【後備之王】143次!「英格蘭長人」打破英超後備上陣紀錄!

森美爾足球勝地 於 21/11/2017 發表 收藏文章
啱啱呢個禮拜嘅英超賽事,史篤城作客對白禮頓,英格蘭長人中鋒高治後備上陣,以總數143次後備入替,成為英超史上後備上陣次數最多嘅球員!

loading

loading


老將高治雖然年屆36歲,但每次後備上陣都依然有心有力!今季共7次後備入替,能夠為球隊攻入三球,以36歲老將同埋唔算好多嘅出場時間嚟講,高治仲係好有威脅!

高治曾經效力阿士東維拉、修咸頓、利物浦、樸茨茅夫同埋熱刺,2011年開始加盟史篤城,至今已經係佢效力嘅第7個球季。當時佢以1000萬鎊身價加盟,打破當時史篤城隊內轉會費紀錄。加盟後嘅高治第一季已攻入10個聯賽入球,及後喺曉士帶領下亦有唔錯嘅成績同埋穩定嘅上陣時間。之後因為曉士改變打法,唔再長傳急攻打高波,加上高治年紀開始大,上陣時間慢慢減少,但上季聯賽都仍然有27次上陣機會,當中有13次正選,並攻入7球!

loading

高治雖然身高腳長,高空威脅最大,但其實佢都相當靈活,腳下功夫不俗,所以除咗入波之外,佢都能夠為隊友鋪橋撘路。有統計就顯示,高治嘅助攻次數比史高斯仲要多一次,有56次咁多!不過講真,高治下年一月尾就37歲架喇,好可能今季就係佢最後一季,鍾意睇佢踢波同埋跳機械舞嘅你,就要睇多啲史篤城嘅比賽喇!

消息來源:ESPN

留言


請按此登錄後留言。未成為會員? 立即註冊
    快捷鍵:←
    快捷鍵:→