英超新貴介紹-白禮頓 文字

World Football News於 06/08/2017 發表 收藏文章
來季英超將有一個生面孔嘅球隊到來,就係「白禮頓」。白禮頓係英冠第43輪贏左韋根之後,鐵定可以來季到英超「大鷗展翅」,係球隊成立以黎第一次升上英超。等我介紹一下球隊背景同球員啦!
球會背景
白禮頓(Brighton & Hove Albion F.C.) 係1901年成立,位於英國南部一個城市。
班主係一個英國職業撲克玩家叫Tony Bloom2009年成為班主,係Brighton出世,由細到大都係白禮頓嘅球迷,所以頗有心機投資同經營球隊,而佢老豆亦曾經成為球會董事。
而主場叫 Falmer Stadium, 冠名贊助為 American Express. 係2011年啟用,可以客納30750人。球隊隊徽係一隻海鷗,點解要用海鷗做隊徽呢?係因為Brighton出名多海鷗,住Brighton嘅人都以海鷗為標誌,所以球隊嘅花名又叫 Seagulls, 海鷗嘅英文。(小弟曾經去過Brighton旅行,海鷗真係多到你唔信,可能我大鄉里啦)

而家就介紹下球隊領隊同主力
領隊
白禮頓嘅領隊係 基斯.曉頓 (Chris Hughton) ,球員時代曾經踢過熱剌,韋斯咸同賓福特(Brenford)。1991年退役後返回熱剌做助理領隊,於1997-2014年做過熱剌、紐卡素、伯明翰同諾域治領隊,

直至2014-2015英冠球季中旬走馬上任成為白禮頓領隊,協助球隊護級。
15-16球季以2球得失球只差排第3,係升班賽輸比錫周三,同英超擦身而過。
而16-17球季終於吐氣揚眉,帶領球隊得到聯賽得第2,鐵定升上英超。(雖然最後一輪飲恨失冠軍,但球迷對於球隊升班已經升貨,冠軍只係BONUS)
有不少嘅球員或與曉頓共事過嘅人都形容曉頓係一個冷靜嘅領袖。球員提及過,球隊早係比賽初段已經落後一球,之後被對手壓住,球隊上下都非常緊張,甚至發脾氣。返回更衣室後,曉頓沒有即時作戰術講解,反而沒有出聲,讓球隊冷靜,之後才簡短講一下戰術兼吩咐球員沉著應戰,最後球隊反勝對手。
風格
白禮頓嘅風格係防守反撃,重視兩翼攻擊。而防守就鎮守中路,係自己半場作壓迫,弱點就係兩閘嘅防守,因為不重視邊路防守再加上兩閘經常上前助攻。上季白禮頓其實每一個球員都好有鬥心,所以每一個球員無論正選或後備都貢獻良多,我就係前中後場各舉一個主力介紹。

史托迪爾David Stockdale (英格蘭/龍門/31歲)
佢係2014年加盟,一路都係球隊嘅主力。上季成為英冠最佳11人之一,有18場不失球,係英冠最多,佢最擅長係長傳,每場平均有6.1個成功長傳球,今季仲有一個助攻。不過佢並沒有續約,無跟隨白禮頓升上英超,反而加盟英冠嘅伯明翰,所以來季將唔會見到史托迪爾係英超。

鄧克 Lewis Dunk (英格蘭/ 中堅/25歲)
鄧克係2010年由青年軍升上一隊,其間2013年外借到布里斯托城半季。上季為白禮頓上陣43次,係球隊副隊長,佢攔截同鏟波嘅功夫都深得領隊曉頓信任,球隊亦有唔少快攻都係由鄧克策動,由鄧克長傳到前場,相信來季佢都會係球隊主力之一。

史提芬 Dale Stephens (英格蘭/中場/27歲)
上季為球隊上陣39場,2013年加從英冠查爾頓加盟白禮頓。佢係球隊嘅重要一員,因為球隊節奏都係由史提芬控制,亦都有領導能力,不時提醒隊友企位或走位問題。不過佢不時會作出粗野攔截,今季有6黃1紅嘅紀錄,而15-16球季升班附加賽對陣錫周三因粗野攔截得紅牌,使球隊攻守不平衝而落敗無法上英超。

洛卡特 Anthony Knockert (法國/右翼/25歲)
洛卡特2016年1月從比利時標準列治加盟白禮頓,當時已經可以迅速融入球隊。而上季更成為雙料MVP,即係英冠最佳球員及白禮頓最佳球員。上季為球隊上陣45場,貢獻15入球9助攻,今季可以升上英超,全靠洛卡特嘅火熱表現。無論係腳法、傳球同射門都全面,相信係每一隊球隊夢寐以求嘅攻擊球員。

以下再附上球隊歷史及球隊片段

標籤: 英超  升班  白禮頓  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→