【動真火】拉蘭拿同熱刺球員發生衝突後紅牌離場

利永遠不會毒行 於 06/02/2018 發表 收藏文章
利物浦PL2(Premier League 2, 即U23)對熱刺嘅賽事上,熱刺就小勝利物浦一球。

一個球員如果要慢慢回復狀態,就唔可以餓波,一定要去踢比賽。而高普就選擇俾拉蘭拿踢一啲無咁緊湊嘅PL2賽事先,唔知係咪利物浦係英超打和熱刺,因為球證嘅判決令到大眾球迷慣怒,同時有份觸動到拉蘭拿嘅情緒,佢係呢場波因一個舉動而拎咗張紅牌出場。

睇片先:

拉蘭拿被對手Marsh侵犯,對方用手爭撞頭,然後報復式地去壓落對手個頭度再箍頸。呢下唔洗問,紅牌硬,京斯即刻上前拉開拉蘭拿。睇返片,見到拉蘭拿仲不斷咁鬧緊對方球員,睇黎佢真係幾嬲喎。
今年29歲嘅拉蘭拿,因為大傷之後未有態,所以同京斯一樣,被高普叫咗去踢U23 操下先。(因為U23有條例,唔計龍門,每隊可以有最多三名超齡球員上陣。)但唔知點解平時都算好好先生嘅拉蘭拿今次反應咁大,但相信身為前輩,呢個舉動會令一眾後輩失望。

而利物浦U23領隊Neil Critchley 就係賽後表示從未見過拉蘭拿有咁嘅反應,

「我希望再睇次事情嘅發生。最諷刺嘅事係,我哋係果個時刻正準備換出拉蘭拿。」
拉蘭拿將會係PL2被罰停賽三場,但留意返,佢依然可以係一隊上陣。簡單啲講,佢原則上係可以係今個星期對前球會傷咸頓嘅賽事上陣 ,因為PL2賽事嘅牌係唔會帶去英超一隊賽事。但由於高普係想拉蘭拿係U23踢返個態出黎,今次停賽,好大機會會影響到佢回復狀態嘅進度。

係上星期,高普曾經向傳媒表示,拉蘭拿非常不幸地係季初受大傷(thigh injury),係傷癒後又再有兩次小傷(groin injury)。高普亦話如果只係睇佢係訓練時嘅態度同埋佢嘅本身嘅質素,你會覺得佢可以即刻踢返一隊。

「但呢兩次傷都係喺後備上陣後十分鐘或十五分鐘發生,要係佢傷癒後個態立即由0變做100都可能係令到佢受傷嘅原因。」

「球隊嘗試好努力咁去處理呢個問題,想對症下藥。但呢兩次都唔成功,不過其實都係小問題,第三場出返黎就唔會再受傷。」


小妹就估計拉蘭拿係因為怕傷,明明就快可以回歸一隊,如果俾你踢傷我咪又有排抖?一時火遮眼先會做出呢個令人百思不得奇解、咁唔理智嘅行為。如果你叫小妹諗啲奇怪啲嘅理由,都有嘅,咪就係俾人整亂咗條馬尾,嬲囉(女仔先明);又或者今場無好朋友軒達臣係度㩒住佢把火咪爆囉;再唔係拉子唔想再踢PL2,所以食張紅牌等高普要擺返佢去一隊囉;再唔岩,可能係想幫一隊隊友報仇呢。(全部講笑)

拉蘭拿拉子一日唔出黎解話,點解咁嬲,都仲係一個謎。但點都好,希望佢快啲操返fit,我利一隊需要佢呀!

Source:independent.co.uk, Skysports, Mirror


【世界盃 ng sick ball 街訪 — 第三集】

留言

會員
我要評論
請按此登錄後留言。未成為會員? 立即註冊
  • wombat
    wombat 於 07/02/2018 評論 NO. 1

    好似想扭斷條靚仔個頭咁,呢吓真係太過分。自我停賽三場啦

  • kinfung
    kinfung 於 07/02/2018 評論 NO. 2

    前幾日一隊對熱狗個場既怒氣泥

  • @michael@
    @michael@ 於 08/02/2018 評論 NO. 3

    踢得一隊,個個體能不差,今次爭輸比個o靚仔,呢鑊仲唔係你受。

快捷鍵:←
快捷鍵:→