【FIFA頒獎禮懶人包】CR7榮膺世界足球先生、雲尼亞里奪最佳教練!

有趣足球事件簿 於 10/01/2017 發表 收藏文章
無幾耐之前,足壇一年一度既盛事、國際足協年度頒獎典禮終於喺瑞士既蘇黎世舉行,而不出意料既係,皇家馬德里前鋒、葡萄牙國腳C.朗拿度,以大熱姿態奪得2016年既世界足球先生,絕對係實至名歸!

過去一年,C朗喺皇馬或者葡萄牙,絕對係拎冠軍拎到手軟,而其中最重要既冠軍就當然係歐聯冠軍同埋歐洲國家盃既冠軍啦!喺佢地帶領之下,皇馬同葡萄牙都如願咁捧盃,足以反映呢位31歲射手既領導能力。


不過,或者有一件事會令到C朗覺得遺憾,因為無論係皇馬既主帥施丹,抑或係葡萄牙國家隊既費蘭度山度士,都無辦法拎到年度最佳教練獎,因為呢個獎既得主,係李斯特城教頭雲尼亞里。呢位一度被視為「垃圾教練」既主帥,上季成功大逆轉,率領名不經傳既李城拎英超冠超,充滿傳奇性!


喺今次頒獎典禮入面,第一個頒發既獎項就係年度最佳球迷,而今次既獲獎單位就係利物浦同多蒙特既球迷。兩軍球迷喺上屆歐霸盃八強次回合入面,合唱《You'll Never Walk Alone》,場面令人動容!

https://www.youtube.com/watch?v=G2MSceisNYY&t=1s
至於好多球迷都好關心既年度最佳11人入面,出現左俾西甲球員壟斷既局面,因為除左拜仁慕尼黑門將紐亞同埋祖雲達斯右閘丹尼爾之外,其餘9位球員都係來自西甲,仲要喺全部都係效力緊皇馬或者巴塞添!不過,好多球迷其實都知道,丹尼爾喺半年前,都係一名巴塞球員,所以嚴格黎講,今次係有9.5位西甲球員入選最佳陣容。

2016年FIFA最佳陣容:

門將:紐亞(拜仁慕尼黑)
後衛:丹尼爾(祖雲達斯)、碧基(巴塞隆拿)、拉莫斯(皇家馬德里)、馬些路(皇家馬德里)
中場:恩尼斯達(巴塞隆拿)、卻奧斯(皇家馬德里)、摩迪(皇家馬德里)
前鋒:美斯(巴塞隆拿)、蘇亞雷斯(巴塞隆拿)、C.朗拿度(皇家馬德里)



至於普斯卡斯獎(年度最佳入球),就由來自馬來西亞既前鋒蘇布利(Faiz Subri)獲得。喺對住彭亨既比賽入面,28歲既蘇布利射出一個弧度十足既死球,成功收死門將,最終更加協助自己效力既檳城以4:1擊敗對手。

https://www.youtube.com/watch?v=4lRTLRCuGkE
其他得獎者 / 單位如下:

世界足球小姐: Carli Lloyd(美國)
最佳女足教練:Silvia Neid(前德國女足教練)
傑出職業生涯獎:法卡奧(巴西、五人足球)
公平競技獎:國民體育會(哥倫比亞)


參考:

http://www.fifa.com/the-best-fifa-football-awards/photos/galleries/y=2017/m=1/gallery=winners-with-their-trophies-2862844-2862845.html?intcmp=fifacom_hp_module_news

留言


請按此登錄後留言。未成為會員? 立即註冊
    快捷鍵:←
    快捷鍵:→