【利物浦變陣可能性】不了,3-4-3。

利永遠不會毒行 於 11/02/2017 發表 收藏文章
成日都話要變,但可以點變先得?有外媒就提倡過防守力不足嘅利物浦可以試下3-4-3。

3-4-3以前就被譽為傳統保守缺乏創意悶嘅陣容,當年雲高爾時代嘅曼聯就係一個失敗嘅例子,不但成績唔同,仲要被炒埋。相反,干地領軍嘅車路士就係試陣適應後打得都算成功啦(提子中)。咁好明顯一個岩嘅陣都要有一班岩嘅人踢,唔係話轉就轉。

如果利物浦打3-4-3又可以點呢?會唔會好似下面咁呢?

古天奴 費明奴 文尼
摩蘭奴 軒達臣 拉蘭拿 佳尼
占士米拿/卡拉雲 路夫蘭 馬迪普

前面唔洗解釋啦,三箭頭。

由於兩翼係需要速度,唔係講笑,擺摩蘭奴上去爆分分鐘爆出個火花,對住一般中堅轉身慢等弱點盡爆邊線。原本占士米拿都係左翼嘅其中一個人選,之不過考慮到佢速度比較慢,都係算。而另一邊佳尼無問題啦,係之前嘅訪問,佢都講到明自己同翼都分別不大,所以用雙防中打翼係可以嘅。拉蘭拿可以繼續擔當box to box 嘅職責,而係呢個陣入面,佢亦都係做返而家係中場做緊嘅野,而軒達臣都係防守為主啦。咁當然個陣式係可以因應現場環境而變啦,即係好似當你攻緊嘅時候,左邊翼上左前場幫手,右前咪可以墜後返去keep住中場4個;而對方攻你要做防守果陣,兩隻翼衛都可以返防幫手,前場搵一個退後去中場變5-3-2。

中間真係好難揀,係現有人腳中,軒達臣識橫傳,安尼簡會傳推進,可以話係弱化版車仔中場,但無奈安尼簡狀態真係好差,真係揀唔落手。佢兩個玩好多sideball,係夾嘅係贏到控球指數,不過對對方做唔到威脅咁解。如果安尼簡fit,中間變做 「摩蘭奴 安尼簡 軒達臣 佳尼/拉蘭拿」 都可以一戰。再唔係換走三箭頭古天奴/文尼擺拉蘭拿去前場再執過啲位仲得。

之不過,前面可以慢慢砌,慢慢試,而家最大嘅問題係,三中堅陣中係要三個識用波嘅中堅,三個識用波嘅中堅,三個識用波嘅中堅!成隊利物浦得一個馬迪普識玩。占士米拿係勤力、駁腳都幾好,但輸身高同埋速度;用卡拉雲係有身位,但企位同長傳都未夠好。而清道夫呢個職責路夫蘭又麻麻地勝任,清道夫一職要有好好嘅vision,有準確嘅預測同判斷能力,仲要係適當嘅時間為其他隊友補位。即係咁,路夫蘭鐘意預判防守,將危險係萌芽階段就解決左先既球員,防守走位可能又會偏向估你下一步推去邊-呢種賭搏式防守如果賭贏,係穩陣嘅;如果賭輸左,下下訓落去嘅欄截都咪話唔驚。雖然,米奴列救12碼準成度比生波多姐;而且,路夫蘭賭完做完欄截後交唔倒直線快放波,即係話打唔到快速反擊。3-4-3攻力偏低,利物浦嘅前鋒把握力本身海鮮,而家三箭頭都入唔到波,再打埋3-4-3就真係…
3-4-3中場混戰時間多,除非好似熱刺咁有高質兩閘,攻防速度身位有晒,可以一個人睇晒成條邊。如果唔係分分鐘優點變缺點,本身想用空位去做組織攻勢倒頭來變俾人反攻嘅弱點。不過呢,利物浦都係對鐵桶陣先輸波機會大,多數輸被反撃同高空波,多左個中堅幫手頂…係好事嘅,但留意返,利物浦嘅後衛係前場先識得頂波(路夫蘭、卡拉雲都試過係前場頂入波),返到後場就派膠多,而除左馬迪普外,其他後衛嘅身高都唔算係突出;加上而家係前場破唔到人地個901防守,如果變陣變做3-4-3,好似無咩幫助喎ching。


總結:個人見解,人腳問題,3-4-3解決唔到現有問題,Forget about it。





留言


請按此登錄後留言。未成為會員? 立即註冊
  • 亞男 於 11/02/2017 評論 NO. 1

    當見到'占士米拿/卡雲尼'!真係頂你識條鐵咩

  • Lai Shiu Pong 於 11/02/2017 評論 NO. 2

    3-4-3中堅可用安利簡 羅渣士年代佢都係踢右中堅踢起

快捷鍵:←
快捷鍵:→