[球筆著地] 萬大事,有恩拿舒域治。

球筆著地 於 05/07/2018 發表 收藏文章
有人話過,識睇波一定睇防守。
今屆世界盃踢到依家,賽果都幾出人意表,唔少underdog 都守出個未來。

而芸芸好手當中,筆者就比較留意主辦國俄羅斯嘅中堅,恩拿舒域治 (Sergei Ignashevich)。

今年38歲,係俄羅斯喼帽第一人,99年開始職業生涯,一直係俄超打滾。
當年vs今日(網上圖片)


但如果你有打開FM,相信唔會對呢個名感到陌生。
遊戲入面嘅佢唔算係妖人,但勝在又平又實用,加上個名水蛇春咁長,所以好記得。
(網上圖片)

今屆世界盃雖然係俄羅斯主場,但又冇諗過會見到呢係老人家落場。
何解?
因為佢2016年喺歐國盃分組賽出局後,就已經宣佈退出國家隊。仲諗住今個夏天就掛靴。

點知...點知國家又有任務搵你喇!
事緣正選中堅卡保洛夫陷入禁藥風波,之後又咁啱受傷埋,
教練查卓索夫要搵人啱打3-5-2 陣式,最後都係打畀恩拿舒域治叫佢出山。

當然,第一感覺,都係擔心嘅,喺A組面對蘇亞雷斯,沙拿呢啲快馬,
(網上圖片)
但又點知,故事嘅發展,就係大家眼見嘅,俄羅斯昂然走入8強。
然後前幾日睇完16強對西班牙,睇到嘩一聲,
呢位老中堅踢足120分鐘, 但12分鐘就先擺一個烏龍,心諗唔係老貓燒鬚掛,
好彩之後蘇巴入返球12碼半場追和。
擺明要守你踢12碼嘅俄羅斯,往後嘅75分鐘完全捱打,哥斯達、洛迪高、碧基、拉莫斯輪住嚟,
(網上圖片)

但呢位老人家頭頂腳踢,清波包位樣樣齊,仲要四個換人名額都唔換走佢,
踢足120分鐘,再大大力射入埋第二輪12碼,真係不得了,要大大力拍手掌,去讚賞呢個老將!

8強戰聽日開始,不過俄羅斯仲有多一日抖下,
對陣雙迪坐陣嘅克羅地亞,相信都唔會易踢,
但如果贏到格仔軍,就係繼08年歐國盃之後再晉身大賽4強。

所以睇波同時不妨留意一下呢位老而彌堅4號仔,佢叫做恩拿舒域治。
(網上圖片)

留言


請按此登錄後留言。未成為會員? 立即註冊
快捷鍵:←
快捷鍵:→