[WKD手記] - 防守反不了擊 文字

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


期待已久嘅雙紅大戰最終以零入球結束,而要為賽果感到慶幸嘅係曼聯。作為一場大戰曼聯當然踢得唔夠好喇,幾乎俾利物浦㩒住黎攻,反擊機會少至又少,執到一分算係好彩。盧卡古再次被外界點名批評,話佢大賽又隱形,但係咪佢一個人嘅問題呢?摩連奴賽前部署係咪只求一分,中途又有無諗過要改變戰術?無論如何,我相信如果同對方鬥搶下場可能更加慘,季尾我地就知摩帥咁踢係啱定錯。

賽前公佈嘅出場陣容有達米安、華倫西亞同埋楊格三隻閘,我當時仲好肯定曼聯將達米安擺做左中堅,楊格踢左閘幫助前者一齊看守沙拉,實行黎個532守住兩邊。現實就係踢返一套慣常嘅451陣式,達米安踢返左邊,楊格就踢華西前面果格。右楊右華發揮尚算平穩,但就更加突顯到左路攻守都有不足之處。成場波沙拉一攞波二話不說就直接突破,盤扭成功左幾次之後信心大增,創造左好多驚險鏡頭。當然你可以話因為利物浦左路無左文尼先顯得曼聯右邊輕鬆,達米安亦都叫做出腳準、守得住,但係每逢佢出場嘅比賽,邊線進攻真係會好疲弱,上落走動較多嘅楊格或者係更佳人選。


得中場得天下,係呢一環我地今場絕對係處於下風。一開始雙方小心翼翼,兩邊都唔敢亂攻,但利物浦係節奏仲係極慢嘅時候選擇控住黎踢。二十分鐘打後利記加快行軍速度,曼聯雖然擋得住啲攻勢,但觸球次數愈黎愈少,結果處理反擊嘅質素都隨之下降,成場波只有一次贏波嘅機會。


無左兩個大隻中場,靴里拉終於有機會正選上陣,而呢場難啲說服到摩帥俾返個正選位佢。防守上佢算係幾專注,沙拉踢得咁Sharp唔多唔少係因為佢盯到古天奴無乜機會造波同遠射,情況有啲似對車路士時死跟夏薩特咁。奈何佢同全條中前場一樣,傳球成功率不足八成 (只有馬迪、連加特超過),難得拎返個波又好易咁送走。中場失利又點只因為佢一個丫?馬迪今場刻意留後,只專心做兩位中堅嘅屏障,應該係收到領隊指示而一改前幾場嘅踢法。但正正係保守所以靴里拉踢得咁吃力,進攻時又同兩閘一樣俾唔到足夠支援米希達恩、馬素爾同盧卡古,啲波就上左去就傳唔返黎慢慢搓,控球就慢慢變得一面倒。

盧卡古錯失唯一入球機會故然值得檢討,但佢成場波無乜供應亦係事實。佢唔係懶惰嘅球員,不過作為單箭頭佢唔應該成日返去後面要波,反而要一直牽制對方一對中堅。邊個踢得最唔合格?我會話係米希達恩,佢對強隊隱形程度不下於盧卡古,呢場亦不例外。摩連奴應該好清楚只有踢強勢足球先會發揮到佢嘅能力,佢唔係四六/三七波時搶返主導權嘅球員。以防守表演黎講,曼聯算係做到賽前部署,但摩連奴如果想主守的話點解會出佢做正選呢?下半場換入福仔同連加特但為時已晚,因為馬迪同靴里拉已經無乜進攻嘅意志同信心。

對上一次國際賽後我地有好明顯嘅體力問題,加上高普擅於踢高壓足球,或者就係摩連奴選擇呢個戰術嘅原因。不失球和波唔係問題,但必須重新考慮排一個點樣嘅中場先可以製造到有效反擊出黎。

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

留言

會員
我要評論
請按此登錄後留言。未成為會員? 立即註冊
  • tinchi3721
    tinchi3721 於 20/10/2017 評論 NO. 1

    如普巴唔傷 做攻中會好過米希達恩 始終身體對抗係英超太重要

  • Yong Yuhan
    Yong Yuhan 於 20/10/2017 評論 NO. 2

    miki真心隐形... 最近都唔系踢得好好

  • 車仔麵
    車仔麵 於 21/10/2017 評論 NO. 3

    mk跌watt之餘,馬達慢亦唔sharp,靴利拉做到防守但組織進攻冇大貢獻,都已經有幾場,攪到馬迪包㩜埋射門變身box to box, 佢攰時曼聯唔知點算?

  • Ming Wa Lee
    Ming Wa Lee 於 21/10/2017 評論 NO. 4

    沒有普巴的結果

  • 林啟鴻
    林啟鴻 於 21/10/2017 評論 NO. 5

    摩士節學,保住1分最緊要

  • Ka Man Chan
    Ka Man Chan 於 21/10/2017 評論 NO. 6

    跑得最快個個馬斯亞都係左閘位,試問又點反擊。

  • Jeff Kwong
    Jeff Kwong 於 22/10/2017 評論 NO. 7

    啱啱輸埋

  • 烏列爾
    烏列爾 於 23/10/2017 評論 NO. 8

    4424啦

快捷鍵:←
快捷鍵:→