東方龍獅拒放林嘉緯跟港隊集訓 理由太荒唐 精選

東方呢隊波近三季都成為咗睇本地波球迷茶餘飯後嘅話題，事關呢隊波不斷鬧出唔同嘅笑話同鬧劇。由亞冠參賽風波、作客廣州恆大扣起哂球迷啲飛、突然唔夠班費要同新請番黎西班牙外援嘅阿路巴連拿解約、銀牌決賽完全兵潰輸俾弱旅元朗0:3，相信以上呢啲笑話只要有留意吓本地波都會略有聽聞。而最近佢地又做出令好多本地波球迷熱烈討論嘅舉動，就係唔放人俾港隊去集訓準備亞運足球賽。

東方總監梁守志喺接受傳媒訪問就話咁做係因為東方上季成績太差，今季要提早開操練，而因為隊內球員好多都係新加盟所以要透過pre season 增加默契，八月初就會放兩位年輕球員歸隊，林嘉緯就要踢埋第一場對韓國球隊嘅friendly 先得，同時又話如果林嘉緯成個pre season 都無跟大隊嘅話，好難可以季初派佢上陣云云。
講到尾只不過係為咗球會嘅利益，但係咁樣港隊利益就唔洗理？有人話唔俾去集訓啫，又無話唔俾佢去踢亞運，嘈乜啫？之不過咁樣唔俾球員跟港隊操練，其實係會嚴重影響港隊喺亞運嘅佈處。本來教練有成個月係可以透過每日嘅訓練同唔同嘅友誼賽去磨合班成隊球員嘅默契、觀察成隊球員集訓嘅狀態同表現、測試唔同陣式嘅效果，再去派出一個最合適嘅陣容應戰。而家就係因為一隊東方嘅自私，搞到成隊得大約十日係一齊練，令教練根本無乜可能做哂佢想做嘅嘢，同大打天才波無乜分別，成績或者會比較差。其實港隊如果喺亞運表現好，其他無睇開本地波嘅球迷就會話原來本地波未必係咁差，引到啲人睇本地玻，增加入場人數，對球隊黎講都係好事。但係你而家咁搞，又唔係唔派球員參賽，但又唔俾人跟港隊集訓，影響人地佈處，一係你就決絕啲唔派人參賽喇。唔俾人跟港隊集訓既理由話係因為同自己球隊練波時間撞咗其實有啲荒唐，其他球隊咪又要係開操唔見其他隊唔放？
如果港隊教練一早知道東方唔肯放人集訓係咪可以揀第二個超齡球員呢？其實仲有鞠盈智、黃威呢啲唔係踢東方嘅但實力同林嘉緯嘅超齡中場可以選擇，點解唔放棄林嘉緯呢？林嘉緯又點解咁聽球隊話呢，佢想幫港隊爭取好成績嘅決心又有幾大呢？

不過最搞笑係香港喺亞運嘅分组賽對手仍然係未確定嘅，因為早前官方嘅抽籤竟然可以漏咗兩支球隊，好大可能會重抽。