[球筆著地] 琴晚嘅阿根廷真係一個笑話。

球筆著地 於 22/06/2018 發表 收藏文章
上回提到搶到一分可能都要劏雞還神。結果係輸3球之餘,仲有多個出醜舉動。

上半場戰況尚算均勢,克羅地亞4分鐘先有入肉攻勢,佩列錫壓過三人防線,
半單刀射遠柱死角,卡巴尼路僅僅撲出。
及後非勝不可嘅阿根廷搶回主導,當中最具威脅嘅一腳,
係29分鐘,趁格仔軍一次解圍混亂,安素佩雷斯面對空門射斜,半場0比0。

值得留意嘅係阿根廷嘅排陣,前場冇出迪馬利亞做正選,
後防變成三中堅,兩閘推前變翼衛,用兩邊運個波上前場,嘗試分輕美斯組織攻勢嘅負擔。
唔知全隊上下係好想幫呢個隊長定好憎呢個隊長,
美斯全場竟然都冇咩波掂,森柏奧利想解放美斯變成自我凍結....


下半場一展開,雙方踢法依然,直至去到53分鐘,
笑話嚟料,卡巴尼路高章清波變派膠,
(網上圖片)
前場迫搶嘅列比錫多謝都嚟唔切,一個半車身掛入網,
相信嗰一秒全球阿根廷球迷,甚至場上同後備席嘅球員心入面都講咗句粗口。
當然包括等緊死球入替嘅西瓜恩,點知個死球係球隊失球,仲要係自爆個隻。
(網上圖片)

講過好多次,呢隊波冇乜EQ,唔擅長踢逆境波,
估唔到主帥森柏奧利都咁唔冷靜,變咗打機咁,除咗件外套推晒所有前鋒出去,
(網上圖片)
68分鐘換埋迪巴拿出嚟,擺咗個4大前鋒陣。
擺大個頭唔係問題,擺咗個大頭佛出嚟就係問題。


好明顯全隊上下冇練過呢個陣,只係放有入波能力嘅球員入場,自己搞掂啦喂!
有技術、冇默契,有力氣、冇走位....
(網上圖片)

最最最重要係唔回防唔補位,成條中場線變真空,克羅地亞全場穩守突擊都係人少打人多,
阿根廷一變陣,就唔夠人守,又有好多空位同時間畀格仔軍做波,
第二球摩迪世界波固然靚,但全因佢毫無壓力下左拐右拐,擺靚個位靚射破網。

冇喇,冇晒士氣冇晒EQ,
森柏利奧係場邊省個波入場、奧達文迪老羞成惱抽水,
(網上圖片)
阿根廷得返10分鐘追兩球,但完全唔積極,
變相克羅地亞有好多空位慢慢做,補時階段,
罰球中楣嘅拉傑迪禁區外抽射,被門將擋出,
高華斯域輕鬆過鄧梓峰咁, 喺小禁區邊橫傳返入嚟跟進嘅拉傑迪,
一眾阿根廷球員輸到企係度,禁區內追都唔追,望住自己個龍門被攻入。
(網上圖片)

3:0。
一隊笑到最後,一隊被恥笑到最後。 你睇下摩迪幾開心XD!
(網上圖片)

阿根廷自爆兼冇Plan B 當然值得輸。
但亦都要讚嘅係克羅地亞嘅機動同效率,
(網上圖片)
可以話係教材式嘅防反,前場4人壓迫唔係同你埋身肉搏,
而係企位遮你傳球路線,令後衛一係大腳上一係橫傳,
你大腳,基本上克羅地亞11人係晒自己半場佈防,
你橫傳,就一個上一個落繼續壓迫遮線。
反擊就靠中場兩核摩迪同拉傑迪左右長波拉邊撕破三人防線,
你個見到每次進攻都係幾個人,或者幾腳波已經足以做到心臟地帶。

唔理今晚咩賽果,阿根廷出線就要下場大炒尼日利亞兼克羅地亞唔渣流攤,
但睇完今場,尼日利亞都未必會輸畀亞軍廷,
況且就算出到線,對法國都唔會走得遠。
DON'T CRY , ARGENTINA.
(網上圖片)

留言


請按此登錄後留言。未成為會員? 立即註冊
    快捷鍵:←
    快捷鍵:→