米希達恩係多蒙特14-15賽季最令人失望既球員?

我們愛德甲 於 02/01/2015 發表 收藏文章
14-15賽季多蒙特既表現令人大跌眼鏡,雖然佢地德國盃同歐聯都入到十六強(兩邊都未出局),但佢地響德甲只能以第十七進入歇冬期。

導致多蒙特而家響德甲既悲劇既原因有好多,例如有好多球員都踢得未及標準,4個世界盃冠軍成員(真達、哥斯萊斯,艾歷杜姆、曉姆斯)冇一個可以穩定咁踢得似一個世界冠軍級既球員,根度簡又未上番傷前既世界級水平。新簽入既阿祖安拉莫斯、恩莫比尼同回歸既香川真司又對多蒙特既進攻線冇咩大貢獻,但講到最令人失望既球員,就非米希達恩莫屬。響半季後就批評堆新加入既球員未免太苟刻,但十八個月前以2750萬歐元從薩克達加盟多蒙特既米希達恩就似乎唔係好對得住多蒙特響佢身上灑既金錢喇。
(多蒙特陣中4個世界盃冠軍成員)
(米希達恩)

自佢響德國超級盃射入一球後,響之後十九場德甲、歐聯同德國盃賽事中,佢只交出一個入球、冇助攻,對於一個兩季前響烏超射入廿五球既球星黎講,咁既表現真係有少少失色。其實上季佢已經畀人話係一個失敗收購,原因例如佢上年歐聯對皇馬既半單刀失機令多蒙特於八強止步;佢上季下半季入球方面有起色,但入球通常都係響啲非太重要賽事中取得,佢最後響四十三場賽事交出左十三個入球同十個助攻。今季佢又開始回落,而家唔單止佢出現表現危機,多蒙特亦跌入降班區域。

其實米希達恩唔係懶,亦唔係冇進攻慾望,佢有時會成功製造入球機會,但往往都送唔到個波入網或做好致命一腳,佢上季因為太多失機而失去信心,而家個問題就好似個雪球咁越滾越大,導致佢今季表現繼續低迷。而家佢傷左可能都係一件好事,可以畀到佢空間同時間佢反思點解可以做得更好,等佢一月復出時可以有脫胎換骨既表現。

若然佢可以搵番昔日響烏克蘭既自己,佢一定可以為多蒙特貢獻良多,而且佢不乏射門機會(各項賽事總共起腳63次),而家教頭高普亦好支持呢位阿美尼亞球王,相信日後一樣會畀好多機會佢表現自己。雖然係咁,米希達恩一樣唔可以放鬆,因為多蒙特響薩爾斯堡紅牛簽入左甘普爾(Kevin Kampl),呢位斯洛文尼亞人係米希達恩響攻中位置既直接競爭對手,如果米希達恩打得唔好,就隨時被金普取代。
(甘普爾)

參考

若你喜歡「我們愛德甲」,請多多支持。
標籤: 德甲  多蒙特  米希達恩  

留言


請按此登錄後留言。未成為會員? 立即註冊
    快捷鍵:←
    快捷鍵:→