【不能輸的比賽】利物浦對莫斯科斯巴達 文字

利物浦後防性感一直都係未解決嘅問題, 加上最近馬迪普傷咗, 令到大家都好擔心今晚凌晨0345嘅歐聯賽事。但高普就有好消息同大家講啦, 祖高美斯以及卡拉雲都可以係主場對莫斯科斯巴達嘅賽事上上陣。

睇返個歐聯E組積分榜, 利物浦今場波係唔輸得, 要繼續踢落去就起碼要拎到一分。而對手莫斯科斯巴達係最近五場賽事都未輸過, 聽落都係一場硬仗呀。不過利物浦都唔差, 係上場英超大勝白禮頓5-1之後, 連續八場賽事不敗, 係士氣上面絕對係打咗支強心針。
睇返上場, 高普擺咗個新陣, 由安尼簡, 韋拿度姆以及路夫雲擔任中堅, 但睇返高普係記者會上提到祖高美斯同卡拉雲都有機會上陣, 睇怕今場都唔會見到利物浦打三中堅陣。

馬迪普, 拉蘭拿以及佳尼仍然受傷患困擾, 未能係對莫斯科斯巴達呢場賽事上上陣, 跟據外媒指出, 拉蘭拿應該係不久嘅日子可以上場, 但馬迪普同佳尼分別要等到最快十二月尾同出年二月先會好返。高普都頭痕架, 所以有多兩位球員傷癒對佢黎講已經係一件好消息。
「卡拉雲同祖高美斯係尋日都有參與操練, 而佢地應該都會出席今日嘅練波。」

「之不過馬迪普同拉蘭拿都唔會出現係訓練中, 我希望唔會再有其他人因傷缺席。」

「馬迪普嘅肌肉傷進展比預期好, 有望可以提早復出。」

假如利物浦係今場歐聯賽事羸波, 佢哋就肯定會係小組首名出線。高普係最近三場賽事中都不斷試陣, 希望搵到個最岩利物浦嘅form, 或者係必要時變陣, 唔好再俾人話無plan B; 而高普亦係訪問中讚揚話班球員都好努力去適應新陣。分析返高普係記者會嘅言論, 利物浦好大機會打返4-3-3, 後面出卡拉雲拍住路夫雲, 而祖高美斯代替阿歷山大阿諾打返右閘, 左邊如無意外會係摩蘭奴, 上場正選嘅羅拔臣會打後備。
咁樣嘅話就空返安尼簡同韋拿度姆出黎, 中場線加埋古天奴就齊人啦。而前場亦係大家最唔擔心嘅一條線, 應該繼續由文尼同沙拿擔任正選球員, 費明奴係最近兩場波總共為利物浦上陣178分鐘, 都攰架, 所以估計高普有機會用其他球員頂替佢嘅位置。
莫斯科斯巴達今場一定要贏, 估計佢哋唔會打得咁保守, 換句話即係會多左空位俾利物浦打反擊, 呢個絕對係一件好事。之不過, 如果利物浦太注重係反擊上, 就會將個主導權交俾莫斯科斯巴達, 係呢條性感防線下, 絕對係一個危機; 所以高普係戰術上點樣拎到個平均將會係今場嘅焦點。

留意返, 係今晚嘅賽事後,星期日將會上演打吡戰, 利物浦將會係香港時間晚上10點3主場迎戰同市嘅愛華頓。

Reference: this is anfield , uefa, dailymail


留言

會員
我要評論
請按此登錄後留言。未成為會員? 立即註冊
  • Siu Leung Mui
    Siu Leung Mui 於 06/12/2017 評論 NO. 1

    駁腳隊長呢?

  • Gary Yim
    Gary Yim 於 07/12/2017 評論 NO. 2

    歐聯:
    A組:首名:曼聯(英格蘭),次名:巴素利(瑞士)
    B組:首名:巴黎聖日門(法國),次名:拜仁慕尼黑(德國)
    C組:首名:羅馬(意大利),次名:車路士(英格蘭)
    D組:首名:巴塞羅那(西班牙),次名:祖雲達斯(意大利)
    E組:首名:利物浦(英格蘭),次名:西維爾(西班牙)
    F組:首名:曼城(英格蘭),次名:蕯克達(烏克蘭)
    G組:首名:比錫達斯(土耳其),次名:波圖(葡萄牙)
    H組:首名:熱刺(英格蘭),皇家馬德里(西班牙)

    16強首名VS次名。
    (同組及同國不會碰頭。)

    車路士16強對手只會是巴黎聖日門/巴塞羅那/比錫達斯3隊其中1隊。

  • leglessbird
    leglessbird 於 07/12/2017 評論 NO. 3

    16強已經好睇

快捷鍵:←
快捷鍵:→