【佢都係我同鄉喎】利物浦資助之修咸頓舊生會 精選

利物浦將於星期日對戰修咸頓，講起修咸頓…其實利物浦都真係幾鐘意買修咸頓嘅人架， 利物浦自2003年到而家，總共買左7個修咸頓球員，而其中5個係最近呢三年先羅致返黎。衰啲講句，今次仲唔係修咸頓舊生會？
當然啦，來自修咸頓又未必唔好嘅，睇返而家正選必有嘅文尼、拉蘭拿、佳尼同路夫蘭都係來自修咸頓，而轉會市場就快開啦，華基爾雲迪積克同埋賴恩貝查恩特都據說係高普嘅購物名單上面，先唔好講佢地岩唔岩踢利物浦先，但利物浦再向修咸頓買人，就真係定期俾家用修咸頓啦。
係經濟學角度上，利物浦不斷向修咸頓買人，修咸頓一定會將球員標價比當年買返黎更高。留意返歷史，除左保羅鍾斯之外，修咸頓都係賺緊利物浦錢架。

高治
佢係2004年由阿士東維拉以£2.5m轉會去修咸頓，一年後，即係2005年，賓尼迪斯以£7m買佢返去利物浦，帳面上睇，修咸頓賺左£4.5m。

列基林拔
2009年由布里斯托流浪轉會去修咸頓，當時身價係£1m。但係5年後嘅2014年，佢升值四倍，以£4m回歸母會利物浦。仲記得佢當嘅"fairytale move”嗎？修咸頓帳面上賺左£3m。
拉蘭拿
2006年簽約加盟修咸頓，當時修咸頓只係需要俾£18,000嘅compensation fee般尼茅夫。係2014年，利物浦以£25m帶佢返去晏菲路球場，即係話，修咸頓係帳面上賺左£24,982,000。拉蘭拿嘅創作力令到條中場線生晒，而且走動又多，修咸頓當年賣左佢真係一件錯事，呢筆錢…抵修咸頓賺啦～
路夫蘭
2013年以£8.5m由里昂轉會到修咸頓，一年後，隨即以£20m身價加盟利物浦。修咸頓帳面上賺左£11.5m。當年都有爭辯用咁多錢買佢究竟值唔值，好啦踢到得返3場英超，相信球迷心中有數，最近以十萬鎊週薪續約嘅路夫蘭就…都有佢嘅用處嘅！但不爭嘅事實就係－高普好鐘意佢囉。
佳尼
2012自由身由水晶宮轉會修咸頓，三年後，佢得到羅渣士賞識， 以£12.5m加盟利物浦，修咸頓帳面上賺左£12.5m。 都係果句啦，右閘靠佢啦，佢係之前嘅訪問入面話自己打閘打到翼咁，抵玩啦～

文尼
2014年由薩爾斯堡以£11.8m身價轉會修咸頓，兩年後，即係岩岩呢季英超未開之前，高普洗左£34m將佢由修咸頓帶到利物浦。修咸頓帳面上賺左£22.2m。但對於文尼，球迷一定覺得呢筆錢洗得值。要不是文尼，今季利物浦條攻線…

修咸頓係呢幾年帳面上總共賺左利物浦£78.7m ，呢個數字都唔細。修咸頓球員升值能力又高又快，真係好過買舊磚！當然，係通脹同埋球員踢耐啲會成熟/更有經驗都會直接影響身價，我地又唔可以話利物浦買貴人嘅。但調轉頭諗，如其俾人賺，如果利物浦直接target修咸頓想買嘅人咪得囉！


reference and source ：mirror 鏡報