【古天奴有話兒】我會做好呢份工! 文字

最近又有報導指巴塞將會係一月轉會市場再次對古天奴問價,但係西班牙資深記者Guillem Balague就對SkySports講話巴塞係一月唔會對古天奴有任何行動,至於下年嘅夏季轉會市場,佢就表示一切言之尚早。

而利物浦方面,前英超球員及ESPN講波佬希斯納就估計,利物浦係一月係唔會放走古天奴,堅定咁實行同古仔簽完約一年內都唔會賣佢。而FSG岩岩完結嘅夏季轉會市場亦明確表示,佢唔會想做古天奴呢單生意。
就轉會風波一事都未親口發過聲嘅古天奴,日前終於係巴西ESPN嘅訪問中提到,雖然利物浦阻止咗佢去巴塞隆拿嘅轉會,但係古天奴對利物浦及利物浦嘅成員都無不滿。巴塞曾三次向古天奴問價,而古天奴亦提交過轉會要求,但通通都被利物浦拒絕。呢名25歲嘅巴西球員係上星期六對般尼嘅比賽正選上陣,而佢係下半場亦被因為抽筋被換出,被換出後,鏡頭都影到佢好唔甘心嘅表情。
「全世界都知發生緊咩事。」

「由我第一場係利物浦上陣,到岩岩對般尼果場波,我都覺得自己係受歡迎的,就好似係利物浦以往嘅四、五年咁。」

被問到對利物浦嘅處理手法如何?佢就表示過左去嘅野就唔好再提。

「(同球迷)係一種互相尊重嘅關係,我嘅工作就係做好呢份工,盡力幫球隊爭取好成績。」

「我得到一份工作邀請,同其他職業一樣。係今次(轉會)呢件事上,相信大家都知道,我,以及我嘅家人對轉會有興趣。」

「但正如我成日都咁講,我好榮幸得到一間優秀球會嘅邀請,但留係利物浦同樣係一件好光榮嘅事。利物浦係一隊好出色嘅球隊,我而家係隊中就將會盡我全力去貢獻球會。」
「過去幾個月,我嘅心情真係好複雜,但好似我之前所講,我而家留咗係利物浦,同過去嘅四、五年一樣,我同任何人都唔存有問題。我一直都好尊重、好感謝利物浦呢個團隊-球員、主席及其他職員。」

記者又問佢會唔會好似前利物浦球員蘇亞雷斯咁,係未來嘅日子延續呢個巴塞夢,佢就咁答:
「不了,我暫時無呢個諗法。係(利物浦)入面,大家都互相尊重。」

古天奴係呢篇訪問入面個表情都唔太開心,一直用工作(work)去形容巴塞嘅問價同轉會要求-喂大佬我打份工咋喎,我咁樣做都係打工仔心態,希望大家明白。咁又係,俾人一直追問一啲往事,有PR稿都係難受。但一切都過左去,而家講以前就無謂啦,反正你都改變唔到歷史,就只有做好呢份工,向前望,用成績同努力去打動返球迷囉。(反而小妹唔太鐘意佢將屋企人都拖埋落水,話屋企人都對巴塞有興趣,堂堂男人,自己認左佢啦!)

而佢係訪問中多次用到「尊重(respect)」同埋以往係利物浦果四、五年,仲提到歐聯重新上陣,估計用意係想令到球迷唔再覺得佢係反骨仔,明白大家都係重感情,記返起過去嘅時間佢對利物浦嘅付出。
正所謂浪子回頭,小妹睇完呢篇訪問,都覺得佢個心仲係利物浦嘅!大家相信古天奴啦,雖然狀態並未回復,但係睇返外圍因素,係世界盃年,加上已經踢過歐聯-相信佢啦!唔信佢,都信高普呀…巴西人就最熱情,高普抱抱係時候發揮作用啦。


source:express.CO.UK, epsn

留言

會員
我要評論
請按此登錄後留言。未成為會員? 立即註冊
  • Resolver Yeung
    Resolver Yeung 於 19/09/2017 評論 NO. 1

    Tango Lam

  • 鄒凱賓
    鄒凱賓 於 19/09/2017 評論 NO. 2

    破壞球隊季前備戰嘅罪人

  • Tat Kay
    Tat Kay 於 19/09/2017 評論 NO. 3

    古埃及文明

  • Michael Fung
    Michael Fung 於 19/09/2017 評論 NO. 4

    有邊個唔想去巴塞,仲要南美人

  • Hanson Lau
    Hanson Lau 於 20/09/2017 評論 NO. 5

    学当初苏九咁踢多年先啦~唔好同世界杯过唔去,明年既转会窗再另做打算,利记都可以考虑放人,之后再攞钱买其他球员补充返实力,虽然唔会再有亿六欧元既价,但係要攞返个亿到亿二之间应该冇问题...LOL

  • wombat
    wombat 於 20/09/2017 評論 NO. 6

    其實如果巴塞係咁用拉傑迪做籌碼, 加6000萬現金, 買埋vvd, perfect

  • 6262
    6262 於 20/09/2017 評論 NO. 7

    N o w 英超西甲德甲開波優惠 轉台優惠 平均189 需加接駁費用 TG: pccwpccw 專人跟進 報價 落單

  • Angus Yuen
    Angus Yuen 於 20/09/2017 評論 NO. 8

    如果要賣古天奴,真係要醒目d, 唔好學巴塞咁畀人屈左一大筆

快捷鍵:←
快捷鍵:→