真係心都碎埋。睇到路夫蘭將留言功能關上,就知道佢嘅抗壓力係幾低。

所以,高普就叫球員唔好理社交媒體活動。係上場贏咗Huddersfield之後提到,外界對球隊嘅批評的確為製造咗啲小問題出黎。

「而家個問題係,當我哋達到唔到預期時,就會被人拎舊時黎比較,外界所講嘅就只係削弱緊球員嘅鬥志。」
高普表示自己控制唔到球員玩咩社交媒體,只能夠話唔明點解佢要咁在乎。

米奴列亦都咁講:「對於評批,每個人都會有唔同嘅方法面對,有啲人會睇完唔理,有啲人會嬲,有啲人會唔睇,有啲人認真去睇。對於我黎講,最重要係冷靜,對住負評時唔好有壓力。」

呢個岩,現今網絡世界摧毀咗幾多人,而球員又唔係KOL,唔係靠呢個網上世界搵食,而家呢個時期就乖乖地聽高普話,低調啲,專注足球啦。始終,把口生係人地度,真心假膠你又分唔到,承受唔到嘅話,咪唔好玩囉。人類係善忘嘅生物,踢得好果陣正評就會返黎架啦。


Source:thisisanfield,球員ig

留言

會員
我要評論
請按此登錄後留言。未成為會員? 立即註冊
  • Tat Kay
    Tat Kay 於 31/10/2017 評論 NO. 1

    仲以為自己眼矇...

  • Shawn Chong
    Shawn Chong 於 31/10/2017 評論 NO. 2

    Wayne Kok the sturidge like what i say

  • Waiman Leong
    Waiman Leong 於 01/11/2017 評論 NO. 3

    費奴係泰國人妖喎

  • Li Pak Him
    Li Pak Him 於 01/11/2017 評論 NO. 4

    issachei老是常出現😂

快捷鍵:←
快捷鍵:→