南區新一季進攻多變數 奪冠夢可成真?

守拙 於 21/07/2018 發表 收藏文章
「南區破錦標荒可以嗎?」相信係每一個港超南區迷嘅心底話,而港超球隊冠忠南區已經宣佈咗2018/2019球季完整嘅球員名單,雖然西班牙幫加拉度、馬高斯同馬天尼斯呢啲有一定實力嘅外援全部走哂,但係球隊搵咗卡錫、高美斯、狄卡奧同迪亞高番黎去填補空缺,實力有增無減,或者有力係今季突破宿命,去捧起創會以黎第一個頂級賽事冠軍。

其中有球迷認為聘請近三年似乎失意嘅迪亞高加盟係錯誤嘅收購,但我就認為迪亞高加盟冠忠南區係天作之合。迪亞高係一個極需要空間去發揮嘅球員,而冠忠南區係一支穩守反擊為主嘅球隊,絕對適合迪亞高發揮,兼上有老友蘇沙協助,要融入球隊絕對唔係乜問題。你可能話對上三季其實迪亞高表現好一般,但其實上年迪亞高喺大埔嘅入球雖然唔多,但喺佢在場嘅時候,佢可以喺前面做到支點停到個波再策劃攻勢,相反被球迷捧上天嘅伊高沙托尼只係一個機會主義者,並無呢個能力,所以上年大埔每每落後就需要迪亞高上陣。今年黎到南區,對住強隊嗰陣,迪亞高就可以成為支點,配合同鄉蘇沙後上插入,呢個會係南區恐怖嘅快速反擊組合。不過對較弱嘅球隊就未必適合咁用,因為迪亞高同蘇沙都係有啲獨食,如果係面對密集,無乜空間去俾佢地發揮,佢哋只會係前面死扭,唔點交波俾隊友,拖慢進攻節奏,好難去撕破密集。
所以因應呢個情況,南區就收購咗前南華外援高美斯。高美斯係好勤力,會去壓迫對方後防,但同時係一個極需要供應嘅球員,因為佢只係一個純射手,踢法有啲似車路士嘅基奧特。佢只係有能力停個波落黎,同埋去射個波入網。如果球隊係玩主攻嘅,有大量供應俾佢,咁佢肯定如魚得水,入球不斷!相反如果球隊係打穩守反擊,但係又出高美斯,咁好大機會會破壞球隊反擊節奏。之前有睇高美斯踢南華同飛馬嗰時都知道,因為高美斯速度唔高,走位靚亦都只係限喺對手龍門個廿五碼,一玩反擊成個攻勢就會俾佢拖累,好難及時趁火打劫反攻入對面波。

其實一隊波有唔同類型嘅球員係好正常,咁咪可以俾教練因應唔同情況出唔同嘅球員應戰。其實今季南區引入咗好多球員,進攻方面真係可以好變化,儘管睇吓教練鄭兆聰點用呢班球員去幫南區爭取好成績。


留言


請按此登錄後留言。未成為會員? 立即註冊
    快捷鍵:←
    快捷鍵:→