【一年容易又生日】耶耶托尼34歲生日,有冇人同佢慶祝?

有趣足球事件簿 於 13/05/2017 發表 收藏文章
今日係2017年既5月13號,係曼城中場耶耶托尼既34歲生日,而生日對於呢位科特迪瓦老將而言,係一個好敏感既時刻,因為喺2014年既時候,大家都掛住慶祝藍月亮力壓利物浦拎到英超冠軍,而忘記咗耶耶托尼既生日,搞到佢好唔Likey!

雖然耶耶托尼喺事後,指「生日事件」只係一個玩笑,但係呢位曼城中場既經理人施陸(Dimitri Seluk),日前都用呢件事去搞笑一番。


施陸咁講:「我好希望有曼城既支持者,能夠拎生日蛋糕入場,除咗觀賞曼城對李斯特城既比賽,仲要幫耶耶托尼慶祝34歲生日,費事佢又唔高興啦。」

平心而論啦,拎個真既生日蛋糕入場,又係幾唔方便既,又唔可以直接交俾耶耶托尼,所以應該都冇乜邊個會聽施陸咁講架啦,所以有曼城球迷就醒目啦,專登整隻生日蛋糕既紙牌,當賀一賀呢位科特迪瓦球星既34歲生日啦!


當然啦,醒目既唔止球迷,仲有曼城既球會代表。喺開波之前就出咗post,幫呢位科特迪瓦中場慶祝,免得又搞到耶耶托尼嬲嬲豬。不過,曼城隊內同樣有人唔識Do喎,講緊既就係翼鋒球員史達寧啦!


今場對住李斯特城,曼城憑住大衛施華同埋加比爾捷西斯既入波贏2:1,而榮獲今場MVP頭銜既史達寧,就同耶耶托尼喺賽後,一齊接受《BBC》既訪問,而呢位前利物浦球員就笑笑口咁講:「生日快樂呀,耶耶托尼,恭喜你38歲生日喎!」

聽到呢句之後,耶耶托尼成個人呆曬,仲即刻問史達寧搞邊科添。之後,佢就喺訪問入面談到自己既生日:「年齡只係一個數字,我覺得自己仲後生過史達寧架,同埋我唔鍾意生日囉。」


施陸訪問:
http://www.espnfc.com/manchester-city/story/3124342/man-city-supporters-urged-to-bring-birthday-cakes-for-yaya-toure-by-agent

耶耶托尼賽後訪問:
http://www.bbc.com/sport/live/football/39787317
標籤: 耶耶托尼  

留言


請按此登錄後留言。未成為會員? 立即註冊
    快捷鍵:←
    快捷鍵:→